އެމެރިކާއިން އދ އަށް ކަނޑައަޅުއްވާފައި ހުންނަވާ މަންދޫބު އިސްތިއުފާ ދެއްވައިފި
11 އޮކްޓޯބަރު 2018 | ބުރާސްފަތި 14:41ހޭލީ ވަނީ 2020 ވަނަ އަހަރު ރިޔާސީ އިންތިޚާބުގައި ވާދަ ނުކުރައްވާކަން ކަށަވަރު ކޮށްދެއްވާފައި
އެމެރިކާގެ އދ މަންދޫބު ނިކީ ހޭލީ ރައީސް ޑޮނަލްޑް ޓްރަމްޕްގެ އަރިހުގައި | ބީބީސީ
އެމެރިކާ އިން އދ. އަށް ކަނޑައަޅުއްވާފައި ހުންނެވި މަންދޫބު ނިކީ ހޭލީގެ އިސްތިއުފާ ރައީސް ޑޮނަލްޑް ޓްރަމްޕް ގަބޫލުފުޅު ކުރައްވައިފިއެވެ.
އޯވަލް އޮފީހުގައި އެކަމަނާއާއެކު ހުންނަވައި ރައީސް ޓްރަމްޕް ވިދާޅުވީ މި އަހަރު ނިމުމާއެކު އެކަމަނާ މަގާމުން އެ ވަކިވެވަޑައިގަންނަވަނީ އާދަޔާ ޚިލާފް މަސައްކަތްޕުޅެއް ކުރައްވާފައި ކަމަށެވެ.
ސައުތު ކެރޮލައިނާގެ ކުރީގެ ގަވަރނަރ އަދި އުމުރުން 46 އަހަރުގެ ނިކީ ހޭލީއަކީ ރައީސް ޓްރަމްޕްގެ ކެބިނެޓްގައި ހިމެނިވަޑައިގަންނަވާ މަދު އަންހެން ބޭފުޅުންގެ ތެރެއިން އެއް ބޭކަނބަލެކެވެ. އެކަަމަނާ އިސްތިއުފާދެއްވާ ވަކި ސަބަބެއް ހާމައެއް ނުކުރައްވައެވެ. ނަމަވެސް 2020ގެ ރިޔާސީ އިންތިޚާބުގައި ވާދަކުރައްވާނެ ކަމަށް ކުރެވޭ ތުހުމަތުތައް އެކަމަނާ ދޮގު ކުރައްވައެވެ.
ރައީސް ޓްރަމްޕް އަށް އިޝާރާތް ކުރައްވައި އެކަމަނާ ވަނީ އަހަރެން މި ކެމްޕެއިން ކުރަނީ "މިއަށް" ކަމަށް ވިދާޅުވެފައެވެ.
އެކަމަނާ ވަނީ ވަޑައިގަންނަވާނެ ވަކި ދިމާލެއް ނިންމަވާފައި ނުވާ ކަމަށް ވިދާޅުވެފައެވެ.
އެކަމަނާ ވަނީ ބުރަ އަށް އަހަރު ހޭދަކުރެއްވިއްޖެ ކަމަށާއި އެކަމަނާއަކީ ދައުރު ކަނޑައެޅިފައިވާކަން ގަބޫލުކުރައްވާ ބޭފުޅެއް ކަމަށް ވިދާޅުވެފައެވެ.
ނިކީ ހޭލީ އަކީ ރައީސް ޑޮނަލްޑް ޓްރަމްޕްގެ އެންޓި ގްލޯބަލް ސިޔާސަތުތައް ދިފާއު ކޮށްދެއްވުމަށް ބުރަ މަސައްކަތްތަކެއް ކޮށްދެއްވާފައިވާ އަދި އދ މަޖިލީހުގައި އިސްރާއީލް ދިފާއުކުރައްވަން ކުރައްވާ މަސައްކަތްޕުޅުތަކުގެ ސަބަބުން ފާޑުކިޔުން އަމާޒުވެފައިވާ ބޭފުޅެކެވެ.
