ފްލެޓް ލިބޭ މީހުންގެ ވަގުތީ ލިސްޓް އާންމުކޮށްފި
10 އޮކްޓޯބަރު 2018 | ބުދަ 12:45އެއް ކޮޓަރީގެ ކެޓެގަރީ ފިޔަވައި އެހެން ހުރިހާ ކެޓެގަރީއެއްގެ ވަގުތީ ލިސްޓް ދަނީ އާންމުކުރަމުން
ހައުސިން މިނިސްޓަރ ޑރ. މުހައްމަދު މުއިއްޒު
"ހިޔާ" މަޝްރޫއުގެ ދަށުން ހުޅުވާލި ފްލެޓަށް ހޮވުނު ފަރާތްތަކުގެ ވަގުތީ ލިސްޓް އާންމުކޮށްފިއެވެ.
ހައުސިން މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވީ ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. އަދި ލިޔުމުންނާއި މެއިލް މެދުވެރިކޮށް ކޮންމެ މީހަކަށް ޝަކުވާ ހުށައެޅޭއިރު ޝަކުވާ ހުށަހަޅާ ކޮންމެ މީހަކަށް ޖަވާބު ދިނުމަށް ފަހު، ދާއިމީ ލިސްޓު ނެރޭނެ ކަމަށް މުއިއްޒު ވިދާޅުވިއެވެ.
ޝަކުވާ ހުށަހަޅުއްވާނީ އެކަމަށް ޚާއްސަ ކުރެވިފައިވާ ފޯމު ފުރިހަމަކުރެއްވުމަށް ފަހު، 2018 އޮކްޓޯބަރ 11 ވާ ބުރާސްފަތި ދުވަހުގެ 14:00ގެ ކުރިން މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ އަށެވެ.
މިފަހަރު ގާތްތަނޑަކަށް 22،000 އަށް ވުރެ ގިނަ މީހުން "ހިޔާ" މަޝްރޫއަށް ފޯމް ހުށައަޅާފައިވާއިރު އެއް ކޮޓަރީގެ ކެޓެގަރީ ފިޔަވައި އެހެން ހުރިހާ ކެޓެގަރީއެއްގެ ވަގުތީ ލިސްޓް ދަނީ ގެޒެޓްގައި އާންމުކުރަމުންނެވެ. އެއް ކޮޓަރީގެ ކެޓަގަރީ އަކީ އަލަށް ކައިވެނިކުރާ ފަރާތްތަކަށް ދޫކުރާ ފްލެޓްތަކެވެ. އެ ފްލެޓްތައް ފަހުން އިއުލާނު ކުރާނެ ކަމަށް މިނިސްޓަރު މުއިއްޒު ވިދާޅުވިއެވެ.
ޑޮކްޓަރުންނާއި ނަރުހުންގެ ފްލެޓް:
ދޫކުރަނީ :475 ފްލެޓް
ފޯމު ލާފައި ވަނީ: 299 ފޯމް
ކަނޑައަޅާފައިވާ ވަރަށް މި ކެޓަގަރީ އަށް ފޯމު ލާފައިނުވާތީ ފޯމުލި 299 މީހުންނަށް ފްލެޓް ދޭން ވަނީ ނިންމާފައި. މި ކެޓަގަރީ އަށް ކަނޑައެޅި ފްލެޓްތަކުގެ ތެރެއިން ބާކީވާ 176 ފްލެޓްގެ ތެރެއިން 110 ފްލެޓް ޓީޗަރުންނަށް އަދި 50 ފްލެޓް މާލޭ ރަށްވެރިންނަށް ހާއްސަ ކެޓެގަރީ އަށް ވަނީ ބަދަލުކޮށްފައެވެ. ބަކީވާ 16 ފްލެޓަށް ހަދާ ގޮތެއް މިނިސްޓަރު ވިދާޅެއް ނުވެއެވެ.
ޓީޗަރުންނަށް ޚާއްސަ ކެޓެގަރީ:
ފޯމު ލާފައި ވަނީ: 735 ފޯމް
ދޫކުރަނީ: 625 ފްލެޓް
އެކަނިވެރި މައިންނާއި ބަފައިން:
ފޯމު ހުށައެޅީ: 1799 ފޯމް
ދޫކުރަނީ: 500 ފްލެޓް
ޒުވާނުންގެ ކެޓަގަރީ:(18 އަހަރާއި 48 އަހަރު):
ފޯމު ހުށައެޅީ: 9019 ފޯމު
ދޫކުރަނީ: 1000 ފްލެޓް
ދަފްތަރު ކެޓެގަރީ:
ފޯމު ހުށައެޅީ: 2595 ފޯމް
ދޫކުރަނީ : 1044 ފްލެޓް
މާލޭގެ ރަށްވެހިންގެ ކެޓެގަރީ:
ފޯޯމު ލީ: 4517 މީހުން
ދޫކުރަނީ: 1050 ފްލެޓް (ކުރިން ދޫކުރުމަށް ހަމަޖެހިފައިވަނީ މި ކެޓަގަރީން 1000 ފްލެޓް ދޫކުރުމަށް ނަމަވެސް ޑޮކްޓަރުންނާއި ނަރުހުންގެ ކެޓަގަރީން 50 ފްލެޓް ވަނީ މި ކެޓަގަރީ އަށް އިތުރުކޮށްފައެވެ.)
ނުކުޅެދުންތެރިކަން ހުންނަ ފަރާތްތަކާއި އާއިލާތަކަށް ދޫކުރާ ފްލެޓް :
ފޯމުލީ: 1217 މީހުން
ދޫކުރަނީ: 200 ފްލެޓް
