އަލީ ހުސައިން ޑީޖޭއޭ އަށް ހާޒިރުވާން އަންގައިފި
10 އޮކްޓޯބަރު 2018 | ބުދަ 14:49ޑީޖޭއޭއަށް ހާޒިރުވުމަށް އެންގީ ސުޕްރީމް ކޯޓުގެ އަމުރަކުން
ކެންދޫ ދާއިރާގެ މެމްބަރު އަލީ ހުސައިން
ކެންދޫ ދާއިރާގެ މެމްބަރު އަދި ގާނޫނީ ވަކީލު އަލީ ހުސައިން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އަށް ހާޒިރުވުމަށް އަންގައިފިއެވެ.
މީގެ ކުރިން ދެ ފަހަރެއްގެ މަތިން ގާނޫނީ ވަކީލުކަމުގެ ހުއްދަ ހިފަހައްޓައި، ސަސްޕެންޑް ކުރި އަލީ ހުސައިން ބުދަ ދުވަހުގެ ހެނދުނު 9:00 އަށް ޑީޖޭއޭ އަށް ހާޒިރުވުމަށް އަންގާފައި ވަނީ ސުޕްރީމް ކޯޓުގެ އަމުރެއްގެ ދަށުންނެވެ. ކޯޓަށް ހާޒިރުވުމުގެ އަމުރުގެ ފޮޓޯއާ އެކު އަލީ ހުސައިން ކުރެއްވި ޓްވީޓެއްގައި ވިދާޅުވެފައި ވަނީ އޭނާ ހާޒިރު ކުރަނީ ގާނޫނީ ވަކީލުކަމުން ސަސްޕެންޑް ކުރުމަށް ކަމަށް ބެލެވޭ ކަމަށެވެ.
އަލީ ހުސައިން ޑީޖޭއޭ އަށް ހާޒިރުވުމަށް އަންގާފައި ވަނީ ސުޕްރީމް ކޯޓަށް ފާޑު ވިދާޅުވުމުން، ކުރީގެ ޑެޕިއުޓީ ޕްރޮސެކިއުޓާ ޖެނަރަލް ހުސައިން ޝަމީމް 13 ދުވަހަށް ސަސްޕެންޑް ކުރުމަށް ފަހު، މިދިޔަ މަހުގެ 26 ވަނަ ދުވަހު އޭނާގެ ސަސްޕެންޝަން އުވާލާފައި ވަނިކޮށެވެ.
އަލީ ހުސައިން ސުޕްރީމް ކޯޓަށް ހާޒިރުވުމަށް އަންގާފައި ވާއިރު، އޭނާ ގެންދަވަނީ ތަކުރާރުކޮށް ރާއްޖޭގެ ޖުޑީޝަރީއަށް ފާޑުވިދާޅުވަމުންނެވެ. ހާއްސަކޮށް ޖިނާއީ އަދުލުގެ ނިޒާމުގެ ތެރެއިން އިންސާފު ނުލިބި ލަސްވަމުންދާތީ އޭނާ ގެންދަވަނީ އެކަމުގެ ކަންބޮޑުވުން މީޑިއާ މެދުވެރިކޮށް އާންމުންނަށް ހިއްސާ ކުރައްވަމުންނެވެ.
