އިންތިޚާބުގެ ފަހުން ރައީސް އަބްދުﷲ ޔާމީން ދައްކަވަނީ ވަަރަށް ހުތުރު މަންޒަރުތަކެއް ކަމަށް ޖުމްހޫރީ ޕާޓީގެ ނައިބު ލީޑަރު އަބުދުﷲ އަމީން ވިދާޅުވެއްޖެއެވެ.

އާދިއްތަ ދުވަހުގެ ރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ކުރިން ރައީސް އޮފީހުގެ މިނިސްޓަރަކަށް ހުންނެވި އަމީން ވިދާޅުވީ 23 ސެޕްޓެމްބަރުގައި ނެގި ވޯޓުން ރައްޔިތުން ރައީސް އަބުދުﷲ ޔާމީނަށް ނޫނެކޭ ބުނިފަހުންވެސް އެމަނިކުފާު ދައްކަވަމުން ގެންދަވަނީ ވަރަށް ހުތުރު މަންޒަރުތަކެއް ކަމަށެވެ.

ރާއްޖޭގެ ތާރީޚުގައި އިންތިޚާބުން ބަލިވުމުން މީގެ ކުރީގެ ރައީސުން ދެއްކެވީ ވަރަށް ރިވެތި ނަމޫނާއެއް ކަމަށާއި އެކަމަކު ރައީސް އަބުދުﷲ ޔާމީނަށް އެކަން ހަޖަމުވެވަޑައިނުގެން ނުވަތަ އެމަނިކުފާނަށް ގެއްލެން އޮތް އެއްޗެއްގެ ބޮޑުކަމުން ނަމަވެސް އެމަނިކުފާނުގެ ފުށުން ފެނިގެންދަނީ ކުރިއަށް އޮތް އެތަށް ދުވަހަކަށް ރައްޔިތުންވެސް ލަދުގަންނަންޖޭހޭ ފަދަ މަންޒަރުތަކެއް ކަމަށެވެ.

"ކުރީގެ ރައީސް މައުމޫނުވެސް 2008 ވަނަ އަހަރު އެމަނިކުފަނު ބަލި ގަބޫލުފުޅު ކުރެއްވީ ރީތި ގޮތުގައި، އަދި ކުރީގެ ރައީސް ނަޝީދު 2013 ވަނަ އަހަރު އިންތިޚާބުން ބަލިވެވަޑައިގަތުމުން ދެއްކެވީ ވަރަށް ރީތި މިސާލެއް. އަދި ބައްލަވާ ކާކުތޯ ހީކުރާނީ ރައީސް ޔަމީން ހުވާކުރައްވާ ދަރުބާރަށް އެމަނިކުފާނު [ރައީސް ނަޝީދު] ވަޑައިގަންނަވާނޭ. އެކަމަކު އެ ނަމޫނާވެސް ދެއްކެވިޔޭ" އަމީން ވިދާޅުވިއެެވެ.

އަމީން ވިދާޅުވި ގޮތުގައި ރައީސް އަބުދުﷲ ޔާމީން މިހާރު އެ އުޅުއްވަނީ، ފިއްލަވައިގެން ވަޑައިގެންނެވޭނެ ގޮތެއް އެނގިވަޑައިނުގެންނެވެ. އޭގެ އެއް ނިޝާނަކީ އަނބިކަނބަލުން ރާއްޖެ ދޫކުރައްވާ ވަޑައިގަތުންކަމަށާއި، އެކަމުން ދޭހަވަނީ ރައީސް އަބުދުﷲ ޔާމީން ދެން ސިޔާސީ މަސައްކަތްޕުޅު ކުރައްވަން ބޭނުންފުޅު ނުވާކަން ކަމަށް އަމީން ވިދާޅުވިއެވެ.

އަމީން ވިދާޅުވި ގޮތުގައި ރައީސް ޔަމީން ފިއްލަވައިގެން ފުރާވަޑައިގަންނަވަން ދިވެހި ރައްޔިތުން ފުރުސަތެއް ނުދޭނެ އެވެ. އެމަނިކުފާނުގެ ވެރިކަމުގެ މި ފަސް އަހަރު ހިންގާފައިވާ ވައްކަމާއި ކޮރަޕްޝަނާއި ފަސާދައަށް ޖަވާބުދާރީވެވަޑައިގަންނަވަން ޖެހޭ ކަމަށާއި ހިންގަވާފައިވާ ކަންކަަމުގެ ތަހުގީގު އެމަނިކުފާނުގެ މައްޗަށް ހިންގެން ޖެހޭނެ ކަމަށް އޭނާ ވިދާޅުވި އެވެ.