ހުޅުމާލޭން ގޯތި ދޫކުރުން ހުއްޓާލުމަށް އަންގައިފި
7 އޮކްޓޯބަރު 2018 | އާދީއްތަ 14:33ހުޅުމާލޭ ފޭސް 2 އިން ގޯތި ވިއްކަން ނިންމީ ކުރިން ވިއްކާފައިވާ އަގަށް ވުރެ މާބޮޑަށް ހެޔޮކޮށް
ހުޅުމާލޭ ފޭސް 2
ހުޅުމާލޭ ދެ ވަނަ ފޭސް އިން 400 ގޯތި ދޫކުރުން ހުއްޓާލުމަށް އެންޓި ކަރަޕްޝަން ކޮމިޝަން (އޭސީސީ) އިން ހައުސިން މިނިސްޓްރީ އަށް އަންގައިފި އެވެ.
ރައީސް އަބްދުﷲ ޔާމީންގެ ވެރިކަމުގެ ދައުރު ހަމަވުމަށް އެންމެ 41 ދުވަހަށް ވެފައިވާއިރު، ހުޅުމާލޭން 400 ގޯތި ދޫކުރަން ހައުސިން މިނިސްޓްރީން ނިންމި ނިންމުން ހުއްޓުވީ، އޭސީސީން ބުނި ގޮތުގައި އެ މަޝްރޫއުގައި ގާނޫނީ ގޮތުން ސުވާލު އުފެދޭ ކަންތައްތަކެއް ހުރުމަށާއި ކޮރަޕްޝަނަށް މަގުފަހިވާ ކަންތައްތަކެއް ހުރުމުންނެވެ.
ހުޅުމާލެ ފޭސް 2 އިން ގޯތި ދޫކުރާނެ ކަމަށް ހައުސިން މިނިސްޓްރީން އިއުލާނުކުރިތާ މަދު ގަޑިއިރުތަކެއްގެ ތެރޭގައި އޭސީސީން އެކަން ހުއްޓުވުމަށް އެ މިނިސްޓްރީއަށް އެންގީ، އެމްޑީޕީން ވެސް މައްސަލަ ހުށަހަޅައިފައި ވަނިކޮށެވެ.
ހައުސިން މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ މި މަޝްރޫއުގެ ދަށުން ދޫކުރާނީ 1000 އަކަފޫޓްގެ ގޯތި ކަމަށާއި، އަކަ ފޫޓެއް ވިއްކަނީ 400ރ. އަށް ކަމަށެވެ. މި ރޭޓުން ބަލާއިރު، ގޯއްޗެއްގެ ޖުމުލަ އަގަކީ 400،000 ރުފިޔާ ކަމަށެވެ.
އޭސީސީން މި މަޝްރޫއު ހުއްޓާލުމަށް އެންގިީ އާދީއްތަ ދުވަހު ހަވީރު 4:00 އިން ފެށިގެން ގޯއްޗަށް ފޯމް ދޫކުރަން ނިންމާފައިވާތީ، ގިނަ އަދަދެއްގެ ބަޔަކު ހައުސިން މިނިސްޓްރީ ދޮށުގައި ކިޔޫޖެހިފައި ވަނިކޮށެވެ.
ރައީސް އަބްދުﷲ ޔާމީނަށް ރިޔާސީ އިންތިޚާބުގައި ލިބިވަޑައިގެންނެވި ބޮޑު ނާކާމިޔާބު ގަބޫލުކުރައްވައި، ވެރިކަން ބަދަލުވުމުގެ މަރުހަލާ ކުރިއަށްދާއިރު، މި މަރުހަލާގައި ސަރުކާރުގެ ބައެއް އޮފީސްތަކުން އާ މަޝްރޫއުތަކާއި ބޮޑެތި ހަރަދުތައް ހިންގަމުންދާތީވެ، އެކަންކަން ހުއްޓާލުމަށާއި އާ މަޝްރޫއެއް ނުފެށުމަށް އިންތިޚާބީ ރައީސް އިބްރާހިމް މުހައްމަދު ސޯލިހް (އިބޫ)ގެ އޮފީހުން ވަނީ އެދިފަ އެވެ.
ހުޅުމާލެ ދެ ވަނަ ފޭހުން 400،000 ރުފިޔާ އަށް 400 ގޯތި ދޫކުރާއިރު، އެ ފޭހުގައި އެންމެ ފުރަތަމަ ގޯތި ދޫކޮށްފައި ވަނީ އަކަފޫޓެއް 3،000ރ އަށެވެ. އެ އަގުން ބަލާ ނަމަ 1،000 އަކަ ފޫޓެއްގެ ގޯއްޗެއްގެ އަގަކީ ތިން މިލިއަން ރުފިޔާވެ.
