ރާއްޖެ ޓީވީގެ އިންތިޚާބުގެ ކަވަރޭޖް ކާމިޔާބުވީ ރަން ފޮށްޓެއް ލައްގަން ދެން ނުތިބެ މަސައްކަތް ކުރުމުން: ސަލީމް
މިއީ ވަރަށް ވަރުގަދަ ޓީމަކުން ކުރި މަސައްކަތެއްގެ ނަތީޖާ
ރާއްޖެ ތީވީގެ އެމްޑީ އަހުމަދު ސަލީމް ރޭގެ ހަފްލާގައި ވާހަކަ ދައްކަވަނީ
ރާއްޖޭގައި މިދިޔަ މަހުގެ 23 ވަނަ ދުވަހު ބޭއްވި ރިޔާސީ އިންތިޚާބުގެ ރާއްޖެ ޓީވީގެ ކަވަރޭޖް ކާމިޔާބުވީ، އަދި ރައްޔިތުން ރާއްޖެ ޓީވީގެ މަސައްކަތް ބަލައިގަތީ، ރަން ފޮށްޓެއް ލައްގަން ދެން ނުތިބެ މަސައްކަތް ކުރިއަށް ގެންދިއުމުން ކަމަށް ރާއްޖެ ޓީވީގެ މެނޭޖިންގ ޑިރެކްޓަރ އަހުމަދު ސަލީމް ވިދާޅުވެއްޖެއެވެ.
މި އަހަރުގެ ރިޔާސީ އިންތިހާބުގެ ނަތީޖާ އާއި މައުލޫމާތު ރައްޔިތުންނާއި ހަމައަށް ގެނެސްދިނުމަށްޓަކައި ރާއްޖެޓީވީން ގެނެސްދިން ހާއްސަ ކަވަރޭޖްގައި ބައިވެރިވި ފަރާތްތަކުގެ މަސައްކަތް ފާހަގަކޮށް، އަގު ވަޒަން ކުރުމަށް ހޮނިހިރު ދުވަހުގޭ ރޭ ބޭއްވި ޙަފްލާގައި ވާހަކަ ދައްކަވަމުން އަހުމަދު ސަލީމް ވިދާޅުވީ ރާއްޖޭގެ ރައްޔިތުންނާއި މުޅި ދުނިޔެވެސް އެދޭ ވަރަށް ޚިދުމަތް ދެވިއްޖެ ކަމަށް ޤަބޫލު ކުރުމަކީ ވަރަށް ބޮޑު ކާމިޔާބެއް ކަމަށާއި މިކަން ކާމިޔާބު ވެއްޖެ ކަމަށް އެނގިގެން ދަނީ އެކަން ބުނަން ބޭނުން ނުވާ މީހުން އެކަން ޤަބޫލު ކުރުން ކަމަށެވެ.
ރާއްޖެ ޓީވީގެ އިންތިޚާބު ކަވަރކުރި ޓީމަށް އިޝާރާތް ކުރައްވާ ސަލީމް ވިދާޅުވީ އިންތިޚާބުގެ ނަތީޖާއާ ހަމައިން ރާއްޖެ ޓީވީގެ ޓީމު މޮޅުވެއްޖެކަން އެނގިއްޖެ ކަމަށާއި ނަމަވެސް އެ ވާހަކަ އަދި ނުދައްކާ ތިއްބާ މޮޅުވެއްޖެކަން އެނގިގެން ދަނީ މީގެ ދެ ދުވަހެއް ކުރިން މީޑިޔާގައި ދައުރުވާންފެށި ވާހަކަތަކުގެ ސަބަބުން ކަމަށެވެ.
"އެއީ މިފަހުގެ ތާރީޚެއްގައި އިންތިޚާބަށްފަހު އިންތިޚާބަކުން ބަލިވި މީހުން ހެދި އެންމެބޮޑު ތެދު. އެއީ ރާއްޖެ ޓީވީއަށޭ އެންމެ ފުރަތަމަ ނަތީޖާ ލިބުނީ. އެއީ ވަރަށްބޮޑު ތެދެއް. އެއްވެސް ޝައްކެއް އޮތް ކަމެއް ނޫން އެއީކީ" ސަލީމް ވިދާޅުވިއެވެ.
އިންތިޚާބުގެ މޮނިޓަރުންގެ ގޮތުގައި ރާއްޖެ ޓީވީއަށް މަސައްކަތްކޮށްދިން 400 މީހުންނާއި ޑޭޓާ އެންޓަރކުރި ކުދިންނާއި ރާއްޖެ ޓީވީގެ މެނޭޖްމަންޓަށް މިފަހަރުގެ އިންތިޚާބަކީ ލިބުނު ވަރަށް ބޮޑު ތަޖްރިބާއެއް ކަމަށާއި މި އިންތިޚާބު އެންމެ ފުރިހަމައަށް ރާއްޖެ ޓީވީއަށް ގެނެސްދެވުނު ސަބަބު ބަލާލަންޖެހޭ ކަމަށް ސަލީމް ވިދާޅުވި އެވެ.
"އެއްބަޔަކު ތިބީ ރަން ފޮށްޓެއް ލައްގަޅޭ މައިން މަގަށް ލައްގަޅޭ ކިޔަކިޔާ. އެފޮށި ލައްގާތޯ. ނަތީޖާ އަވަހަށް ރައްޔިތުންނާ ހަމައަށް ގެންނަން ނުކުންނަ ޓީމަކަށް ރަންފޮށްޓެއް ލައްގަން ދެން ނުތިބޭނެ. އެ ލެއްގި ފޮށި އެއީ ރަނގަޅުފޮށި. އެއީ އެއް ސަބަބު. ނަތީޖާ ގެނެސްދޭން ނުކުތް ޓީމެއް މި ޓީމަކީ. ކޮންމެހެން ވަކި ނަތީޖާއެއް ގެނެސްދޭން ނުކުތް ޓީމެއްނޫން މީކީ. އަނެއްކަމަކީ ދަނޑަށް މި ޓީމު އެރިއިރުވެސް މަޤްސަދެއް އޮތް އަމާޒެއް އޮތް. ރާއްޖެ ޓީވީން އިންތިޚާބު ކަވަރކުރަން ދަނޑަށް އެރި ޓީމުގައި އޮތް ގޯލެއް މަޤްސަދެއް އަޒުމެއް ލަނޑު ދަނޑިއެއް. އެކަމަށްޓަކައި ޕްރެކްޓިސް ކުރީ މެޗަށް އެއްދުވަހަށް ވީމައެއްވެސް ނޫން. މާކުރިން ރާއްޖެ ޓީވީގެ ޓީމު ތައްޔާރުވަމުންދިޔަ. ހަޤީގަތުގައި ތަައްޔާރުވާން ފެށީ އިންތިޚާބުގެ ހަ މަސް ދުވަސްކުރިން. ތައްޔާރުވަމުން ދިޔައީ ވަރަށް ބޮޑެތި ގޮންޖެހުންތަކާ އެކީގައި. އަދި ކުޅި ދައްކާލީމުސް ރަނގަޅު މާހައުލެއް އޮތްނަމަ" ރާއްޖެ ޓީވީއަށް ލިބުނު ކާމިޔާބީ ފާހަގަކުރައްވަމުން އެމްޑީ އަހުމަދު ސަލީމް ވިދާޅުވިއެވެ.
އިންތިޚާބުގެ ކަވަރޭޖަށް ތައްޔާރުވަމުން އައީ ވަރަށް ބޮޑު ގެންޖެހުމަކާއެކު ވަރަށް ބޮޑު ބިރުވެރިކަމަކާއެކުގައިކަން ފާހަގަ ކުރައްވަމުން ސަލީމް ވިދާޅުވީ އެންމެ ބޮޑަށް އުފާވަނީ އެބިރުވެރިކަމާއެކު މިކަން ކާމިޔާބު ކުރެވުމުން ކަމަށެވެ. އެމްޑީ ވަނީ ރާއްޖެ ޓީވީއަށް އެދަނޑިވަޅުގައި ކުރިމަތިވި ގޮންޖެހުންތަކާއި ބިރުވެރި ނާމާންކަން ކިޔައިދެއްވަން ދެކޮޅު ހައްދަވާފައެވެ.
ބޮޑެތި އެހެން ޓީވީ ސްޓޭޝަންތަކުން ފަލިޖަހަޖަހާ ތިއްބާ މިކަން ކާމިޔާބުކޮށް ނިންމާ ލެވުމަކީ ވަރަށްބޮޑު ޝަރަފެއް ކަމަށް ވިދާޅުވެފައެވެ.
އިންތިޚާބުގެ ޑޭޓާ ސެންޓަރު ހެދުމަށް ސައިރިކްސް ކޮލެޖުން ތަނެއް ހަމަޖައްސައި ދިނުމަކީ، ރާއްޖެ ޓީވީގެ އިންތިޚާބީ ކަވަރޭޖް ކާމިޔާބުވުމުގެ އެއް ސިއްރުކަމަށާއި އެހެންވެ، އެކަމަށް އެ ކޮލޮޖްގެ ޗެއާމަން އަހްމަދު ޝަރީފަށް، ސަލީމް ވަރަށް ބޮޑަށް ޝުކުރު އަދާކުރެއްވެވި އެވެ.
