ފުޓްބޯޅަ ޑިވެލޮޕްމަންޓް އޮފީސްތަކެއް ޤާއިމުކުރަނީ

ދިވެހި ފުޓްބޯޅަ ކުރިއެވުމަށްޓަކައި ފުޓްބޯޅައިގެ ޑިވެލޮޕްމަންޓް އޮފީސްތަކެއް ރާއްޖޭގެ އެކި ކަންކޮޅުތަކުގައި ޤާއިމުކުރުމަށް އެފްއޭއެމް އިން ނިންމައިފިއެވެ.

އެފްއޭއެމް އިން އިއުލާންކޮށްފައިވާ ގޮތުގައި ކުރިއަށް އޮތް ތިން މަސް ދުވަހުގެ ތެރޭގައި ރާއްޖޭގެ އަށް ސަރަހައްދެއްގައި ފުޓްބޯޅައިގެ ޑިވެލޮޕްމަންޓް އޮފީސްތަކެއް ގާއިމް ކުރާނެއެވެ.

އެގޮތުން ހދ. ކުޅުދުއްފުށި، ނ. ކެނދިކުޅުދޫ، ބ. އޭފަފުށި، އދ. މަހިބަދޫ، ދ. ކުޑަހުވަދޫ، ލ. ފޮނަދޫ، ގދ. ތިނަދޫ އަދި ފުވައްމުލަކުގައެވެ.

ސ. ހިތަދޫގައި ކުރީއްސުރެ ކުރިއަށްގެންދާ ވައިޑީޕީ އާއި އެހެނިހެން ޑިވެލޮޕްމަންޓް މަސައްކަތް ވަކި ކުރިއަށް ގެންދާނެއެވެ.

އެފްއޭއެމްގެ ޓެކްނިކަލް ޑިރެކްޓަރު އިހުސާން އަބްދުލްގަނީ (ސާންތީ) ވިދާޅުވީ މިއީ ފީފާ ޕްރޮޖެކްޓެއްގެ ދަށުން ކުރިއަށްގެންދާ މަސައްކަތެއް ކަމަށެވެ.

އެފްއޭއެމްގެ އަމާޒު ހުރީ އަށް ސަރަހައްދުގައި ވެސް ގްރާސްރޫޓުން ފެށިގެން އިންޓަ ސްކޫލް ލެވެލްގެ ފުޓްބޯޅައިގެ ތަމްރީންތަކާއި މުބާރާތްތައް އެ އޮފީހުގެ ބެލުމުގެ ދަށުން ކުރިއަށްގެންދިޔުމަށެވެ.

ޑިވެލޮޕްމެންޓް އޮފީސްތައް ގާއިމްކުރުމަށް ފަހު އެ ކޮންމެ ސަރަހައްދަކަށް ހަ ކޯޗުން ހަމަ ޖެއްސުމަށް ވެސް އެފްއޭއެމް އިން ވަނީ ނިންމާފައެވެ. އަދި އެކަންކަން ކުރިއަށް ގެންދާނީ ޑިވެލޮޕްމަންޓް އޮފިސަރެއްގެ ބަލުމުގެ ދަށުންނެވެ.

އަތޮޅު ފުޓްބޯޅަ ނަމުގައި ކުރިއަށްގެންދާ މި ޕްރޮޖެކްޓާ އެކު، މާލެ އަށް ފުޓްބޯޅަ ބަރޯސާވެފައިވާވުން ކުޑަވެގެންދާނެއެވެ.

ޔޫތު ޑިވެލޮޕްމަންޓާއި ސްކޫލުތަކުގެ މުބާރާތްތަކާއި އެކު އެ ސަރަހައްދުތަކުގައި ތިބި ހުނަރުވެރި ކުޅުންތެރިން ތަރައްގީކުރުމުގެ މަސައްކަތުގައި ވަރަށް ބޮޑު ކުރިއެރުމެއް ލިބޭނެ ކަމަށް ސާންތި ވިދާޅުވިއެވެ.

ސާންތީ ވިދާޅުވީ ސާފް ސުޒުކީ ކަޕް ކާމިޔާބުކުރި ގައުމީ ޓީމުގެ 98 ޕަސެންޓް ނިސްބަތްވަނީ އަތޮޅުތެރެއަށް ކަމަށާއި އޭގެން ވެސް އެގެނީ އަތޮޅުތަކުގައި ފުޓްބޯޅައިގެ ހުނަރު އޮތް މިންވަރު ކަމަށެވެ.