ޕީޕީއެމް އޮފީސް ކުރިމައްޗަކީ އިންސާފުގެ މައިދާން ކަމަށް ބުނެފި
5 އޮކްޓޯބަރު 2018 | ހުކުރު 09:29އެކަން އިއުލާން ކުރެއްވީ ސްޕޯކްސްޕާސަން މުއާޒު
ޕީޕީއެމް އޮފީސް ކުރިމަތީގައި ބުރާސްފަތި ދުވަހުގެ ރޭ ކުރި މުޒާހަރާގައި މުއާޒު ވާހަކަ ދައްކަވަނީ
ރިޔާސީ އިންތިހާބުގެ ވޯޓު އޮޅުވާލި ކަމަށް ބުނެ، އިލެކްޝަންސް ކޮމިޝަނާ ދެކޮޅަށް މުޒާހަރާ ކުރާ ޕީޕީއެމް އޮފީސް ކުރިމައްޗަކީ އިންސާފުގެ މައިދާން ކަމަށް ބުނެފިއެވެ.
އެތަނަކީ އިންސާފުގެ މައިދާން ކަމަށް ބުނެ، އަޑު އުފުލާފައި ވަނީ އިލެކްޝަންސް ކޮމިޝަން (އީސީ)އާ ދެކޮޅަށް ޕީޕީއެމުން ފަށާފައިވާ ސިލްސިލާ މުޒާހަރާތަކުގެ ތެރެއިން ހަތަރު ވަނަ ދުވަހުގެ ރޭ ބޭއްވި އެއްވުމުގައެވެ. ރިޔާސީ އިންތިހާބުގެ ނަތީޖާއާ ދެކޮޅަށް ޕީޕީއެމުން ފެށި މަސައްކަތުގައި އިންސާފު ހޯދާނެ ތަނަކީ ޕީޕީއެމް އޮފީސް ކުރިމަތި ކަމަށް ބުނެ އިއުލާން ކުރެއްވީ ރައީސް އޮފީހުގެ ސްޕޯކްސްޕާސަން އިބްރާހިމް މުއާޒު އަލީ (މުއާ) އެވެ.
މާލޭގައި މުޒާހަރާ ކުރުން މަނާކޮށް، ހިޔާލުފާޅު ކުރުން ހުއްޓުވުމަށް ބާރު އަޅައި، ގާނޫނުތައް ބަދަލުކުރި ޕީޕީއެމުން ރޭ ކުރި މުޒާހަރާގައި އިލެކްޝަންސް ކޮމިޝަންގެ ރައީސް އަހުމަދު ޝަރީފުގެ ބޮލުގައި އިލްޒާމްތަކެއް އަޅުވާފައި ވެއެވެ. އަދި ޝަރީފަށް އަމާޒުކޮށް މުޒާހަރާގައި އަޑުއުފުލި ބައެއް މީހުން ވަނީ ބޭއަދަބީ ބަސްތަކެއް ރައްދު ކޮށްފައެވެ.
ރައީސް ޔާމީންގެ ކެމްޕެއިން ޓީޝާޓް ތުރުކުރައްވައިގެން، ކެމްޕޭނުގައި އުޅުއްވަނިކޮށް އިލެކްޝަންސް ކޮމިޝަނަށް އައްޔަންކުރެއްވި ޝަރީފާ ދެކޮޅަށް ޕީޕީއެމުން ނުކުތުމަށް ގިނަ ބަޔަކު ދަނީ ފާޑުކިޔުން އަމާޒު ކުރަމުންނެވެ. ސަބަބަކީ ސިޔާސީ ހަރަކާތްތަކުގައި ޝަރީފު ފާޅުކަން ބޮޑު ގޮތެއްގައި އުޅުއްވަނިކޮށް، އޭނާ އިލެކްޝަންސް ކޮމިޝަނަށް އައްޔަން ނުކުރުމަށް އެތައް ބަޔަކު އެދެމުންދަނިކޮށް ހަމައެކަނި ޕީޕީއެމްގެ މަޖިލިސް މެމްބަރުން ވޯޓު ދީގެން އޭނާ އެ މަގާމަށް އައްޔަން ކުރުމުންނެވެ. ޝަރީފު އެ މަގާމަށް އައްޔަން ކުރަން މަޖިލީހުން ރުހުން ދީފައި ވަނީ މިއަހަރުގެ މާޗު މަހުގެ 6 ވަނަ ދުވަހު ބޭއްވި މަޖިލީހުގެ ޖަލްސާގައި ބައިވެރިވެވަޑައިގެންނެވި 33 މެމްބަރުންގެ އަގުލަބިއްޔަތުންނެވެ. ހަމަ އެ ދުވަހު ރައީސް ޔާމީން ވަނީ އޭނާއަށް މަގާމުގެ ފަތްކޮޅު އަރުވާފައެވެ. ފަތްކޮޅު އެރުވިތާ ކުޑައިރުކޮޅެއްގެ ތެރޭގައި ބޭއްވި ބައްދަލުވުމެއްގައި އެ ކޮމިޝަންގެ ރައީސް ކަމަށް އޭނާ ވަނީ ކަނޑައަޅާފައެވެ.
ރިޔާސީ އިންތިހާބުގެ ނަތީޖާއާ މެދު ސުވާލު އުފައްދައި ޕީޕީއެމުން މުޒާހަރާ ކުރަން ފަށާފައި ވަނީ އިންތިހާބުގެ ނާކާމިޔާބީ ރައީސް ޔާމީން އިއުލާން ކުރެއްވިތާ ހަތް ވަނައަށް ވީ ދުވަހުއެވެ. އިންތިހާބު އޮޅުވާލި ކަމަށް ބުނެ ދައްކަމުންދާ ވާހަކަތާ ގުޅިގެން، އެ ކޮމިޝަން ޖަވާބުދާރީ ކުރުވުމަށް ސަރުކާރުގެ ތެރެއިން ވެސް، އަދި މަޖިލީހުގެ ތެރެއިން ވެސް އެކަން ކުރުމުގެ ބާރު އޮވެ، ސަރުކާރުން އެކަން ނުކުރާ ސަބަބެއް ސާފެއް ނުވެއެވެ.
