އިބޫ ހުވާކުރުމުގެ ރަސްމިއްޔާތުގައި ވީހާވެސް ގިނަ ރައްޔިތުންނަށް ބައިވެރިވެވޭ ގޮތަށް ބާއްވަނީ
1 އޮކްޓޯބަރު 2018 | ހޯމަ 13:10އިބޫ ބޭނުންފުޅުވެ ވަޑައިގަންނަވަނީ ހުވާ ކުރެއްވުމުގެ ރަސްމިއްޔާތުގައި ވީހާވެސް ގިނަ ރައްޔިތުން ބައިވެރިވެވޭގޮތަށް އިންތިޒާމުތައް ހަމަޖައްސަން
އިންތިހާބީ ރައީސް އިބްރާހީމް މުހައްމަދު ސޯލިހު (އިބޫ)
އިންތިހާބީ ރައީސް އިބްރާހިމް މުހައްމަދު ސޯލިހު (އިބޫ) ރައީސުލްޖުމްހޫރިއްޔާގެ މަގާމުގެ ހުވާ ކުރެއްވުމުގެ ރަސްމިއްޔާތު ވީހާވެސް ގިނަ ރައްޔިތުންނަށް ބައިވެރިވެވޭގޮތަށް ބޭއްވުމުގެ އިންތިޒާމު ހަމަޖެއްސުމުގެ މަސައްކަތް ކުރަމުންދާ ކަމަށް ބުނެފި އެވެ.
އިންތިހާބީ ރައީސް އިބްރާހީމް މުހައްމަދު ސޯލިހުގެ އޮފީހުގައި އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި އިބޫގެ ތަރުޖަމާނު މާރިޔާ އަހުމަދު ދީދީ ވިދާޅުވީ ހުވާ ކުރެއްވުމުގެ ރަސްމިއްޔާތު އާންމުކޮށް ހުޅުވާލައިގެން ބޭއްވުމަށް ނިންމާފައި ވަނީ އިބޫ އެ ގޮތަށް އެދިވަޑައިގަތުމުން ކަމަށެވެ.
"ބޭނުމަކީ ވީހާވެސް ގިނަ ރައްޔިތުންނަށް ބައިވެރިވެވޭނެ ގޮތަށް ހުވާ ކުރެއްވުމުގެ ރަސްމިއްޔާތު އިންތިޒާމު ކުރުން،" މާރިއާ ވިދާޅުވި އެވެ.
މާރިއާ ވިދާޅުވީ "އިނޯގްރޭޝަން ކޮމެޓީ" ނަމުގައި ކޮމެޓީއެއް އުފައްދަވައި، ހުވާކުރުމުގެ ރަސްމިއްޔާތުގައި ވީހާވެސް ގިނަ ރައްޔިތުންނަށް ބައިވެރިވެވޭގޮތަށް އިންތިޒާމުތައް ހަމަޖެއްސުމުގެ މަސައްކަތް އެކޮމެޓީން ކުރަމުންދާ ކަމަށެވެ.
މީގެއިތުރުން މާރިއާ ވިދާޅުވީ ވެރިކަން ބަދަލުކުރުމުގެ މަރުހަލާގައި އިންތިހާބީ ރައީސް އިބްރާހީމް މުހައްމަދު ސޯލިހުގެ ފަރާތުން ޑައިރެކްޓަރ ޖެނަރަލް އޮފް ޓްރާންސިޝަން މަގާމަށް ހ. ސީވީޑް އަހުމަދު ލަތީފް އައްޔަން ކުރައްވާފައިވާ ކަމަށެވެ. ނަމަވެސް އަހުމަދު ލަތީފް މަސައްކަތް ކުރާނެ އޮފީހެއް އަދި ސަރުކާރުން ނުދައްކާ ކަމަށް ވެސް މާރިއާ ވިދާޅުވި އެވެ.
މާރިޔާ ވިދާޅުވީ ލަތީފަށް މަސައްކަތް ކުރައްވާނެ އޮފީހެއް ދެއްކުމަކީ ސަރުކާރުގެ ޒިންމާއެއް ކަމަށާއި، އެކަން ވީހާ އަވަހަކަށް ކޮށްދެއްވުން އެދިވަޑައިގަންނަވާ ކަމަށެވެ. ސިވިލް ސާވިސް ކޮމިޝަނުން ޑިރެކްޓަރ ޖެނެރަލް އޮފް ޓްރާންސިޝަންގެ މަގާމަށް ލަތީފް އަންޔަން ކޮށްފައި ވަނީ އަންގާރަ ދުވަހު އެވެ. އެމްޑީޕީގެ ޗެއާރޕާސަން ހަސަން ލަތީފުގެ ބޭބޭފުޅު އަހްމަދު ލަތީފަކީ ރައީސް މުހައްމަދު ނަޝީދުގެ ދައުރުގައި ރާއްޖޭގެ ފަރާތުން ޗައިނާއަށް ކަނޑައަޅާފައި ހުންނަވާ ސަފީރުކަމުގެ މަގާމުވެސް ފުރުއްވި ބޭފުޅެކެވެ. މީގެއިތުރުން އަހްމަދު ލަތީފަކީ އޮލިމްޕިކް ކޮމެޓީގެ ނައިބް ރައީސްގެ މަގާމްވެސް ފުރުއްވަމުން ގެންދަވާ ރާއްޖޭގެ މަޝްހޫރު ޓޭބަލް ޓެނިސް ކުޅުންތެރިއެކެވެ.
