ޕާކިސްތާނުގެ ބޮޑު ވަޒީރު އިމްރާން ހާން ދިވެހިރާއްޖޭގެ އިންތިހާބީ ރައީސް އިބްރާހިމް މުހައްމަދު ސޯލިހް، އިބޫ އިންތިހާބުގައި ހޯއްދެވި ކާމިޔާބީއަށް މަރުހަބާ ދަންނަވައިފި އެވެ.
އިބޫގެ ތަރުޖަމާނު މާރިޔާ އަހުމަދު ދީދީ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވީ، މިއަދުގެ ވަގުތެއްގައި ޕާކިސްތާނުގެ ބޯޑު ވަޒީރު އިމްރާން ހާން ގުޅުއްވައި މަރުހަބާ ވިދާޅުވި ކަމަށެވެ. އަދި ވެރިކަން ބަދަލުވުމުގެ މަރުހަލާ އޮމާންކަމާއި އަމާންކަމާ އެކީގައި ކުރިއަށް ގެންދިއުމަށާއި އެކަން އޮމާން ކަމާއެކު ކުރިއަށް ގެންދަވާނެ ކަމުގެ އުންމީދުގައި ތިއްބެވި ކަމަށް އިމްރާން ވިދާޅުވެފައިވާ ކަމަށް ވެސް މާރިޔާ ވިދާޅުވި އެވެ.
ރާއްޖެ އާއި ޕާކިސްތާނުގެ ގުޅުން ކުރިއެކޭވެސް އެއް ގޮތަށް އޮންނާނެ ކަމަށާއި އެގުޅުން އިތުރަށް ބަަދަހި ކުރުމަށްވެސް އިމްރާން އެދިވަޑައިގެންފައިވާ ކަމަށްވެސް މާރިޔާ ވިދާޅުވި އެވެ.
ޕާކިސްތާނުގެ ބޮޑު ވަޒީރު އިބޫ އަށް ގުޅުއްވައި މަރުހަބާ ދަންނަވާފައި ވާއިރު، އާދިއްތަ ދުވަހު ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒު އަލް ސައުދު ވެސް ވަނީ އިބޫ އަށް ގުޅުއްވައި މަރުހަބާ ދަންނަވާފަ އެވެ.
މީގެ އިތުރުން އިންޑިއާގެ ބޮޑުވަޒީރު ނަރޭންދުރަ މޯދީ ވެސް ވަނީ ފޯނުން ގުޅުއްވައި އިބޫ އަށް މަރުހަބާ ދަންނަވާފަ އެވެ. މޯދީ ވަނީ އިބޫއަށް ބައްދަލުކުރުމަށް ދައުވަތު ވެސް ދެއްވާފަ އެވެ. އެ ދައުވަތު ވަނީ އިބޫ ގަބޫލު ކުރައްވާފަ އެވެ. އަދި އިބޫ ވަނީ ހުވާ ކުރުމުގެ ރަސްމިއްޔާތަށް މޯދީއަށް ވެސް ދައުވަތު ދެއްވާފަ އެވެ.
ޕާކިސްތާނުގެ ބޮޑު ވަޒީރު އިމްރާން ހާން އަކީ އިބޫ އެންމެ ބައްދަލުކޮށްލާ ހިއްޕުޅުވާ އެއް ސިޔާސީ ލީޑަރެވެ.
