ސިޔާސީ ލީޑަރުން ކަފާލާތުގެ ދަށުން މިނިވަން ކުރުމުން ޕީޕީއެމް އާއި އެ ޕާޓީގެ ޕީޖީ ލީޑަރު އަހުމަދު ނިހާން ހުސެއިން މަނިކު ކަންބޮޑުވެއްޖެއެވެ.
ކުރީގެ ރައީސް މައުމޫނާއި، ދިއްގަރު ދާއިރާގެ މެންބަރު އަހުމަދު ފާރިސް މައުމޫނާއި އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް އާދިއްތަ ދުވަހު ކަފާލާތުގެ ދަށުން މިނިވަންކުރުމާއި އެކު، ކުއްލި ގޮތަކަށް ޕީޕީއެމުން ބޭއްވި ޕްެރެސް ކޮންފަރެންސެއްގައި ނިހާން ވިދާޅުވީ، ވަރަށް ނިކަމެތި އާއިލާގެ ކުދިން ނިކަމެތި ހާލުގައި ޖަލުގައި އެބަތިބިކަމަށެވެ.
"ކަފާލާތުގެ ދަށުން. އަދި އެމްޑީޕީގައި އޮންނަ ލޯތްބާއި އިންސާފުގެ ދަށުން އެކުދިންނަށް ވެސް ކޮންމެވެސް މިންވަރެއްގެ ފައިސާއެއް ދައްކައިދީ ދޫކޮށްލައި ދިނުމަށް އަޅުގަނޑު ވަރަށް ބޮޑަށް އެދެން. އެކުދިން ތިބީ ވަރަށްވެސް ނިކަމެތި ހާލުގައި ނިދަނީ ސިމެންތި އަށިތަކުގައި," ނިހާން ވިދާޅުވިއެވެ.
ނިހާން ވިދާޅުވީ، ލާރިހުރި، ބާރުހުރި ބޭފުޅުން ބޮޑެތި އަދަދުތަކުން ކަފާލާތު ދެއްކުމަށްފަހު މިނިވަންވާއިރު ނިކަމެތި ކުދިންގެ އާއިލާތަކުންނާއި އަނބިދަރިންވެސް އެދެނީ އާއިލާގެ ކައިރީގައި ވަގުތު ހޭދަކޮށްލުމަށް ކަމަށެވެ.
ނިހާން މިހެން ވިދާޅުވިއިރު، ކަފާލާތުގެ ދަށުން ވިޔަސް އަދި ކޯޓްތަކުން ވިޔަސް މިއަދު މިނިވަންކުރި ބޭފުޅުންނަކީ އެބޭފުޅުންގެ ތަހުގީގުތަކުން ފެށިގެންގޮސް ޝަރީއަތްތައް ހިންގުމާއި ހަމައަށް އިޖުރާއަތުތަކާއި ޚިލާފަށް ޝަރީއަތްކޮށް ހުކުމްކޮށްފައި ތިއްބެވި ބޭފުޅުންކަމަށް އިދިކޮޅު ފަރާތްތަކާއި ބޭރުގެ ފާރާތްތަކާއި އެބޭބޭފުޅުންގެ ގާނޫނީ ވަކީލުން އޭރުވެސް ވިދާޅުވަމުންގެންދެވި ބޭފުޅުންނެވެ.
ޖަލުތަކުގައި ބަންދުކޮށްފައި ތިއްބާ އެތަށް ބަޔަކު ގޮތްނޭނގޭގޮތަށް މި ވެރިކަމުގެ ތެރޭގައި މަރުވެފައިވެސް އެބަހުއްޓެވެ. އަދި މޭޑޭ މުޒާހަރާއާއި ގުޅިގެން ޖަލު ހުކުމް ތަންފީޒު ކުރަމުންދަނިކޮށް ކުއްލި ގޮތަކަށް މަރުވި އަބުދުﷲ ރަޝީދު މަރުވީ އެކަށީގެންވާ ފަރުވާ ނުލިބިގެންކަން އާއިލާއިން ވަނީ ތުހުމަތުކޮށްފައެވެ.
ނިހާން މިހެން ވިދާޅުވި އިރު ރިޔާސީ އިންތިޚާބާއި ދިމާކޮށް ޖަލުތަކުގައި ތިބި ނުރައްކާތެރި އެތަށް ކުއްވެރިންނެއް ވަނީ މިނިވަންކޮށްފައެވެ.
