ކަފާލާތުގެ ދަށުން މައުމޫނާއި ފާރިސް ދޫކޮށްލުމާ މެދު މިއަދު ގޮތެއް ނިންމަނީ
30 ސެޕްޓެމްބަރު 2018 | އާދީއްތަ 16:31ރައީސް މައުމޫނު ހައި ކޯޓަށް ހާޒިރުކުރާނެ ކަމަށް މައުލޫމާތު ލިބިފައިވޭ
ރައީސް މައުމޫނު އެމަނިކުފާނުގެ ދަރިކަލުންނާއެކު:- ފާރިސް އާއި މައުމޫނުގެ ބަންދާމެދު މިއަދު ގޮތެއް ނިންމާނެ
ކަފާލާތުގެ ދަށުން ކުރީގެ ރައީސް މައުމޫން އަބްދުލް ގައްޔޫމް އާއި އަހްމަދު ފާރިސް މައުމޫނު ދޫކޮށްލުމާ މެދު ހައި ކޯޓުން ގޮތެއް ނިންމާނެ ކަމަށް އެ ކޯޓުން ބުނެފި އެވެ.
ރައީސް މައުމޫނާއި ފާރިސްގެ މައްޗަށް ކްރިމިނަލް ކޯޓުން އިއްވާފައިވާ ޖަލު ހުކުމް ބާތިލް ކޮށްދޭން އެދި ހައި ކޯޓަށް ވަނީ މައްސަލަ ހުށައަޅާފަ އެވެ. އިސްތިއުނާފުގެ މައްސަލަ ނިމެންދެން ހުކުމް ތަންފީޒް ކުރަމުން ނުދާ ގޮތަށް ދޫކޮށްލުމަށް އެދި އެ ދެ ބޭފުޅުން ވެސް ހުށައެޅި އެވެ.
ސަރުކާރު ހިންގާ ޕާޓީ ޕީޕީއެމްގެ ހުއްދަ ހޯދުމެއް ނެތި އެ ޕާޓީގެ ލޯގޯ އާއި ދިދަ ބޭނުންކުރިކަން ސާބިތުވާ ކަމަށް ކަނޑައަޅައި ފާރިސް އަށް އިއްވާފައި ވަނީ ހަތަރު މަހާ 24 ދުވަހުގެ ޖަލު ހުކުމެކެވެ. އަދި އެ މައްސަލައިގެ އިސްތިއުނާފުގެ އަޑުއެހުމެއް ވަނީ ހައި ކޯޓުން ބާއްވާފަ އެވެ.
މައުމޫނު ޖަލަށް ލުމަށް ކްރިމިނަލް ކޯޓުން ހުކުމް ކުރީ ފުލުހުންގެ އެދުމަށް ފޯނެއް ނުދިން ކަމަށް ބުނެ އެވެ. އެ މަނިކުފާނުގެ މައްޗަށް ހުކުމްކޮށްފައި ވަނި އެއް އަހަރާއި ހަ މަހާއި ހަތް ދުވަހަށެވެ.
ފާރިސް މިހާރު ވެސް އިންނެވީ ހައި ކޯޓުގަ އެވެ. އަދި މިއަދުގެ ވަގުތެއްގައި ރައީސް މައުމޫނު ހައި ކޯޓަށް ހާޒިރުކުރާނެ ކަމަށް ވަނީ މައުލޫމާތު ލިބިފައި އެވެ.
