ރައްޔިތުން ބަސްބުނެފި. ދެން ޤާނޫނާ ޚިލާފަކަށް ކަމެއް ނުކުރެވޭނެ:ތަރުޖަމާން
26 ސެޕްޓެމްބަރު 2018 | ބުދަ 12:15ގުޅިފައިވާ އިއްތިހާދާއެކު ބާރުތައް ބަދަލު ކުރުމުގެ މަސައްކަތް ވަރަށް ބާރަށް އަންނަނީ ކުރަމުން
މާރިޔާ މިއަދު ޕްރެސް ދެއްވަނީ
މިމަހުގެ 23 ވަނަ ދުވަހު ރައްޔިތުން އެމީހުންގެ ބަސް ބުނެފި ކަމަށާއި އޭގެ ފަހުން ޤާނޫންއާ ޚިލާފަށް އެއްވެސް ކަމެއް ނުކުރެވޭނެ ކަމަށް އިންތިޚާބީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހްގެ ތަރުޖަމާން މާރިޔާ އަހުމަދު ދީދީ ވިދާޅުވެއްޖެއެވެ.
ގުޅިފައިވާ ޕާޓީތަކުން ބާއްވާ ސިލްސިލާ ޕްރެސް ކޮންފަރެންސްގައި ވާހަކަ ދައްކަވަމުން މާރިޔާ ވިދާޅުވީ 23 ސެޕްޓެމްބަރުގައި ވޯޓުލައިގެން ރައްޔިތުން އެމީހުންގެ ބަސް ބުނެފި ކަމަށާއި އަންނަ 5 އަހަރު ރައީސް ޔާމީން ވެރިކަމުގައި ހުންނަން ބޭނުން ނުވާކަމަށް ރައްޔިތުން ބުނެފައިވާ ކަމަށެވެ. އަދި އެމީހުން އިޚްތިޔާރު ކުރީ ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް ކަމަށްވެސް މާރިޔާ ވިދާޅުވިއެވެ.
ޤާނޫން ހަދާ މަޖިލީހުގެ މެމްބަރުކަން ވެސް ކުރައްވާ ޤާނޫނީ ވަކީލް މާރިޔާ އަހުމަދު ދީދީ ވިދާޅުވީ ރައްޔިތުންގެ ބަސްބުނީމާ ދެން އިތުރު ކަންކަން ކުރުމުގެ ޤާނޫނީ ހައިސިއްޔަތު މިސަރުކާރަށް ވަނީ ގެއްލިފައި ކަމަށެވެ.
އެކިއެކި އޮފީސްތަކުން ލިޔުންތައް ނައްތާލުމާއި މީހުންގެ މުސާރަތައް ބޮޑުކޮށް ގޯތިދިނުންފަދަ ކަންކަން ކުރަމުންދާކަމަށް ދެކެވޭ ވާހަކައަށް އިޝާރާތް ކުރައްވާ މާރިޔާ ވިދާޅުވީ އެފަދަ ކަންކަމުގެ މައުލޫމާތު އެކިއެކި ފަރާތްތަކުން ހިއްސާ ކުރަމުންދާ ކަމަށެވެ. އަދި އެފަދަ ޣައިރު ޤާނޫނީ ކަންކަން ނުކުރެއްވުމަށް އިލްތިމާސް ކުރައްވާކަމަށްވެސް މާރިޔާ ވިދާޅުވިއެވެ.
މީގެ އިތުރުން މިއަދުގެ ނޫސްވެރިންގެ ބައްދަލުވުމުގައި މާރިޔާ ވިދާޅުވީ ގުޅިފައިވާ އިއްތިހާދާއެކު ބާރުތައް ބަދަލު ކުރުމުގެ މަސައްކަތް ވަރަށް ބާރަށް ކުރަމުން އަންނަ ކަމަށެވެ. އަދި ރިޔާސީ އިންތިހާބުގެ ދާއިމީ ނަތީޖާ އިއުލާން ކުރުމުން ވެރިކަމުގެ ބާރުތައް ބަދަލު ކުރުމާ ގުޅޭ ގާނޫނުގައިވާ ގޮތުގެ މަތިން އިންތިހާބީ ރައީސްގެ ފަރާތްޕުޅުން ޑައިރެކްޓާ ޖެނެރަލް އޮފް ޓްރާންޒިޝަން އައްޔަން ކުރައްވާނެ ކަމަށް ވެސް މާރިޔާ ވަނީ ވިދާޅުވެފަ އެވެ.
މާރިޔާ ވިދާޅުވީ މިމަރުހަލާ ކުރިއަށްދާއިރު ކުރެވޭ ޤާނޫނާ ޚިލާފް މުއާމަލާތްތައް ބައްލަވާނެ ކަމަށާއި އެފަދަ ކަންކަން މިވަގުތު ކުރިނަމަވެސް ސައްޙަ ނުވާނެ ކަމަށެވެ. އަދި އެފަދަ ކަންކަން ނުކުރުމަށް އިންތިޚާބީ ރައީސް އިބްރާހީމް މުހައްމަދު ސޯލިހް ނަސޭހަތްތެރިވެވަޑައިގަންނަވާކަމަށްވެސް މާރިޔާ ވިދާޅުވިއެވެ.
މާރިޔާ ވަނީ ބޭރުގެ އެކިއެކި ފަރާތްތަކުންވެސް އިންތިޚާބީ ރައީސާ ގުޅުއްވާ ރާއްޖެއަށް އެހީތެރިވުމަށް ތައްޔާރަށް ތިއްބެވިކަމަށް ވިދާޅުވާ ވިދާޅުވުން ތަކުރާރު ކުރައްވާފައެވެ. އަދި އޭގެތެރޭގައި ސައޫދީ ޢަރަބިއްޔާ ހިމެނޭކަން މާރިޔާ ފާހަގަ ކުރެއްވިއެވެ.
