ސްރީލަންކަން އެއާލައިންސް ކާގޯ އާއި ޑީޓީޑީސީ އެކްސްޕްރެސް ގުޅިގެން ރާއްޖޭގެ ދެކުނުގެ އަތޮޅުތަކަށް އެކްސްޕްރެސް ޑެލިވަރީގެ ހިދުމަތް ފަށައިފިއެވެ.
އައްޑޫ ސިޓީ އާއި ފުވައްމުލަކު ސިޓީގެ އިތުރުން ހުވަދޫ އަތޮޅަށް އަމާޒުކޮށްގެން ސްރީލަންކަން އިން ފެށި ހިދުމަތުގެ ދަށުން ޕާރުސަލްތަކާއި ލިޔެކިޔުންތައް އެއް ތަނުން އަނެއް ތަނަށް ފޮނުވޭނެއެވެ.
މި ހިދުމަތް މެދުވެރިކޮށް ދުނިޔޭގެ ކޮންމެ ތަނަކަށް ވެސް ބޭނުން އެއްޗެއް ފޮނުވޭއިރު އެއް ދުވަސް ތެރޭގައި ސްރީލަންކާގެ ކޮލޮމްބޯ އަށް ޕާރުސަލް ފޮނުވޭނެ ކަމަށް ސްރީލަންކަން އެއަރލައިންސް އިން ވަނީ ބުނެފައެވެ.
ސްރީލަންކަން އެއަރލައިންސް މެދުވެރިކޮށް ޑީޓީޑީސީ އިން ފޯރުކޮށްދޭ މި ޚިދުމަތުގެ ތެރެއިން ފޮނުވާ ޕާރުސަލްތައް އޮންލައިންކޮށް ޓްރެކް ކުރެވޭނެއެވެ. އަދި ބޭނުން ނަމަ ޕާރުސަލް ބަލައި ގެއަށް ގޮސް، ބޭނުން ތަނަކަށް ޕާރުސަލް ފޯރުކޮށްދިނުމުގެ ހިދުމަތް ވެސް ޑީޓީޑީސީން ދެއެވެ.
މީގެ އިތުރުން ފޮނުވާ ހުރިހާ ޕާރުސަލެއް ވެސް ޑެލިވަރީ ކުރެވެންދެން ވަރަށް ގާތުން މޮނީޓާ ކުރާނެ ކަމަށާއި މި ހިދުމަތަށް ދިވެހި ރުފިޔާ އިން ވެސް ފައިސާ ދެއްކޭނެ ކަމަށް ޑީޓީޑީސީން މައުލޫމާތުދެއެވެ.
ޑީޓީޑީސީއަކީ އިންޑިއާގެ އެންމެ ބޮޑު އެކްސްޕްރެސް ޑެލިވަރީ ސަރވިސް ދޭ ކުންފުންޏެވެ.
