ޓިކެޓް ހިލޭ ދޭ ޕްރޮމޯޝަނެއް ނުހިންގަން: ސްރީލަންކަން

ސްރީ ލަންކަން އެއަރލައިނުން ހިލޭ ޓިކެޓް ދޭ ޕްރޮމޯޝަނެއް ހިންގަމުންދާ ކަމަށް ބުނެ ސޯޝަލް މީޑިއާ މެދުވެރިކޮށް ފޮނުވަމުންދާ މެސެޖުތަކަކީ އެކުންފުންޏާއި އެއްވެސް ގުޅުމެއް އޮވެގެން ފޮނުވަމުންދާ މެސެޖުތަކެއް ނޫން ކަމަށް ސްރީލަންކަން އެއަރލައިނުން ބުނެފި އެވެ.

ސްރީ ލަންކާގެ ގައުމީ އެއަރލައިނަށް 40 އަހަރު ފުރުމުގެ މުނާސަބަތާ ގުޅިގެން ކަމަށް ބުނެ ސްރީލަންކަން އެއާލައިންގެ ހިދުމަތްތަކާ ގުޅޭ ތިން ސުވާލު ހިމެނޭ ސާވޭއެއް ހިންގަން ފެށި އެވެ. އަދި އެ "ޕްރޮމޯޝަން"ގެ ވާހަކަ ސޯޝަލް މީޑިއާގައި ވަރަށް ބޮޑަށް ދައުރުވި އެވެ.

ނަމަވެސް، ސްރީ ލަންކަން އެއަރލައިނުގެ ރަސްމީ ޓުވިޓަރ އެކައުންޓުން ކުރި ޓުވީޓެއްގައިވާ ގޮތުގައި، އެފަދައިން ހިލޭ ޓިކެޓް ދޭ ޕްރޮމޯޝަނެއް އެ އެއަރލައިނުން ހިންގަމުންނުދެ އެވެ.

އެ ޓުވީޓުގައިވާ ގޮތުގައި، ހިލޭ ޓިކެޓް ލިބޭ ޕްރޮމޯޝަނެއް ކަމަށް ބުނެ ސޯޝަލް މީޑިއާއާއި މެސެންޖަރ އެޕްތަކުގައި ދައުރުވަމުންދާ މެސެޖުތަކާއި އެކުންފުންޏާއި އެއްވެސް ގުޅުމެއް ނެތެވެ.

އެފަދަ ޕްރޮމޯޝަނެއް ފަށާފައިނުވާކަން ފާހަގަކޮށް އެ އެއާލައިނުން ބުނީ އެކުންފުނީގެ ނަމުގައި ހިންގަމުންދާ ޕްރޮމޯޝަނާއި ގުޅިގެން އެކުންފުނިން ޒިންމާ ނުވާނެ ކަމަށެވެ.

އެހެން ބައެއް އެއަރލައިންތަކުގެ ނަމުގައި ވެސް މިފަދަ ޕްރޮމޯޝަންތައް ސޯޝަލް މީޑިއާގައި ހިންގައެވެ. އެގޮތުން، މިދިޔަ އަހަރުގެ ތެރޭގައި ގަތަރު އެއަރވޭސްއާއި، އެމިރޭޓްސް އަދި ފްލައި ދުބާއީގެ ނަމުގައި މިފަދަ މެސެޖުތަކެއް ސޯޝަލް މީޑިއާގައި ދައުރުވި އެވެ.