ކުރިއަށް އޮތީ ފަސޭހަ ދުވަސްތަކެއް ނޫން ކަމަށާއި ސަރުކާރު ބަދަލުވުމުގެ ކަންކަން ކުރުމުގައި އެންމެން އެކަތިގަނޑެއްގެ ގޮތުގައި ތިބުން ވަރަށް މުހިއްމު ކަމަށް އިންތިޚާބީ ރައީސް އިބްރާހީމް މުހައްމަދު ސޯލިހް ވިދާޅުވެއްޖެއެވެ.
ރިޔާސީ އިންތިޚާބު ކާމިޔާބު ވުމަށްފަހު ބޭއްވި އެމްޑީޕީގެ ޤައުމީ މަޖިލީހުގެ ފުރަތަމަ ޖަލްސާގައި ވާހަކަ ދައްކަވަމުން އިބްރާހީމް މުހައްމަދު ސޯލިހް ވިދާޅުވީ ނިމިދިޔަ ރިޔާސީ އިންތިޚާބުގެ ފަހުވަގުތާ ޖެހެންދެންވެސް ވަރަށް ގިނަ ހުރަސްތަކާއި ކުރިމަތިވެފައިވާ ކަމަށާއި ވޯޓްލައި، ވޯޓު ގުނުމާ ހަމައަށްވެސް ގޮންޖެހުންތައް ހުރިކަމަށެވެ.
އިބޫ ވިދާޅުވީ ޕާޓީތަކާއި ޕާޓީތަކުގެ ލީޑަރުން ވަރަށް ބުރަ މަސައްކަތްތަކެއް ކުރެއްވި ކަމަށާއި ރަށްރަށުން ބައްދަލުވި މީހުންގެ ފުށުން އެކަން ވަރަށް ބޮޑަށް އެނގިވަޑައިގަތް ކަމަށެވެ. ހުރިހާ ރަށަކުންވެސް އެންމެ ބޮޑަށް ދައްކަމުން ދިޔައީ އިންސާފް ޤާއިމް ކޮށްދިނުމުގެ ވާހަކަ ކަމަށާއި ކޮރަޕްޝަނާއި ވައްކަން އިތުރުވެފައިވާ މިންވަރުގެ ވާހަކަ ކަމަށްވެސް އިބޫ ވިދާޅުވިއެވެ. އިރާދަ ކުރެއްވިއްޔާ ކުރިއަށް އޮތް ދުވަސްތަކުގައި، ވެފައިވާ ވައުދާއި އެއްގޮތައް ފުރަތަމަ ދުވަހުން ފެށިގެންވެސް އިންސާފް ޤާއިމް ކުރުމުގެ މަސައްކަތް ކުރައްވާނެ ކަމަށް އިބޫ ވިދާޅުވިއެވެ.
"ކުރިއަށް އޮތީ ފަސޭހަ ދުވަސްތަކެއް ނޫން. ކުރަން ޖެހޭ މަސައްކަތްތައް ގިނަ. މި އެދެނީ މި ޓްރާންސިޝަން ތެރޭގައިވެސް އެންމެން އެކަތި ގަނޑެއްގެ ގޮތުގައި ދެމިތިބުން ވަރަށް މުހިއްމު. ކޯލިޝަން ދެމެހެއްޓުމާއި ވައުދުތައް ފުއްދުމުގައި އެމްޑީޕީގެ ޤައުމީ މަޖިލީހުގެ ދައުރު ވަރަށް ބޮޑު" އިބޫ ވިދާޅުވިއެވެ.
އިންތިޚާބީ ރައީސް ވިދާޅުވީ ކޮމިޓީއެއް ހަދައިގެން ސަރުކާރު ބަދަލު ކުރުމުގެ މަސައްކަތް ކުރަމުންދާ ކަމަށާއި މި ދެތިން ދުވަހުގެ ތެރޭގައި ވަރަށް ގިނަ ފަރާތްތަކުން އެމަނިކުފާނާއި ބައްދަލުކޮށް އެއްބާރުލުން ދެއްވާނެ ކަމުގެ ޔަޤީންކަން ދެއްވަމުން ގެންދަވާ ކަމަށެވެ. އަދި ކުންފުނިތަކާއި މުއައްސަސާތަކުންވެސް އެހީތެރިކަން ފޯރުކޮށްދެމުންދާ ކަމަށާއި ބޭރުގެ ބައެއް ފަރާތްތަކުންވެސް ގުޅުއްވައި ކޮށްދެވެން އޮތް ހުރިހާ ކަމެއް ކޮށްދެއްވާނެ ކަމުގެ ޔަޤިންކަން އަރުވަމުންދާ ކަމަށް އިބޫ ވިދާޅުވިއެވެ.
"އެހެންވީމާ ކުރިއަށް އޮތް ދުވަސްތަކަކީ ހެޔޮ ރަނގަޅު ދުވަސްތަކެއް ކަމަށް ބަލަން. ކުރަން ހުރި މަސައްކަތްތަކުގައި ހުރިހާ ފަރާތްތަކަކުންވެސް އެހީތެރިވެދެއްވާނެ" އިބޫ ވިދާޅުވިއެވެ.
އިބޫ ވަނީ ގުޅިފައިވާ ޕާޓީތަކުން މިއިންތިޚާބު ކާމިޔާބު ކުރުމަށް އެހީތެރިވެދެއްވައި، ވޯޓު ދެއްވި އެންމެހާ ފަރާތްތަކަށް ވަރަށް ބޮޑަށް ޝުކުރު ދަންނަވާފައެވެ.
