ރައްޔިތުން އަނިޔާ އަށް ދީލާނުލާނެކަން ދައްކުވައިފި

ޤައުމަށް އައި މިނިވަން ނޫރާނީ ދައުރުން މި ހަދާންތައް އާކުރަނީ

އައުދާނަ އިތުރު އަބްތާލުންނަށް ޒިކުރާގެ މަލުން މި ވެދުން ކުރަނީ

މިއީ މުޅި ގައުމުގައި އެއް އަޑަކުން ކިޔަމުންދާ ގައުމީ ލަވައެވެ. ދިވެހި ރައްޔިތުން އުފަލުން ފޮޅިއްޖެއެވެ. ލޮލުން އުފާވެރިކަމުގެ ކަރުނަ އޮހޮރިގެން ހިގައްޖެއެވެ. އެ މީހުން ގަބޫލުކުރާ ގޮތުގައި މިއަދު އެ މީހުންނަށް ގަބޫލުކުރެވިގެން މި ދިޔައީ އަޅުވެތި ކަމަކަށް ފަހު މިނިވަންކަމުގެ އިހްސާސް ލިބުނު ކަމުގެ އުފަލެވެ. ހަތުރުން މިތުރުންނަށް ވެއްޖެއެވެ. ޒަމާންތަކަށް ފަހު އެކަކު އަނެކަކަށް ބައްދާލެވި ސަލާމްގަލާމް ކުރެވިއްޖެއެވެ. ޖަލުގެ ތޭރިތަކުގައި ތިބި ބައެއް މީހުން ވީއްލި އެ މީހުންގެ އާއިލާތަކުގައި އުފާވެރިކަމުގެ ކުލަ ޖެހިއްޖެއެވެ. މިއީ ސެޕްޓެމްބަރު 23 ގައި ބޭއްވި ރިޔާސީ އިންތިޚާބުގެ ނަތީޖާ އިއުލާންކުރެވުނު ވަގުތުން ފެށިގެން މި ދިވެހި ފަސްގަނޑުން ފެނިގެންދާ މަންޒަރެވެ.

ހަތް އަހަރު ފަހުން ދިވެހިންނަށް އުފާވެރިކަން ހާސިލް ކުރެވި، އެ މީހުންގެ ދޫތަކުން އުފާވެރިކަމުގެ ޖުމްލަތައް ހިފެހެއްޓުމެއް ނެތި ވީއްލިގެން މި ދަނީ ސަބަބުތަކެއް ނެތިއެއް ނޫނެއެވެ. ދިވެހިންނަކީ މިނިވަން ކަމަށް ލޯބިކުރާ، އެ މީހުންގެ ސަޤާފަތާއި، އަމިއްލަވަންތަކަމާއި، އިސްލާމްދީން ހިފެހެއްޓެމުގައި އަބަދުވެސް ނަމޫނާ ދައްކަމުން އަންނަ ބައެކެއެވެ. ދިވެހިންނަކީ އަޅުވެތި ކަމަށް ދީލާލާނެ ބައެއް ނޫނެވެ. އަމިއްލަ ފުރާނަ ގުރުބާންކޮށްގެން ވެސް އަނިޔާވެރި ކަމަށް ނޫނެކޭ ބުނާނެ ބައެއް ކަން ދައްކުވައިދީފިއެވެ.

މިހާރުގެ ރައީސް އަބްދުﷲ ޔާމީނަށް ދިވެހިންގެ ތެރެއިން ގިނަ ބަޔަކު ނޫނެކޭ ބުނީ ސަބަބުތަކެއް ހުރެގެންނެވެ. އެ މީހުން "ނޫނެކޭ" ބުނީ މި ވެރިކަމުގައި އަޅުވެތިކަމުގެ އިހްސާސް ކުރެވޭތީއެވެ. އެ މީހުން "ނޫނެކޭ" ބުނީ މި ސަރުކާރުގެ ފަސް އަަހަރުގެ ތެރޭގައި އެތައް ބަޔަކަށް އަނިޔާ ލިބިފައިވާތީއެވެ. މުށުތެރެއަށް ބާރުތައް ލައްވައިގެން، މާ ބާރުގަދަ ފަރާތެއްގެ ގޮތުގައި ހުންނެވިޔަސް ރައްޔިތުންނަށް ބާރު ލިބުނު ދުވަހު ކުޑަކަކޫ މައްޗަށް ތިރިކުރެވޭނެކަން ދެއްކުމުގެ ގޮތުންނެވެ. ގައުމު ހަމަމަގަށް އެޅުވުމުގައި ރައްޔިތުންގެ ދައުރަކީ ކޮބައިކަން އެ މީހުން ދައްކުވައިފިއެވެ. ރައްޔިތުންނަށް އަނިޔާވެރިވި ވެރިއަކަށް އެ މީހުން ދީލާނުލާނެކަން އެ މީހުން ދައްކުވައިފިއެވެ.

ދެން އޮތީ އުންމީދެވެ. އެ އުންމީދުތައް ގުޅިފައި ވަނީ އިންތިޚާބީ ރައީސް އިބްރާހިމް މުހައްމަދު ސޯލިހާއެވެ. ގައުމުގެ ހުންގާނު އިބްރާހިމް މުހައްމަދު ސޯލިހާއި ދިވެހި ރައްޔިތުން މި ހަވާލުކުރީ އެ މަނިކުފާނު ވެވަޑައިގެންނެވި ވައުދުތަކުގެ ސަބަބުންނެވެ. ހަމަހަމަކަމާއި، އިންސާފު ރައްޔިތުންނަށް ހޯއްދަވައިދެއްވާނެ ކަމަށް ވި ވައުދުތަކުގެ މައްޗަށެވެ. އަސާސީ ހައްގުތަށް ދެއްވާނެ ކަމަށް ވެވަޑައިގެންނެވި ވައުދުގެ މައްޗަށެވެ. ދިވެހިރައްޔިތުން ޔަޤީންކުރަނީ މަނިކުފާނަކީ ވައުދު އުވާލާނެ ވެރިއަކަށް ނުވާނެ ކަމަށެވެ. މަނިކުފާނަކީ އަދުލުވެރި ވެރިއަކަށް ވާނެ ކަމުގެ ޔަޤީންކަން ރައްޔިތުންގެ ހިތުގައި އޮތްކަން އެ ވަނީ ވޯޓުން ދައްކުވައިދީފައެވެ. ރައްޔިތުންގެ ފަހަރު ރައްޔިތުން ސާބިތުކޮށްދީފިއެވެ. ވައުދު ފުއްދައިދީފިއެވެ. ދެން އޮތީ މަނިކުފާނުގެ ފަހަރެވެ.