ދިވެހިރާއްޖޭގެ ރައްޔިތުންގެ ކުރިމަގާ މެދު ގޮތެއް ނިންމައިފި ކަމަށާއި އެ ނިންމުން އެ މަނިކުފާނު ގަބޫލު ކުރައްވާކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެއެވެ.
ރިޔާސީ އިންތިޚާބުގެ ވޯޓުން ބަލިވެ ވަޑައިގެންނެވި ފަހުން ފުރަތަމަ ފަހަރަށް ގައުމާ މުޚާތަބުކޮށް ވާހަކަ ދައްކަވައި ރައީސް ޔާމީން ވިދާޅުވީ އެ މަނިކުފާނުގެ ވެރިކަމުގައި ވަރަށް ގިނަ ކަންތައްތައް ކޮށްދެއްވި ކަމަށާއި އެ ޚިދުމަތްތަކާ މެދު ރައްޔިތުން ބަސް އިއްވައިފި ކަމަށެވެ. އަދި އެ ނިންމުން އެ މަނިކުފާނު ގަބޫލު ކުރައްވާ ކަމަށް ރައީސް ޔާމީން ވިދާޅުވިއެވެ. އާދީއްތަ ދުވަހު ބޭއްވި ރިޔާސީ އިންތިޚާބަކީ ވަރަށް ފުރިހަމައަށް ދިޔަ އިންތިޚާބެއް ކަމަށާއި އެމަނިކުފާނަށް ވޯޓު ދެއްވި ބޭފުޅުންނަށް ޝުކުރުވެރިވާ ކަމަށް ވެސް ރައީސް ޔާމީން ވިދާޅުވިއެވެ. ކުރިއަށް އޮތް ދުވަސްތަކުގައި ރައްޔިތުންނަށް ބުރައަކަށް ވެވަޑައިގަންނަވަން ބޭނުންފުޅު ނުވާކަމަށް ވެސް ޔާމީން ވިދާޅުވިއެވެ.
އަލަށް އިންތިޚާބުވި ރައީސް، އިބްރާހިމް މުހައްމަދު ސޯލިހްއަށް ހޯމަ ދުވަހު ތަހްނިޔާ ކިޔުއްވާފައިވާނެ ކަމަށާއި ވެރިކަން ބަދަލުވަންދެން ގައުމު ވަރަށް އަމާން ކަމާއެކު ކުރިއަށް ގެންދަވާނެ ކަމަށް ރައީސް ޔާމީން ވިދާޅުވިއެވެ. އަދި އެއްވެސް ބަޔަކު މި ދުވަސްތަކުގައި ހަމަނުޖެހުމެއް ނުހިންގުމަށް ރައީށް ޔާމީން ވަނީ އެދިވަޑައިގެންފައެވެ.
