ކިޔުތައް ދިގުވެ ޝަކުވާ ބޮޑުވެއްޖެ
23 ސެޕްޓެމްބަރު 2018 | އާދީއްތަ 08:09ކިޔުތައް ލަސްވާން ދިމާވާ މައިގަނޑު ސަބަބަކީ ޓެބްލެޓްތައް ބޭނުންކުރުމުގައި މައްސަލަތައް ދިމާވުން
ކިޔުތައް ދިގުލައިގެން ގޮސް ބައެއް ތަންތަނުގައި އެތައް ސަތޭކަ ބަޔަކު ކިޔުގައި އެބަ ތިބި
ކުރިއަށް އޮތް ފަސް އަހަރު ދުވަހަށް ރާއްޖޭގެ ރައީސަކަން ކުރައްވާނެ ބޭފުޅަކު ހޮވުމަށް ބާއްވާ ރިޔާސީ އިންތިޚާބުގައި ވޯޓުލާ ކިޔުތައް ދިގުވެ، ޝަކުވާތައް ބޮޑުވެއްޖެއެވެ.
މިއަދު ހެދުނު ވޯޓުލުމަށް ހުޅުވުމާ އެކު ގިނަ އަދަދެއްގެ ބަޔަކު ވަނީ ކިޔުތަކަށް އަރާފައެވެ. ނަމަވެސް އެ ވަގުތު ކިޔު އަށް އެރި މީހުންނަށް ވެސް ވޯޓު ލެވިފައި ވަނީ ދެތިން ގަޑިއިރަށް ފަހުއެވެ. ކިޔުތަގުގެ ދިގުމިން އެތައް ސަތޭކަ ފޫޓު ދުރުމިނަށް ދެމިފައިވާއިރު ބައެއް މަރުކަޒުތަކުގެ ބޭރުގައި އެތައް ސަތޭކަ ބަޔަކު އެބަ ތިއްބެވެ.
ކިޔުތައް ވަނީ އެތައް ސަތޭކަ ފޫޓުގެ ދުރުމިނަށް ދަމާލައިފައި
ބައެއް ސަރަހައްދުތަކުގައި އުމުރުން ދުވަސްވީ މީހުންނާއި އަންހެނުން އަވީގައި ގިނަ ވަގުތު ތިބެން ޖެހުމުން އެނބުރުން އެރުން ފަދަ މައްސަލަތައް ކުރިމަތިވެ ހޮސްޕިޓަލަށް ވެސް ގެންގޮސްފައި ވެއެވެ.
ވޯޓުލާ މަރުކަޒުތަކުން ކިޔު ނަމްބަރު ދޫކުރުމުގައި ވޯޓާސް ލިސްޓް އޮންލައިންކޮށް ޗެކުކުރުމަށް ގެންގުޅޭ ޓެބްލެޓުގައި މައްސަލަތަކެއް ދިމާވެ، ވޯޓުލުން ވަނީ ވަރަށް ބޮޑަށް ލަސްވެފައެވެ. އިލެކްޝަން ކޮމިޝަނުން ޓެބްލެޓް ބޭނުންކޮށްފައި ވަނީ ބައެއް ފަރާތްތަކުން އެބޭނުން ކުރުމާ މެދު ކަންބޮޑުވުން ފާޅު ވެސް ކޮށްފައި ވަނިކޮށެވެ.
ނަމަވެސް ވޯޓުލާ ވަގުތު ދެމިގެން ގޮސް ގިނަ ބަޔަކު ޝަކުވާކުރަން ފެށުމާ ގުޅިގެން ގިނަ ސަރަހައްދުތަކުގައި މިހާރު ވޯޓުލުން ކުރިއަށް ގެންދަނީ ޓެބްލެޓްތަކާ ނުލައެވެ. ނަމަވެސް އަދިވެސް އެކަށީގެންވާ ބާރު މިނެއްގައި ވޯޓުލުން ކުރިއަށް ނުދާތީ ގިނަ ސަރަހައްދުތަކުގައި އަދިވެސް ދިގު ކިޔު އެބަ އޮތެވެ.
ރާއްޖެއިން ބޭރުގައި ވެސް ކިޔުތައް ދިގުވެ އާންމުންގެ ޝަކުވާތައް ވަނީ ބޮޑުވެފައެވެ. އެގޮތުން މެލޭޝިއާގެ ވޯޓު ފޮއްޓަށް ރަޖިސްޓްރީކޮށްފައިވާ މީހަކު ބުނީ ކިޔުތައް ކޮޅުން ލައިގެން ގޮސްފައިވާ ކަމަށާއި މިކަން އިންތިޒާމް ކޮށްފައި ވަނީ އެއްވެސް ހަމައެއް ލަމައެއް ނެތި ކަމަށެވެ.
މިއީ ފަހުގެ ތާރީޚެއްގައި ވޯޓުލާން އެންމެ ގިނަ ވަގުތު ހޭދަކުރަން ޖެހުނު ފަހަރެވެ. ރާއްޖެއެމްވީއާ ވާހަކަ ދެއްކި ބައެއް މީހުން ބުނީ އެ މީހުން 2008 ގައި ވެސް އަދި 2013 ގައި ވެސް ވޯޓުލި ކަމަށާއި ނަމަވެސް މިއީ މިހާ ގިނަ ވަގުތު ނެގި ފުރަތަމަ ފަހަރު ކަމަށެވެ. ކިޔުތައް ދިގު ނަމަވެސް ރާއްޖޭގެ ހުރިހާ ސަރަހައްދެއްގައި ވެސް އަމާން އޮމާން ކަމާ އެކު ވޯޓުލުން ކުރިއަށް ދާކަމަށް ވަނީ މައުލޫމާތު ލިބިފައެވެ.
