ލަންކާގައި ތިބި ގިނަ އަދަދެއްގެ ކިޔަވާ ކުދިންގެ ތާއީދު އިބޫއަށް!

އާދިއްތަ ދުވަހު ބާއްވާ ރިޔާސީ އިންތިހާބުގައި ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އަށް ތާއިދު ކުރުމަށް ސްރީ ލަންކާގައި ކިޔަވަން ތިބި ގިނަ އަދަދެއްގެ ކިޔަވާ ކުދިން ނިންމައިފިއެވެ.

ރިޔާސީ އިންތިހާބަށް ތައްޔާރުވުމުގެ ގޮތުން ލަންކާގައި ކުރިއަށް ގެންދިޔަ ކެމްޕެއިން ނިންމާލުމުގެ ގޮތުން ބޭއްވި ހާއްސަ ޖަލްސާގައި އެކުދިން ވަނީ އިބޫއަށް ތާއިދު އޮތްކަން ހާމަކޮށްފައެވެ.

މި ޖަލްސާގައި ކުރީގެ ރައީސް މުހައްމަދު ނަޝީދާއި ރައީސް ޔާމީންގެ ފުރަތަމަ ނާއިބު ރައީސް ޑރ. މުހައްމަދު ޖަމީލް އަހުމަދާއި ކުރީގެ ފޮރިން މިނިސްޓަރު އަހުމަދު ނަސީމް ބައިވެރިވަޑައިގެންނެވިއެވެ. ހަމައެހެންމެ ރައީސް ނަޝީދުގެ އެޑްވައިޒަރު އަބްދުﷲ ޖާބިރާއި ރައީސް ޔާމީން ސަރުކާރުގެ ޔޫތު މިނިސްޓަރު މުހައްމަދު މަލީހު ޖަމާލްގެ އިތުރުން ލަންކާގެ ކެމްޕެއިން ކޯޑިނޭޓަރު އަދި މަނަދޫ ދާއިރާގެ ކުރީގެ މެމްބަރު މުހައްމަދު ތޯރިގު ބައިވެރިވެވަޑައިގެންނެވިއެވެ.

ރިޔާސީ އިންތިހާބުގައި ލަންކާގައި ދެ ވޯޓު ފޮއްޓެއް ބެހެއްޓުމަށް ހަމަޖެހިފައިވާއިރު 2788 މީހުން ވޯޓު ލާނެއެވެ. ލަންކާގައި އެންމެ ވަރުގަދަކޮށް ފެނިފައި ވަނީ ކޯލިޝަންގެ ކެމްޕެއިނެއެވެ.