ބައެއް ކަންތައްތައް ބޭނުން ނުވާ ގޮތަށް ދިއުމުން، އަމިއްލަ ނަފްސު ދެކެ ވެސް ބައެއް ފަހަރު ރުޅި އަންނަ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ރިޔާސީ އިންތިހާބު ބޭއްވުމަށް ދެ ދުވަހަށް ވެފައި ވަނިކޮށް، ޕީއެސްއެމަށް ދެއްވި އިންޓަވިއުއެއްގައި ރައީސް ޔާމީން ވިދާޅުވީ ރުޅި އަންނަންވީމަ ރުޅި އަންނާނެ ކަމަށާއި އެ މަނިކުފާނަކީ ސީރިއަސް ބޭފުޅެއް ކަމަށެވެ.
"އަޅުގަނޑު ރުޅި އަންނަންވީމަ ރުޅި އަންނާނެ. އަޅުގަނޑަކީ ސީރިއަސް މީހެއް. ކަންކަން އަޅުގަނޑު ބޭނުންވާ ގޮތަށް، ނޫނިއްޔާ އަޅުގަނޑު ބުނާ ގޮތަށް ވުރެ މޮޅަށް ނިންމަން އެދޭ މީހެއް، އެހެންވީމަ އަޅުގަނޑަށް މިކަހަލަ ކަންކަމުގައި ނުވެދާ ކަމަށް ވަންޏާ ހުންނާނެ ބައެއް ފަހަރު އަމިއްލަ ނަފްސު ދެކެވެސް ރުޅިއަސްފަ،" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ އެމަނިކުފާނަކީ އެހާ ފަސޭހައިން ބަލި ގަބޫލު ކުރައްވާނެ ބޭފުޅެއް ނޫން ކަމަށާއި ވެރިކަމުގައި ކަމެއް ދިމާވާ އިރަށް ރައްޔިތުން ދޫކޮށްލާފަ ދާން ހިޔާލުގައި ހުންނަ މީހަކު ވެރިކަމާ އުޅޭނެ ކަމެއް ނެތް ކަމަށެވެ.
"ރައްޔިތުން ދޫކޮށްފަ ދާން ހިޔާލުގައި ހުންނަ މީހެއް ކަމަށް ވަންޏާ، އަދި ނުވޭ މި ހިސާބަށް އަންނަން މަސައްކަތް ކުރާކަށް. އަޅުގަނޑަކީ ކަންކަމަކާ ކުރިމަތިލާ މީހެއް. އަޅުގަނޑަކީ އެހާ ފަސޭހައިން ބަލި ގަބޫލު ކުރާނެ މީހެއް ނޫން،" ރައީސް ޔާމީން ވިދާޅުވިއެވެ.
ކައިރީގަ އުޅުނު މީހުންނާއި ވަކިވެގެން ދިޔަ މީހުން އަމަލު ކުރި ގޮތުން ފިލާވަޅުތަކެއް ލިބިވަޑައިގެންނެވި ކަމަށް ފާހަގަ ކުރައްވައި ރައީސް ޔާމީން ވިދާޅުވީ އެމަނިކުފާނުގެ ވެރިކަމުގައި ކައިރީގައި އުޅުނު މީހުން ގޯސް ހަދަން ދެން ފުރުސަތު ދެވުނު ކަމަށެވެ. އިތުރު ފުރުސަތެއް ލިބިއްޖެނަމަ، މަސައްކަތް ކުރާނީ ކައިރީގައި އުޅޭ މީހުންގެ ޝަހުސިއްޔަތު ދަސްކުރުމަށް ކަމަށް ރައީސް ޔާމީން ވިދާޅުވިއެވެ.
"އިންސާނެއް ކަމަށް ގަބޫލު ކުރެވޭ ކަމުގައި ވަންޏާ، އަޅުގަނޑު ވަރަށް އުފާވާނެ. އެއާ އެކީގައި ގަބޫލު ކުރައްވާ އަޅުގަނޑަކީ މަސައްކަތަކާ ހަވާލުވެ ހުރި މީހެއް. އިރާދަ ކުރެއްވިއްޔާ ގޮންޖެހުންތަކާ އެކީގައި ވެސް އަޅުގަނޑުގެ މަސައްކަތް އަޅުގަނޑު ކުރާނަން. އަޅުގަނޑު ހަތުރުން ވެސް މިތުރުން ވެސް އެ ކްރެޑިޓް އަޅުގަނޑަށް ދޭންވާނެ. އަޅުގަނޑު ޑިޓާ ކުރާކަށް، އަޅުގަނޑު ޑިޓާ ކުރަންޏާ ކުރަންޖެހޭ ކަމަކީ އަޅުގަނޑު މަރާލުން،" ރައީސް ޔާމީން ވިދާޅުވިއެވެ.
