ރ. ރަސްމާދޫ ރައްޔިތުންގެ ތެޔޮ ފިހާރައިގައި އަލިފާން ރޯވެއްޖެ

ރ. ރަސްމާދޫގެ ރައްޔިތުންގެ ތެޔޮ ފިހާރާގައި އަލިފާން ރޯވެއްޖެއެވެ.

އެ ރަށުގެ ކައުންސިލުގެ ރައީސް ތާހާ މުހައްމަދު ވިދާޅުވީ އެތަނުގައި ރޯވި ޚަބަރު ލިބުނީ ދަންވަރު 3:15 ގައިކަމަށެވެ. އެ ފިހާރައަކީ ރަސްމާދޫގެ ބަދަރުން ފައިބާއިރު ފުރަތަމަ މޫނު ޖެހޭ ތަން ކަމަށާއި އަލިފާނުގެ ހާދިސާގައި އެތަން އެއްކޮށް އަދާ ހުލިވެފައި ކަމަށެވެ. އެތަން ހުންނަނީ އެއްވެސް އިމާރާތެއްގެ ކައިރީގައި ނޫން ކަމުން އަލިފާނުގެ އަސަރު އިތުރު ތަނަކަށް ކޮށްފައި ނުވާކަމަށް ތާހާ ވިދާޅުވިއެވެ. މިހާރު އަލިފާން ވަނީ ކޮންޓްރޯލް ކުރެވިފައި ކަމަށާއި 95 އިންސައްތަ ނިއްވާލެވިފައިވާކަމަށް ވެސް ތާހާ ވިދާޅުވިއެވެ.

އެތާ އެތެރޭގައި ހުންނާނީ ގާތްގަޑަކަށް 2000 އަކަށް ލީޓަރު ޑީސެލްއާއި 1500-2000 އަދަދަކަށް ލީޓަރު ޕެޓްރޯލްކަމަށް އެބޭފުޅާ ވިދާޅުވިއެވެ.

އަލިފާން ނިއްވާލާފައިވަނީ އެމްއެންޑީއެފްއާއި ރަށުގެ ރައްޔިތުން ނިކުމެއެވެ. އެމްއެންޑީއެފްއިން ބުނީ އަލިފާނުގެ ހާދިސާގެ މައުލޫމާތު 3:40 ހާއްކައިރު ލިބުމާއެކު ހަރަކާތްތެރިވާން ފަށާފައިވާ ކަމަށެވެ. އެ ހާދިސާގައި އެއްވެސް މީހަކަށް އަނިޔާއެއް ނުލިބެއެވެ.