އޭނާއަކީ ކެރިވަޑައިގަންނަވާ ބޭފުޅެއް ކަމަށާއި އެއްވެސް ކަމެއްގައި އެއްވެސް ތަނަކަށް ހާޒިރު ނުކުރެއްވޭނެ ކަމަށް ޕީޕީއެމްގެ ކުރީގެ ރެޖިސްޓްރަރ ހިޔަލީ މުހައްމަދު ރަޝީދު ވިދާޅުވެއްޖެއެވެ. 

ގުޅިފައިވާ ސިޔާސީ ޕާޓީތަކުގެ ކެމްޕޭން ނިންމާލުމުގެ ގޮތުން އައްޑޫ ސިޓީ ހިތަދޫގައި ބޭއްވި ޖަލްސާގައި ވާހަކަފުޅު ދައްކަވަމުން ހިޔަލީ ވިދާޅުވީ ސަރުކާރުގެ އެއްވެސް ވަޒީފާއެއް ބޭނުން ނުވާ ކަމަށެވެ. ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އަށް ބައިއަތު ހިފީ ވަރަށް އުފަލުން ކަމަށާއި އެއީ ތެދުވެރި އިޚްލާސްތެރިޔެއްކަން އެނގިވަޑައިގަންނަވާ ކަމަށް ހިޔަލީ ވިދާޅުވިއެވެ. 

"އަޅުގަނޑު ޖެހިލުމެއް ނުވޭ ކޯޓު އަމުރެއް ނެރެގެން އަޅުގަނޑު ހައްޔަރު ކުރިޔަސް. އަޅުގަނޑު ކަހަރު ވަކޭ ވެސް ހިތަކަށް ނާރާ. އަޅުގަނޑަކީ ކެރޭ މީހެއް. އަޅުގަނޑަށް ކެރޭނެ." ހިޔަލީ ވިދާޅުވިއެވެ.

ޕީޕީއެމްގެ ރެޖިސްޓްރަރއަކަށް ވުމަށް ވެސް ހުށަހެޅުއްވީ ރައީސް މައުމޫން އަބްދުލްގައްޔޫމް ކަމަށާއި ރައީސް މައުމޫން، އެ ޕާޓީގެ ރައީސްކަމުން ދުރުކުރި ފަހުން މުސާރަ ލިބިވަޑައިނުގަންނަވާ ކަމަށް ހިޔަލީ ވިދާޅުވިއެވެ.

ކޯލިޝަންގެ ޕޯޑިއަމްގައި ފުރަތަމަ ފަހަރަށް ވާހަކަ ދައްކަވަމުން ހިޔަލީ ވިދާޅުވީ މި ސަރުކާރުގައި އެއްވެސް މުސާރައަކަށް މަސައްކަތްކޮށްފައި ނުވާނެ ކަމަށެވެ.

"އަޅުގަނޑު އެއްވެސް މުސާރައަކަށް މަސައްކަތެއް ނުކުރަން. މިސަރުކާރުގައި މި ހިސާބަށް. އަޅުގަނޑުގެ އެއްވެސް ފިރިހެން ދަރިޔެއް ވެސް މުސާރައަށް މަސައްކަތެއް ނުކުރޭ. އަޅުގަނޑު މިކޮޅަށް ނާދެވެންވޭ އެއްވެސް ސަބަބެއް ނެތް. އަޅުގަނޑަކީ މިނިވަނެއް. އަޅުގަނޑު އެއްވެސް ބޭފުޅެއްގެ ދަށުވެފައެއް ނީންނާނެ. އަޅުގަނޑު ހަތަރެސްފައިން މަސައްކަތް ކުރަން. ލާހިކެއް ނޫން ރިޝްވަތުގެ ކަމެއްގަ ވެސް، ލާހިކެއް ނޫން ވައްކަމުގެ ކަމެއްގަ ވެސް، ލާހިކެއް ނޫން އެއްވެސް ކަމެއްގަ އަޅުގަނޑު ހާޒިރު ކުރާކަށް." ހިޔަލީ ވިދާޅުވިއެވެ. 

އިބޫއަށް ވޯޓު ދެއްވަނީ ހިތުން ރުހުމުން ކަމަށާއި އެއީ ވަރަށް ހައްގު ވޯޓެއް ކަމަށް ހިޔަލީ ވިދާޅުވިއެވެ. އަދި 2009 ވަނަ އަހަރު ރާއްޖޭގެ ރައީސްގެ މަގާމުގައި ހުންނެވި ބޭފުޅާ އެ އަހަރު ހިޔަލީއަށް ގުޅުއްވުމަށްފަހު ބައިއަތު ހިފަން އެދިވަޑައިގަތުމުން އެކަމަށް އެއްބަސްވެވަޑައި ނުގަތުމުން ވިދާޅުވީ ބޭނުން ކުރެއްވުމަށްފަހު އޭނާ އެއްލަވާލައްވާނީ ކަމަށް ހިޔަލީ ވިދާޅުވިއެވެ.