ބުދުތައް 5 ގަޑިއިރު ތެރޭ ނުނަގައިފި ނަމަ ނަގާނަން: ފުލުހުން
20 ސެޕްޓެމްބަރު 2018 | ބުރާސްފަތި 10:13ފަސް ގަޑިއިރު ގުނާނީ މިއަދު 1:30 އިން ފެށިގެން
ސިއްރު ފެންފުށީގައި ހުރި ކޮރަލޭރިއަމް
ސިވިލް ކޯޓުން ބުރާސްފަތި ދުވަހު ސިއްރު ފެންފުށި ރިސޯޓު ހިންގަމުންދާ ކުންފުނީގެ މައްޗަށް ކޮށްފައިވާ އަމުރާ އެއްގޮތަށް ފަސް ގަޑި އިރުގެ ތެރޭގައި އެ ރިސޯޓުން ބުދުތައް ނުނަގައިފި ނަމަ، ފުލުހުންނާއި ސިފައިން ނުކުމެ އެ ބުދުތައް ނަގާނެ ކަމަށް ފުލުހުން ބުނެފިއެވެ
ސިއްރު ފެންފުށީގައި ހަދާފައިވާ ކޮރަލޭރިއަމްގައި ހުރި ބުދުތައް މެންދުރު 1:30 ފެށިގެން ފަސް ގަޑިއިރުގެ ތެރޭގައި ނެގުމަށް ސިވިލް ކޯޓުން ވަނީ މިއަދު އަމުރެއް ނެރެފައެވެ. އަދި އެ ފަސް ގަޑިއިރުގެ ތެރޭގައި ބުދުތައް ނުނަގައިފި ނަމަ ހަތް ދުވަހުގެ ތެރޭގައި އެ ބުދުތައް ނަގަން ފުލުހުންނާއި ސިފައިންގެ މައްޗަށް އަމުރުކޮށްފައި ވެއެވެ.
ސުވާލު ކުރުމުގެ ފުރުސަތު ނުދީ ނޫސްވެރިން ބައިތިއްބައިގެން އިސްކަންދަރު ކޮށީގައި ފުލުހުންގެ ތަރުޖަމާނު ޗީފް ސްޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ ބުދުތައް ނަގަން ކޯޓުން އަމުރުކުރީ ބުދުތައް ބަހައްޓާފައި ވަނީ ޓޫރިޒަމް މިނިސްޓްރީން ދިން ހުއްދައާ އެއްގޮތަށް ކަމަށް ނުވާތީ ކަމަށެވެ. އެހެން ކަމުން ކޯޓުން ދީފައިވާ ވަގުތު ހަމަވާ އިރު ރިސޯޓުން ބުދުތައް ނުނަގައިފި ނަމަ ފުލުހުންނާއި ސިފައިން އެ ބުދުތައް ނަގާނެ ކަމަށް ޝިފާން ވިދާޅުވިއެވެ.
ސިއްރު ފެންފުށީގައި ބުދު ބަހައްޓައިގެން ހަދާފައިވާ ކޮރަލޭރިއަމްގެ މައްސަލަ ހޫނުވެ ބުދުތައް ނަގަން ސަރުކާރުން އަންގާފައި ވަނީ އެ މައްސަލާގައި އިލުމުވެރިންގެ ފާޑު ކިއުންތައް ވެސް އަމާޒުވެފައިވަނިކޮށެވެ. ބުދުތައް ބެހެއްޓި މައްސަލާގައި ސަރުކާރަށް ވެސް އެތައް ފާޑު ކިއުމެއް އަމާޒުވެފައިވެއެވެ.
މޫސުމަށް އަންނަ ބަދަލުތަކާއި ކަނޑުގެ ލޮނުގަނޑުގެ އުފުލުން ދައްކުވައިދޭ ގޮތަށް އެ ރިސޯޓުން ހެދި ކަނޑުއަޑީގެ ގެލަރީގައި އިންސާނުންގެ ސޫރަ ފެންނަ ގޮތަށް ހަދާފައިވާ ބުދުތަކެއް ބެހެއްޓި މައްސަލަ ފެންމަތިވީ މިއަހަރުގެ ޖުލައި މަހުގެ ކުރީކޮޅުގައެވެ. އެކަމާ ގުޅިގެން ރައީސް އަބްދުﷲ ޔާމީންގެ އަބްދުލްގައްޔޫމްގެ އެންގެވުމަށް ޖުލައި 28 ވަނަ ދުވަހު ޓޫރިޒަމް މިނިސްޓްރީން ވަނީ އެ ބުދުތައް ނަގަން ސިއްރު ފެންފުއްޓަށް އަންގައި ސިޓީއެއް ފޮނުވައިފައެވެ.
އެހެން ނަމަވެސް އެބުދުތައް ނަގާފައި ނުވާތީ ހުށަހެޅި މައްސަލާގައި ބުރާސްފަތި ދުވަހު ސިވިލް ކޯޓުން ނެރުނު އަމުރުގައި ބުނީ، އެ ބުދުތަކަކީ އިސްލާމް ދީނުގެ ވަހުދަތާއި ދިވެހި ދައުލަތުގެ މަސްލަހަތާ ހިލާފު ތަކެތިކަން ލިޔެކިތުންތަކުން އެނގެން އޮންނަ ކަމަށެވެ. އެފަދަ ކަމަކަށް ފުރުސަތު ދެވެން ނޯންނާނެ ކަމަށެވެ.
