ގުރަހަ ވެބްސައިޓް ލޯންޗްކޮށްފިއެވެ.

ގުރަހަ ވެބްސައިޓްގެ މައިގަނޑު މަޤްސަދަކީ ސްކޫލް ނިންމައި ވަޒީފާގެ ދާއިރާ އަށް ނުކުންނަ ކުދިންނަށް ވަޒީފާގެ މައިދާނުގައި ބޭނުންވާ ހުނަރާއި ގާބިލިއްޔަތުކަން ހޯދައި ދިނުމާއި، ވަޒީފާ ހޯދާ ފަރާތްތަކާއި ވަޒީފާދޭ ފަރާތްތައް ގުޅުވައި ދިނުމެވެ.

އެއްވެސް ކުއްޖަކު ބާކީ ނުކުރުމުގެ ސިޔާސަތުގެ ދަށުން މިނިސްޓްރީން ހިންގަމުން ގެންދާ ދަސްވާރާއި ބީޓެކް ފަދަ ޕްރޮގްރާމްތަކުގައި ދަރިވަރުންނާއި ގާތުން ކުރެވުނު މަސައްކަތުން އެނގިގެން ދިޔައީ ސްކޫލް ދައުރު ނިންމުމަށް ފަހު ރަނގަޅު ތަމްރީނެއް ލިބިގެން ވަޒީފާގެ މައިދާނަށް ނުކުންނަ ދަރިވަރުންނަށް ވެސް ވަޒީފާއަށް ކުރިމަތިލުމަށް ކުރަންޖެހޭ މަސައްކަތްތައް ކުރުމަށް ދަތިތަކެއް ހުރި ކަމަށް މިނިސްޓްރީން ބުންޏެވެ. އެގޮތުން އެފަދަ ވަރަށް ގިނަ ކުދިންނަށް މިހާތަނަށް ސީވީ ތައްޔާރުކުރުމުގައްޔާއި އެޕްލިކޭޝަން ޕްރޮސެސްގެ އެހެނިހެން ކަންކަމުގައި އުފާ އޮފީހުން ވަނީ އެހީތެރިކަން ފޯރުކޮށްދީފައެވެ. އެހެން ކަމުން ގުރަހަ ވެބްސައިޓް އިފްތިތާހް ކުރެވުނީ މިފަދަ ކަންކަމުގައި އެހީތެރިކަން ބޭނުންވާ ފަރާތްތަކަށް ފަސޭހައިން އެހީތެރިކަން ފޯރުކޮށްދެވޭ ފަދަ ނިޒާމެއް ގާއިމް ކުރުމުގެ ގޮތުންނެވެ.

މި ވެބްސައިޓް ވެގެންދާނީ ވަޒީފާދޭ ފަރާތްތަކާއި ވަޒީފާ ހޯދާ ފަރާތްތައް ގުޅާލެވޭ ފާލަމަކަށެވެ. ވަޒީފާދޭ ފަރާތްތަކާއި ވަޒީފާ ހޯދާ ފަރާތްތަކަށް ވެސް މި ވެބްސައިޓްގައި ރެޖިސްޓްރީ ކުރެވޭނެއެވެ. މީގެ އެންމެ ޚާއްސަ ކަމަކަށް ވާނީ މި ވެބްސައިޓް މެދުވެރިކޮށް ރެޖިސްޓްރީވުމުން އެ މީހެއްގެ ތަޢުލީމާއި ތަޖުރިބާއަށް ބިނާކޮށް އެމީހަކު ޝައުގުވެރިވާ ފަދަ ވަޒީފާތަކާއި ގުޅުވައިދީ، މިފަދަ ވަޒީފާއާ ބެހޭ މަޢުލޫމާތު ނޮޓިފިކޭޝަންގެ ގޮތުގައި އެ މީހަކަށް ލިބިގެންދިޔުމެވެ.

މި ވެބްސައިޓް މެދުވެރިކޮށް ޒުވާނުންނަށް ފަސޭހަކަމާ އެކު ސީވީ ތައްޔާރުކުރުމާއި، ވަޒީފާގެ ބާޒާރުގައި ހުރި ވަޒީފާގެ މަޢުލޫމާތުތައް ބެލުމާއި، ޝައުގުވެރިވާ ވަޒީފާތަކަށް ވެބްސައިޓް މެދުވެރިކޮށް އެޕްލައި ކުރެވޭނެއެވެ. މީގެ އިތުރުން ރާއްޖޭގެ ތަޢުލީމީ މަރުކަޒުތަކުން ހުރި މަތީ ތަޢުލީމުގެ ފުރުސަތުތަކާއި ކޯސްތަކުގެ މަޢުލޫމާތާއި، ވަޒީފާތަކަށް ބޭނުންވާ ހުނަރު އިތުރު ކުރުމަށް ތައްޔާރުކޮށްފައި ހުންނަ ތަފާތު ވީޑިއޯތައް ވެސް މި ވެބްސައިޓުން ބަލާލެވޭނެއެވެ.

ގުރަހަ ޕްރޮޖެކްޓްގެ ދަށުން ސްކޫލް ނިންމައި ވަޒީފާ ހޯދާ ކުދިންނަށް އަމާޒުކޮށް ޕޮލިޓެކްނިކްގައި ކެފޭއެއްގެ ޚިދުމަތް ވެސް މިވަގުތު ލިބެމުންދާނެއެވެ. މި ކެފޭގައި ގުރަހަ ވެބްސައިޓް ފަސޭހައިން ބޭނުންކުރެވޭނެ ވަސީލަތްތައް ވަނީ ގާއިމްކޮށްފައެވެ.

ޒުވާނުންނަށް ގިނަ ފުރުސަތު ހޯދައިދީ ޒުވާނުންނަކީ މުޖްތަމައުއަށް ބޭނުންތެރި ބަޔަކަށް ހެދުމަށް އެޑިއުކޭޝަން މިނިސްޓްރީން ދަނީ ތަފާތު ގިނަ މަސައްކަތްތަކެއް ކުރަމުންނެވެ. މިނިސްޓްރީގެ އުފާ އޮފީހުން އިސްނަގައިގެން ފެށި ޕްރޮޖެކްޓަކީ ވެސް ޅަޒުވާނުންނަށް ދިމާވާ މިފަދަ ދަތިތައް ހައްލުކުރުމުގެ ގޮތުން ފެށި ޕްރޮޖެކްޓެކެވެ.