ކުޅުދުއްފުއްޓަށް ޓެސްޓް ފްލައިޓް ޖެއްސިއިރު ހަދާ ނިމުނީ ހަމައެކަނި ރަންވޭ
20 ސެޕްޓެމްބަރު 2018 | ބުރާސްފަތި 09:20ޓަރމިނަލް ވަނީ ހިޔާކޮށްފައި އިތުރު ކަމެއް ނުނިމޭ
ކުޅުދުއްފުށި އެއާޕޯޓްގެ ރަންވޭ، ބޯޓު ޖެއްސި އިރު ނުނިމޭ
ހދ. ކުޅުދުއްފުށީ އެއާޕޯޓްގެ ޓާމިނަލް އާއި އެހެނިހެން ތަންތަން ނުނިމެނީސް ޓެސްޓް ފްލައިޓް ޖައްސައިފިއެވެ.
ރާއްޖެއެމްވީއަށް އެނގިފައިވާ ގޮތުގައި ޓެސްޓް ފްލައިޓް ޖެއްސިއިރު ވެސް އެއަރޕޯޓުގައި މަސައްކަތްތަކެއް ކުރަމުންދެއެވެ. އަދި މިހާތަނަށް ހަމައެކަނި ހިޔާކޮށްލެވިފައި ވަނީ ޓަރމިނަލް އެކަންޏެވެ. އެތަން ވެސް ހިޔާކުރުމުގެ އިތުރުން އެހެންކަމެއް ކޮށްފައެއް ނުވެއެވެ.
ކުޅުދުއްފުށީގައި ހަދަމުންދާ އެއާޕޯޓްގެ ރަންވޭގެ މަސައްކަތް ނިންމައި ޓެސްޓް ފްލައިޓް ޖައްސާފައި ވަނީ ބުދަ ދުވަހުގެ މެންދުރު ފަހުއެވެ. މި ޓެސްޓް ފުލައިޓްގައި ޓޫރިޒަމް މިނިސްޓަރު މޫސާ ޒަމީރާ އެކު ސަރުކާރުގެ އިސް ވަފުދެއް ވަޑައިގަތެވެ. އޭގެ ތެރޭގައި ބަންޑާރަ ނާއިބު މުހައްމަދު އަނިލް އާއި ޗީފް އޮފް ޑިފެންސް ފޯސް އަހުމަދު ޝިޔާމުގެ އިތުރުން ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ވަޑައިގެންނެވިއެވެ. އެ ބޭފުޅުންނަށް ކުޅުދުއްފުށިން ވަނީ ހޫނު މަރުހަބާއެއް ކިޔާފައެވެ.
ކުޅުދުއްފުށި އެއާޕޯޓްގެ ރަންވޭ އަށް ޓެސްޓް ފްލައިޓް ޖެއްސުން
މިރަސްމިއްޔާތުގައި ވާހަކަދައްކަވަމުން މިނިސްޓަރު ޒަމީރު ވިދާޅުވެފައި ވަނީ ރައީސް ޔާމީން ކުޅުދުއްފުއްޓަށް ވަޑައިގެން ވަރަށް އަވަހަށް އެއާޕޯޓް ރަސްމީކޮށް ހުޅުވައި ދެއްވާނެ ކަމަށެވެ.
އެއަރޕޯޓުގައި އެހެން މަސައްކަތެއް ނުނިމި ހުރި ނަމަވެސް މިނިސްޓަރު ޒަމީރު ވިދާޅުވީ އިއްޔެއިން ފެށިގެން ޗާޓަރ ފްލައިޓްތައް އެ އެއާޕޯޓަށް ޖެއްސޭނެ ކަމަށާއި އެކަމަށް ރަންވޭ ތައްޔާރު ކަމަށެވެ. އަދި ވަރަށް އަވަހަށް ޝެޑިއުލް ދަތުރުތައް ފަށާނެ ކަމަށެވެ.
މިއެއަރޕޯޓަކީ އެމްޓީސީސީއާ ހަވާލުކޮށްގެން ކުޅުދުއްފުށީ ކުޅި ހިއްކައިގެން އަޅާ އެއަރޕޯޓެކެވެ.
