ގިނަ ފްރެންޗައިޒްތަކާއެކު ވެލާނާ އިންޓަރނޭޝަނަލް އެއަރޕޯޓްގެ ވޯޓަރ ފްރަންޓް ރެސްޓޯރެންޓް ބިލްޑިންގް މިއަދު ހުޅުވައިފިއެވެ.

ވެލާނާ އިންޓަރނޭޝަނަލް އެއަރޕޯޓުގައި ބޭއްވި ހާއްސަ ރަސްމިއްޔާތުގައި ފްރެންޗައިޒް ރެސްޓޯރެންޓްތައް ހުޅުއްވައި ދެއްވީ އިކޮނޮމިކް މިނިސްޓަރު މުހައްމަދު ސައީދުއެވެ.

އެތަނުގައި ހުޅުވާފައިވާ ފްރެންޗައިޒް ރެސްޓޯރެންޓްތަކަކީ ކޭއެފްސީ އާއި ޕިއްޒާ ހަޓާއި ކޮސްޓާ ކޮފީ އަދި ހަރވެސްޓް މާކެޓްގެ ރެސްޓޯރެންޓް ކަމަށެވެ. އަދި އެތަނުގައި ގާތްގަނޑަކަށް 200 މީހުންގެ ޖާގަ ހިމެނޭނެއެވެ.

މި ހަތަރު ފްރެންޗައިޒް ރެސްޓޯރެންޓްތައް ހިންގުމުގެ އެއްބަސްވުމެއްގައި މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް) އިން އިޓަލީގެ އެޗްއެމްއެސް ހޮސްޓް އިންޓަނޭޝަނަލް ކުންފުންޏާއެކު ސޮއިކޮށްފައިވަނީ މި އަހަރުގެ ޖެނުއަރީ މަހުގެ 29 ވަނަ ދުވަހުއެވެ.

އެޗްއެމްއެސް ހޮސްޓް އިންޓަނޭޝަނަލް ކުންފުނިން މިހާރު ވެސް 150 ގައުމެއްގެ އެއަރޕޯޓްގައި ހިދުމަތް ފޯރުކޮށްދެމުންދެއެވެ.

އެމްއޭސީއެލް އިން އިޓަލީގެ ކުންފުންޏާ ހަވާލުކޮށްފައިވަނީ ފަސް އަހަރުގެ މުއްދަތަކަށެވެ.

މީގެ އިތުރުން ވެލާނާ އިންޓަރނޭޝަލް އެއަރޕޯޓުގައި ހުންނަ "ދޮވެމި" އެރައިވަލް ޝޮޕްގެ ޖާގަ ވަނީ ބޮޑުކޮށްފައެވެ. ކުރިން އެ ފިހާރައިގައި 60 އަކަފުޓޫ ހުރި ނަމަވެސް މިހާރު އެ ފިހާރަ ވަނީ 110 އަކަފޫޓަށް ބޮޑު ކޮށްފައެވެ. އަދި އިތުރު ބްރޭންޑްތަކުގެ އައިޓަމްތައް ވެސް ވަނީ ތައާރަފުކޮށްފައެވެ.

"ދޮވެމި" އެރައިވަލް ޝޮޕް ވެސް ހުޅުއްވައިދެއްވީ މިނިސްޓަރ ސައީދުއެވެ.