ގއ. އަތޮޅު ކައުންސިލްގެ ޒިންމާދާރުވެރިޔާ އާއި އިސް މުވައްޒަފަކު ސަސްޕެންޑްކޮށްފި
18 ސެޕްޓެމްބަރު 2018 | އަންގާރަ 06:56ސަސްޕެންޑް ކުރީ 30 ދުވަހަށް
ގއ. އަތޮޅު ކައުންސިލް އިދާރާ: އިސް ދެ މުވައްޒަފަކު ސަސްޕެންޑުކޮށްފައިވޭ
ރިޔާސީ އިންތިހާބާ ދިމާކޮށް ގއ. އަތޮޅު ކައުންސިލްގެ ޒިންމާދާރުވެރިޔާއާ އެކު، އިސް މުވައްޒަފަކު މަސް ދުވަހަށް ސަސްޕެންޑްކޮށްފިއެވެ.
ސަސްޕެންޑްކޮށްފައި ވަނީ ގއ. އަތޮޅު ކައުންސިލްގެ ޒިންމާދާރުވެރިޔާ މުހައްމަދު ނަސީރު އަލީ އާއި އެސިސްޓެންޓް ޑިރެކްޓަރު މުހައްމަދު ހަސަންއެވެ. ސިވިލްސާވިސް ކޮމިޝަނުން އެ ދެބޭފުޅުން ސަސްޕެންޓުކޮށްފައި ވަނީ އަންނަ މަހުގެ 18 ވަނަ ދުވަހުގެ ނިޔަލަށެވެ.
އެ ދެ ބޭފުޅުން ސަސްޕެންޓްކޮށްފައި ވަނީ ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ހުވަދޫއަށް ކުރެއްވި ދަތުރުފުޅާ ގުޅިގެން، ދައުލަތުގެ މުދަލާއި ތަކެތި ސިޔާސީ ބޭނުމަށް، ބޭނުން ކުރި ކަމަށް ކޮށްފައިވާ ތުހުމަތަކާ ގުޅިގެންނެވެ.
ގއ. ވިލިނގިލީގައި ހުންނަ އެ އަތޮޅު ކައުންސިލް އިދާރާގައި މަސައްކަތް ކުރައްވާ އެ ދެ ބޭފުޅުންނަށް ސިވިލްސާވިސް ކޮމިޝަނުން ފޮނުވި ނޯޓިސްގައި ބުނެފައި ވަނީ އެ މައްސަލަ ތަހުގީގު ކުރަމުންދާތީ، މުސާރަ ލިބޭ ގޮތަށް 30 ދުވަހަށް މަސައްކަތަށް ނުކުތުން މަނާކޮށްފައިވާ ކަމަށެވެ.
ގއ. އަތޮޅު ކައުންސިލްގެ ޒިންމާދާރުވެރިޔާ އާއި އެ އޮފީހުގެ އިސް މުވައްޒަފަކު ސަސްޕެންޑްކޮޮށްފައިވާއިރު، ކައުންސިލްގެ ރައީސް އަހުމަދު ފުއާދު ވެސް ހުންނެވީ ސަސްޕެންޝަނުގައެވެ.
ފުއާދު "ރާއްޖެއެމްވީ"އަށް ވިދާޅުވީ އުސޫލުގެ ތެރެއިން މުވައްޒަފުން ކުރަމުން ގެންދިޔަ ކަންތައްތަކެއް ސިޔާސީ ކަމަކަށް ހަދައި، އެ މުވައްޒަފުން ސަސްޕެންޑްކޮށްފައި ވަނީ ސަރުކާރުން ބޭނުންވާ ކަންތައްތަކެއް އަތޮޅު ކައުންސިލްގެ ތެރެއިން ކުރުމަށް ކަމަށެވެ.
