ވޯޓުގެ ނަތީޖާ އަކީ ސަރުކާރުން ގަބޫލު ކުރާ ނަތީޖާއަކަށް ނުވާނެ: އިބޫ
އިންތިޚާބު ގަޑުބަޑު ކުރުމަށް މަސައްކަތް ކުރާބަޔަކު އެޅެފާނެ ކަމަށް ވިދާޅުވި
ފ. ދަރަނބޫދޫ ގެ ސަޕޯޓަރުންނާއި އިބޫ ސަލާމް ކުރައްވަނީ
ސެޕްޓެމްބަރު 23 ގައި އޮންނަ ރިޔާސީ އިންތިޚާބުގެ ވޯޓުގެ ނަތީޖާ އަކީ ސަރުކާރުން ގަބޫލުކުރާ ނަތީޖާއަކަށް ނުވާނެ ކަމަށް ގުޅިފައިވާ ސިޔާސީ ޕާޓީ ތަކުގެ ކެންޑިޑޭޓް އިބްރާހިމް މުހައްމަދު ސާލިޙް (އިބޫ) ވިދާޅުވެއްޖެ އެވެ.
ގުޅިފައިވާ ސިޔާސީ ޕާޓީތަކުން ފ އަތޮޅަށް ކުރަވަމުން ގެންދަވާ ކެމްޕޭން ދަތުރުފުޅުގައި އެ އަތޮޅު ދަރަނބޫދޫގައި ވާހަކަ ދައްކަވަމުން އިބޫ ވިދާޅުވީ އިންތިޚާބަށް ނުފޫޒު ފޯރުވާ އިންތިޚާބު ގަޑުބަޑު ކުރުމަށް މަސައްކަތް ކުރާބަޔަކު އެޅެފާނެ ކަމަށާއި ނަމަވެސް ރައްޔިތުން ތިބީ އެ ފުރުސަތު ދޭކަށް ނޫން ކަމަށެވެ.
"ރައްޔިތުންތިބީ ރައްޔިތުން ބޭނުންވާ ގޮތް މިހާރުވެސް ނިންމައިގެން. ހަމައެކަނި ވޯތު ފޮށި ބެހެއްޓީމާ ގޮސް އެ ވޯޓުފޮއްޓަށް ވޯޓު ލުމަށް ތައްޔާރަށް. މި ސަރުކާރަކަށް ރައީސް އ ޔާމީނަކަށް ތާއީދު ނެތް. އެހެން ކަމުން ކުރިމަތިވެދާނެ ގޮން ޖެހުމަކަށް ތައްޔާރަށް ތިބީމާ ރަނގަޅުވާނެ" އިބޫ ވިދާޅުވިއެވެ.
އިބޫ ވިދާޅުވީ ކުރިއަށް އޮތް ރިޔާސީ އިންތިޚާބަކީ މުހިއްމު އިންތިޚާބެއް ކަމަށާއި ރައްޔިތުންނަށް ގޮތް ނިންމުމަށް ލިބޭ ފުރުސަތަކީ އިންތިޚާބު ކަމަށެވެ.
"އެއީ ވަކި ފަރާތެއްގެ މަޖުބޫރިކަމެއް ނެތި ތިމާ އަމިއްލައަށް ވޯޓު ލުމުގެ އިޚްތިޔާރު ތިމާ އެދޭގޮތް ކަނޑައެޅުމުގެ އިޚްތިޔާރް ކޮންމެ ރައްޔިތަކަށް ލިބޭ ދުވަސް. އެދުވަހަކީ އަޅުގަނޑުމެން މި ކުރާ އުއްމީދުތައް ހަގީގަތަކަށް ހެދުމަށް ތި ބޭފުޅުންނަށް ގޮތް ނިންމޭނެ ދުވަސް" އިބޫ ވިދާޅުވިއެވެ.
ރާއްޖޭގެ ކަންކޮޅުތަކަށް ކުރައްވަމުން ގެންދަވާ ދަތުރުފުޅުގައި ކޮންމެ ރަށަކުންވެސް ފެންނަނީ މި ބަދަލު ގެންނަން ތައްޔާރަށް ތިބި މަންޒަރު ކަމަށް އިބޫ ވިދާޅުވިއެވެ. އަދި އަމާންކަމާއި އޮމާން ކަންމަތީގައި އެދުވަސް ނިމިގެން ދިއުން އެއީ އެދޭ ގޮތްކަމަށް އިބޫ ވިދާޅުވުއެވެ.
