ޒުވާނުންގެ އަޑު އެހުމަށް ކައުންސިލެއް އުފައްދާނަން، ނިންމުންތައް ނިންމުމުގައި ރައްޔިތުންގެ އަޑު އަހާނަން: އިބޫ
ރައްޔިތުންގެ މަޖިލީހުގެ މަސައްކަތްތައް ރައްޔިތުންނާއި ގާތުން މަސައްކަތްކުރުމަށް މަގުފަހިކޮށްދޭނަން
ބިލެތްދޫގައި ބޭއްވި ޖަލްސާގައި އިބޫ ވާހަކަފުޅު ދައްކަވަނީ
ގުޅިފައިވާ އިއްތިހާދުގެ ސަރުކާރަކީ ވަކި މީހެއްގެ ސަރުކާރެއް ނޫން ކަމަށާއި، އެ ސަރުކާރަކީ ރައްޔިތުންގެ ސަރުކާރަކަށް ހައްދަވާނެކަން ވިދާޅުވެ ސަރުކާރުގެ ނިންމުންތަކަށް ބަސް ކިޔުމަށް ޒުވާނުންގެ ހާއްސަ ކައުންސިލެއް އުފައްދަވާނެ ކަމަށް ކެންޑިޑޭޓް އިބްރާހިމް މުހައްމަދު ސޯލިހް ވައުދުވެވަޑައިގެންފި އެވެ.
ގުޅިފައިވާ އިއްތިހާދުން އެކުލަވާލާ ސަރުކާރަކީ އެންމެ މީހެއްގެ ސަރުކާރެއް ނޫން ކަމަށާއި، އެންމެ ޕާޓީއެއްގެ ވެރިކަމެއްވެސް ނޫން ކަމަށް އިބޫ ވިދާޅުވި އެވެ. އަދި އުފެދިގެންދާ ސަރުކާރަކީ ރައްޔިތުންގެ ސަރުކާރެއް ކަމަށާއި، އެ ސަރުކާރުގައި ރައްޔިތުންގެ ބަސް އަޑުއަހާނެ ކަމަށް އިބޫ ވިދާޅުވި އެވެ. ޒުވާނުންގެ ބައިވެރިވުން އިތުރުކުރައްވާނެކަން ފާހަގަކޮށް އިބޫ ވިދާޅުވީ ސަރުކާރަށް ކަންކަން ހުށައެޅުމަށް މިނިވަން ކައުންސިލެއް އުފައްދަވާނެ ކަމަށެވެ.
އޭގެއިތުރުން ރައްޔިތުންގެ މަޖިލީހުގެ މަސައްކަތްތައްވެސް ރައްޔިތުންނާއި ގާތުން ކުރިއަށްގެންދިއުމުގެ ކަންތައްތައް ހަމަޖައްސަވާނެ ކަމަށް އިބޫ ވިދާޅުވި އެވެ. އަދި ޕެޓިޝަން ހުށައެޅުމުގެ ފުރުސަތާއި، އެ ޕާޓިޝަންތަކަށް ބަހުސް ކުރުމުގެ ފުރުސަތުތައް ފުޅާ ދާއިރާއެއްގައި ހުޅުވާލެވިގެންދަނެ ކަމަށް އިބޫ ވިދާޅުވި އެވެ. އެމަނިކުފާނު ވިދާޅުވީ މުޅި ވެރިކަމުގެ ނިޒާމް ބައްޓަންކުރައްވާނީ ރައްޔިތުންނާއި ގާތުން ވެރިކަން ކުރެއްވުމަށް ކަމަށެވެ.
ބިލެތްދޫއަށް ވަޑައިގެން އިބޫ އެ ރަށު ރައްޔިތުންނާއި ސަލާމްކުރައްވަނީ -- ފޮޓޯ: ރާއްޖެ.އެމްވީ
އިބޫ ވިދާޅުވީ ރާއްޖޭގެ ހުރިހާ ދިމާލަކުންވެސް އިވުނީ އެއް އަޑެއް ކަމަށެވެ. އެއީ އިންސާފާއި، ހަމަހަމަކަން ނެތުމާއި، އަނިޔާވެރިކަމާއި ކޮރަޕްޝަނާއި، ވައްކަމާއި ފަސާދައަށް ރައްޔިތުން ނޫނެކޭ ބުނާ އަޑު ކަމަށެވެ. އެގޮތުން ޖަލުގައި ތިބި ފަރާތްތަކަށް ފޯނު ކޯލްތައް ކުރުމުގެ ފުރުސަތުވެސް ބަންދުކޮށްފައިވާކަން ފާހަގަކޮށް އިބޫ ވިދާޅުވީ އެކަމުންވެސް މި ސަރުކާރުގެ އަނިޔާވެރިކަން އެނގޭކަމަށެވެ. އަދި ސަރުކާރުގެ އަނިޔާވެރިކަމަށް ރައްޔިތުން ދެކޮޅު ކަމަށާއި، ރައްޔިތުން މަޑުކޮށްގެން ތިބީ މި މަހުގެ 23 ވަނަ ދުވަހަށް ކަމަށް އިބޫ ވިދާޅުވި އެވެ. އެމަނިކުފާނު ވިދާޅުވީ އެ ދުވަހުގެ ވޯޓުގައި އެ ހުރިހާކަމަކަށް ރައްޔިތުން ނޫނެކޭ ބުނާނެ ކަމަށެވެ.
ބިލެތްދޫއަށްވެސް ގިނަ ކަންތައްތަކެއް ކޮށްދެއްވާނެކަން ވައުދުވެވަޑައިގެން އިބޫ ވިދާޅުވީ ރަށުން ގޯތި ދޫކުރުމުގެ އިންތިޒާމް ހަޖައްސަވައި، ބިން ނެތްކަމުގައިވާ ނަމަ ބިން ހިއްކަވާނެ ކަމަށެވެ. އަދި ބިލެތްދޫ ބަނދަރު ބޮޑުކޮށް ދެއްވާނެ ކަމަށާއި، ބިލެތްދޫއަކީ ފާނައިގެ މަސްވެރިކަން ކުރާ ރަށަކަށްވާއިރު، ހާއްސަ ދިރާސާތައް ކުރެވި އެކަމަށް ހާއްސަ ސަމާލުކަމެއްދެއްވައި ރައްޔިތުންނަށް މަންފާ ލިބޭގޮތް ހައްދަވާނެ ކަމަށް އިބޫ ވައުދުވެވަޑައިގެންނެވި އެވެ.
ބިލެތްދޫގެ ބައެއް ޒުވާނުންނާއެކު އިބޫ ފޮޓޯއެއް ނަންގަވަނީ -- ފޮޓޯ: ރާއްޖެ.އެމްވީ
ރާއްޖޭގެ ގިނަ ރަށްތަކަށް ވަޑައިގެންނެވިފައިވާކަން ފާހަގަކޮށް އިބޫ ވިދާޅުވީ ރައްޔިތުން ކިޔުއްވި މަރުހަބާއަށް ޝުކުރު ދަންނަވާ ކަމަށެވެ. އަދި އެއީ ރައްޔިތުން ނުހަނު ގިނަ ވަގުތާއެކު ގިނަ ހޭދަތަކެއް ކޮށްގެން މަރުހަބާ ދެންނެވުމަށް ކުރި މަސައްކަތްތަކެއްކަން ފާހަގަކޮށް، ރާއްޖޭގެ ހުރިހާ ރަށަކަުންވެސް އިއްތިހާދުގެ ޓީމަށް ކިޔުއްވި ހޫނު މަރުހަބާއަށް ވަނީ ޝުކުރު ދަންނަވައި، އެކަން އަބަދުވެސް ފާހަގަކުރައްވާނެކަމަށް ވިދާޅުވެފަ އެވެ.
