ނޮޅިވަރަމްގެ ގޮނޑުދޮށުން ވެލިނަގައިގެން އެރަށު ބަނދަރު ހަދާތީ ރައްޔިތުން ނުކުމެ މަސައްކަތް ހުއްޓުވައިފި
ބަނދަރު ހަދަނީ ކުރެހުމާ އެއްގޮތަށް ކަމަކަށް ނުބެލެވޭ
ނޮޅިވަރަމްގެ ގޮނޑުދޮށް ކޮންނަ ކަމަށް ބުނާ ފޮޓޯ
ހދ. ނޮޅިވަރަމް ބަނދަރު މަރާމާތު ކުރުމުގެ މަސައްކަތަށް އެރަށު ގޮނޑުދޮށުން ވެލި ނަގަމުންދާކަމަށް ބުނެ ރައްޔިތުން ނުކުމެ މަސައްކަތް ހުއްޓުވައިފިއެވެ.
ނޮޅިވަރަމް ކައުންސިލްގެ ރައީސް އިބްރާހީމް ރަޝީދުވެސް ވަނީ އެކަން ރާއްޖެ އެމްވީއަށް ކަށަވަރުކޮށް ދެއްވާފައެވެ.
ކައުންސިލްގެ ރައީސް އިބްރާހީމް ރަޝީދު ވިދާޅުވީ ބަނދަރުގެ ފައިކަށި ހެދުމުގެ މަސައްކަތް އެމްޓީސީސީން ކުރަމުން ދަނީ ވަރަށް ދަށް ފެންވަރަކަށް ކަމަށާއި އެކަން ކުރަނީ ކުރެހުމާއެއްގޮތަށް ޤަބޫލް ނުކުރެވޭ ކަމަށެވެ.
ރަޝީދު ވިދާޅުވީ ބަނދަރުގައި ޖަހަމުން ދަނީ ޖަހަން ޖެހޭ ވަރަށްވުރެ މާ ކުދި ހިލަ ކަމަށާއި ވެލި ވެސް އަޅަނީ އެއޮންނަ މިންވަރަށްވުރެ ވެސް ގިނައިން ކަމަށެވެ. އަދި މިހާރު އެހަދާގޮތަށް ފައިކަށީގެ މަސައްކަތް ކޮށް ނިންމައި ދޫކޮށްލައިފި ނަމަ ރާޅުބޮޑެތި މޫސުމް އައުމުން ވެލިގަނޑު ދަމައިގަނެ އެތޮށިގަނޑު ވެއްޓިގެން ދާނޭ ކަމަށް ވެސް އޭނާ ވިދާޅުވިއެވެ.
ރަޝީދު ވިދާޅުވީ ބަނދަރު ހަދާގޮތާމެދު އިންތިހާއަށް ކަންބޮޑުވުން ހުއްޓާ ފެނިގެން ދިޔައީ ރަށުގެ ގޮނޑުދޮށް ކޮނެގެން ވެލި ފުރާނައިގެން ގަލާއި ވެލިއަޅާތަން ކަމަށެވެ. އަދި އެކަމާ ނުރުހި ރައްޔިތުން ނުކުމެ މަސައްކަތް ހުއްޓުވާފައިވާކަމަށް ވެސް ރަޝީދު ވިދާޅުވިއެވެ.
ކައުންސިލްގެ ރައީސް ވިދާޅުވީ ރަށުގެ ގޮނޑުދޮށް ކޮނެގެން ވެލި ނު ނެގުމަށް ވެސް މިހާރު އަންގާފައިވާނޭ ކަމަށާއި އެމްޓީސީސީގެ ބޭފުޅުންނާ ވާހަކަ ދައްކައިގެން މައްސަލަ ހައްލުކުރުމަށް މަސައްކަތް ކުރަމުންދާ ކަމަށެވެ.
މިކަމާ ގުޅޭގޮތުން އެމްޓީސީސީގެ ބަހެއް އަދި ލިބިފައެއް ނުވެއެވެ.
