މި އަހަރުގެ ޖުލައި އިން ސެޕްޓެމްބަރު މަހަށް އުފެއްދި ވަޒީފާތައް އުވާލައި، ޕެންޝަން ދޭ މީހުންގެ އުމުރު 70 އަހަރަށް ބަދަލު ކުރުމަށް ރައީސް އަބްދުﷲ ޔާމީން ނިންމި ކަމަށް އަންގައިދޭ ލިޔުމަކީ ފޭކެއް ކަމަށް ރައީސް އޮފީހުގެ ތަރުޖަމާނު އިބްރާހިމް މުއާޒް އަލީ ވިދާޅުވެއްޖެއެވެ.
މުއާޒް ވިދާޅުވީ، ސިޓީގެ ނަންބަރަކީ ރައީސް އޮފީހުގެ ނަންބަރެއް ނޫން ކަމަށާއި އެސިޓީގެ ނަންބަރަކީ ޓުއަރިޒަމް މިނިސްޓްރީއަށް ނިސްބަތްވާ ނަންބަރެއް ކަމަށެވެ. އެއީ ރައްޔިތުންނަށް އޮޅުވާލުމަށް އިދިކޮޅު ފަރާތްތަކުން ކޮށްފައިވާ ފިނޑި، ދަށުދަރަޖައިގެ އަމަލެއް ކަމަށް އޭނާ ވިދާޅުވިއެވެ.
ސޯޝަލް މީޑިއާގައި ދައުރުވާ ސިޓީއަކީ ރައީސް އޮފީހުން ފިނޭންސް މިނިސްޓްރީއަށް ފޮނުވާފައިވާ ސިޓީއެކެވެ. އެ ސިޓީގައި ސޮއިކުރައްވާފައި ވަނީ އަންޑަރ ސެކްރެޓަރީ މޫސާ ފަތުހީ އެވެ.
އެސިޓީގައި ބަޔާންކޮށްފައިވާ ގޮތުގައި ޖުލައި 2018 އިން ފެށިގެން ސެޕްޓެމްބަރު 2018ގެ ނިޔަލަށް އަލަށް އުފައްދާ ވަޒީފާތަކުގެ މުސާރަ އާއި އިނާއަތްތައް އެމަގާމު އުފެއްދި ތާރީހުން ފެށިގެން ސެޕްޓެމްބަރު 2018 ގެ ނިޔަލަށް ހަމަޖައްސަވަމުން ގެންދިއުމަށާއި އެ ތާރީހުގެ ފަހުން އެމަގާމުތައް އުވާލުމަށް ހަމަޖެހިފައި ވާތީ 2019 ވަނަ އަހަރުގެ ބަޖެޓް ހެދުމުގައި އެ މަގާމުތަކުގެ މުސާރަތައް ނުހިމެނެއްވުމަށް ރައީސުލްޖުމްހޫރިއްޔާ ވިދާޅުވެފައިވާ ކަމަށެވެ.
"Mees media gai dhaurukuraa mi sitee akee #fake sitee eh! Sitee ge number aky Raees ofyhuge number eh noon! Number 88 beynu kurany @TourismMv sitee thakugai. Miee, rayyithunnah olhuvaalumah, idhikolhu faraaiythakun kohfaivaa findi, dhashudharajaige maayoosee amaleh!" -im pic.twitter.com/cGDdkwbRLB
— ɪʙʀᴀʜɪᴍ ᴍᴜᴀᴢ ᴀʟɪ (@SpokespersonMV) September 17, 2018
މީގެ އިތުރުން ރިޓަޔަރކުރާ އުމުރު 70 އަހަރަށް ބަދަލުކުރުމަށް ރައީސް އޮފީހުން ނިންމާފައި ވާތީ 2019 ވަނަ އަހަރަށް ލަފާކުރާ ބަޖެޓުގައި ޖެނުއަރީ 2019 އަށް އުމުރުން 65 އަހަރު ފުރި 70 އަހަރު ނުފުރޭ މީހުންނަށް ދެވޭ އެލަވަންސް ނުހިމެނުމަށް ދެއްނެވުމަށް ވެސް ރައީސް ވިދާޅުވެފައިވާ ކަމަށް ސިޓީގައި ބަޔާންކޮށްފައި ވެއެވެ.
މީގެ ކުރިން ވެސް ރައީސް އަބްދުﷲ ޔާމީން ވަނީ ޕެންޝަން ލިބޭ އުމުރު 70 އަހަރަށް މަތި ކުރައްވާނެ ކަމަށް ދޭހަވާ ފަދަ ގޮތަކަށް ވާހަކަފުޅު ދައްކަވާފައެވެ. އަދި 65 އަހަރު ވުމުން ވެސް 70 އަހަރު ވަންދެން ރިޓަޔަރ ނުކޮށް މަސައްކަތުގައި ހޭދަކުރުމުގެ ފުރުސަތު ދެއްވާނެ ކަމަށް ވިދާޅުވެފައެވެ. މީގެ އިތުރުން އުމުރުން ދުވަސްވީ މީހުންނަށް ދޭ އެލަވަންސް އިތުރު ކުރައްވާނެ ކަމަށް ރައީސް ވަނީ ވިދާޅުވެފައެވެ. ނަމަވެސް ސަރުކާރުން ބުނީ 65 އަހަރު ވުމުން މިހާރު ވެސް ލިބޭ ގޮތަށް އެލަވަނަސް ލިބެމުންދާނެ ކަމަށާއި 70 އަހަރު ވަންދެން މަސައްކަތުގައި ދެމިހުއްޓަސް މުސާރައިގެ އިތުރުން އެ އެލަވަންސް ލިބެމުން ދާނެ ކަމަށެވެ.
އުމުރުން ދުވަސްވީ މީހުންނަށް މިހާރު ދެނީ 5000ރ. އެވެ. މި އަދަދު ބޮޑުކުރުމަކީ ސަރުކާރުގެ ވައުދެކެވެ.
