ނޮޅިވަރަމްގެ ނަރުދަމާ ނިޒާމް ނިންމުން ފާހަގަކުރި އިރު މަސައްކަތް ނުނިމޭ!
16 ސެޕްޓެމްބަރު 2018 | އާދީއްތަ 09:29ނޮޅިވަރަމުގައި ނަރުދަމާގެ ނިޒާމް އިފްތިތާހް ކޮށްދެއްވާފައި ވަނީ މިދިޔަ ޖުލައިމަހުގެ 17 ވަނަ ދުވަހު ރައީސް
ހދ. ނޮޅިވަރަމުގައި ޤާއިމްކޮށްފައިވާ ނަރުދަމާ ގާއިމުކޮށް އެ ނިޒާމުގެ ޚިދުމަތް ރަޢީސުލްޖުމްހޫރިއްޔާ އަބްދުﷲ ޔާމިން ރަސްމީކޮށް ފައްޓަވައި ދެއްވަނީ
ހދ. ނޮޅިވަރަމްގެ ނަރުދަމާގެ ހިދުމަތް ރަސްމީކޮށް ރައީސް ޔާމިން އިފްތިތާހު ކޮށްދެއްވާފައިވާއިރު އެ ޚިދުމަތުގެ މަސައްކަތް ނުނިމޭ ކަމަށް އެރަށުގެ ކައުންސިލަރ ވިދާޅުވެއްޖެއެވެ.
ހދ. ނޮޅިވަރަމް ކައުންސިލްގެ ނާއިބު ރައީސް އަޙްމަދު ރަޝީދު އާދަމް ރާއްޖެއެމްވީއަށް ވިދާޅުވީ އެރަށުގެ ނަރުދަމާގެ މަސައްކަތް ނުނިމޭ ކަމަށާއި އެމަސައްކަތް ކުރާނެ މީހަކު އެރަށުގައި ނެތް ކަމަށެވެ. ޖުމްލަ 74.36 މިލިއަން ދިވެހި ރުފިޔާ ހަރަދުކޮށްގެން ގާއިމު ކުރި ކަމަށް ބުނާ ނަރުދަމާ ނިޒާމު އެމްޑަބްލިއުއެސްސީއާ ހަވާލުކޮށްފައި ވަނީ 2016 ވަނަ އަހަރުއެވެ.
ނޮޅިވަރަމުގައި ގާއިމްކޮށްފައިވާ ކަމަށް ބުނާ ނަރުދަމާގެ ނިޒާމް ހިންގައި ބަލަހައްޓާނީ، ފެނަކަ ކޯޕަރޭޝަނުން ކަމަށް، ސަރުކާރުން ވަނީ ބުނެފައެވެ.
އަޙްމަދު ރަޝީދު އާދަމް ވިދާޅުވީ ނަރުދަމާ ލުމަށް ގެއެއްގެ އިންފާރުން އެތެރެއަށް ކަނެކްޝަން ގުޅާލެވޭ ގޮތަށް ހޮޅިއެއް އަޅާލާފައިވާ ކަމަށެވެ. އެހެން ނަމަވެސް ހޮޅިއާއި ގޭގޭގެ ނަރުދަމާއާ ގުޅާލާފައި ނުވާ ކަމަށް އޭނާ ވިދާޅުވިއެވެ.
"ގޭގޭގެ ކަނެކްޝަން ވެސް ނުނިމޭ. ހަމައެކަނި މެއިން ލައިންތައް ގެއަށް ވައްދާފައި. އިތުރު މަސައްކަތެއް ނުކުރޭ. އެ މަސައްކަތް އިތުރަށް ފެއްޓެން އޮތީ ގޭގެ ވެރިފަރާތުން އަމިއްލައަށް ކުޑަ ޖަންކްޝަނެއް ހެދުމަށް ފަހު ފާޑެއްގެ ދާގަނޑެއް ލެއްވުމުން ކަމަށް ފެނަކައިން މީގެ ކުރިން ވަނީ ބުނެފައި. ނަރުދަމާގެ މަސައްކަތެއް މިރަށުން ނުނިމޭ،" އޭނާ ވިދާޅުވިއެވެ.
ނޮޅިވަރަމުގައި ނަރުދަމާގެ ނިޒާމް އިފްތިތާހް ކޮށްދެއްވާފައި ވަނީ މިދިޔަ ޖުލައިމަހުގެ 17 ވަނަ ދުވަހު ރައީސް އަބްދުﷲ ޔާމީނެވެ.
އަޙްމަދު ރަޝީދު އާދަމް ވިދާޅުވީ ނަރުދަމާ އިފްތިތާހުކޮށްދެއްވުމަށް ބޭއްވި ރަސްމިއްޔާތަކީ ސަރުކާރުން ބޭއްވި ރަސްމިއްޔާތެއް ކަމަށެވެ. އަދި އެ ރަސްމިއްޔާތުގެ ކަންތައްތަކުގައި އިސްކޮށް އުޅުނު މީހުންނާ ބައްދަލުކޮށް ރަށުގެ ރައްޔިތުން ނުރުހުންފާޅުކުރި ކަމަށް އޭނާ ވިދާޅުވިއެވެ.
ނަރުދަމާގެ ނިޒާމް ގާއިމްކުރުމަށް ހަވާލުކުރި އެއްވެސް މީހެއް އެރަށުގައި މިހާރު ނޫޅޭ ކަމަށް ވެސް އޭނާ ވިދާޅުވިއެވެ.
މަޝްރޫއުތައް އިފްތިތާހުކޮށް ނިމުން ފާހަގަކުރަމުންދާއިރު ނުނިމޭ ބައެއް މަޝްރޫއުތަކާއި ހޭދަކުރުމަށް ބުނާ ފައިސާއާ އެއްވަރަށް ރަށްރަށުގައި މަޝްރޫއުތައް ހިންގާފައި ނުވާ މައްސަލަ މީގެ ކުރިން ވެސް ވަނީ ފެންމަތިވެފައެވެ. އެ ގޮތުން ސަރުކާރުން ނެރުނު "ރަށްވެހި ތަރައްގީ" ރަށްރަށުގައި ބޮޑެތި ބިޔަ މަޝްރޫއުތައް ހިންގާފައިވާ ކަމަށް ބުނެ މިލިއަނުން އަދަދުތައް ޖަހާފައިވާ އިރު އެފަދަ ބައެއް މަޝްރޫއުތައް ނުފަށައި އަދި ނުނިމި ހުރި ކަން ވަނީ ފާހަގަކުރެވިފައެވެ.
