އިލެކްޝަންސް ކޮމިޝަން ޝަރީފާއި އަކްރަމް، ރައީސް ޔާމީންގެ ކެމްޕެއިން ހަރަކާތުގައި އުޅުއްވާ އިކްރާމް އާއެކު ހުޅުމާލޭގައި!
16 ސެޕްޓެމްބަރު 2018 | އާދީއްތަ 08:42އެ މޭޒުގައި ތިއްބެވީ ޝަރީފާއި އަކްރަމާއި އިކްރާމް އެކަނި
އިލެކްޝަންސް ކޮމިޝަނުގެ ރައީސް ޝަރީފް (ކ) ކޮމިޝަނުގެ މެމްބަރު އަކްރަމް (މ) އަދި ޕީއެސްއެމް ޑެޕިއުޓީ މެނޭޖިންގ ޑިރެކްޓަރ އިކްރާމް (ވ)
ރިޔާސީ އިންތިހާބު ބޭއްވުމަށް ހަފްތާއަކަށް ކައިރިވެފައި ވަނިކޮށް، އިލެކްޝަންސް ކޮމިޝަނުގެ ރައީސް އަހުމަދު ޝަރީފާއި އެކޮމިޝަނުގެ މެމްބަރު އަދި ތަރުޖަމާނު އަހުމަދު އަކްރަމް، އަދި ރައީސް އަބްދުﷲ ޔާމީން އަބްދުލްގައްޔޫމްގެ ކެމްޕެއިން ހަރަކާތްތަކުގައި ހަރަކާތްތެރިވެ ވަޑައިގަންނަވާ ދައުލަތުގެ މީޑިއާ ޕަބްލިކް ސާރވިސް މީޑިއާ (ޕީއެސްއެމް)ގެ ޑެޕިއުޓީ މެނޭޖިންގ ޑިރެކްޓަރ މުހައްމަދު އިކްރާމް އަބްދުއްލަތީފް ބައްދަލު ކުރައްވާ ފޮޓޯއެއް ސޯޝަލް މީޑިއާގައި އާއްމު ވެއްޖެ އެވެ.
އިލެކްޝަންސް ކޮމިޝަނުގެ ރައީސް ޝަރީފާއި އެކޮމިޝަނުގެ މެމްބަރު އަކްރަމް އަދި ރައީސް ޔާމީންގެ ކެމްޕެއިން ހަރަކާތްތަކުގެ ތެރެއިން ބާއްވާ ބައެއް ޖަލްސާތައް ތައާރަފް ކުރުމަށާއި ރައީސް ޔާމީނަށް ތައުރީފް ކުރެއްވުމުގައި އަވަދިނެތި އުޅުއްވާ އިކްރާމް އާއެކު ހުޅުމާލޭގައި ހުންނަ ރެސްޓޯރަންޓެއްގައި ތިއްބެވި މަންޒަފު ފެންނަ ފޮޓާއާ ގުޅިގެން އިލެކްޝަންސް ކޮމިޝަނުގެ ތަރުޖަމާނު އަކްރަމް ވިދާޅުވީ ކޮމިޝަނުގެ ރައީސް ޝަރީފާއެކު ހުޅުމާލެގައި ހުންނަ ރެސްޓޯރަންޓެއްގައި ކޮފީއެއް ބޯލަން އިންނަވަނިކޮށް އިކްރާމަށް އެތަން ފެނިފެން އޭނާ އެމޭޒުކައިރިއަށް ވަޑައިގެންނެވީ ކަމަށެވެ.
އަކްރަމް ވިދާޅުވީ މަގުމަތިންނާއި އެހެނިހެން ތަންތަނުން ވެސް ރައްޓެހިންނާ ދިމާވުމުން ހާލުއަހުވާލު އަހާލާ ވާހަކަ ދައްކަމުންދާ ބީދައިން އިކްރާމްއާ ވެސް ހުޅުމާލެއިން ބައްދަލު ވެފައިވަނީ އެބީދައިން ކަމަށެވެ. އެއީ މާބޮޑު މައްސަލައެއް އޮތް ކަމަކަށް ދެކިވަޑައި ނުގަންނަވާ ކަމަށްވެސް އަކްރަމް ވިދާޅުވި އެވެ.
އެ ފޮޓޯއަކީ މިދިއަ ހުކުރު ދުވަހުގެ ރޭ ހުޅުމާލޭގައި ހުންނަ ޑޯވ ރެސްޓޯރަންޓްގައި އެ ތިން ބޭފުޅުން ތިއްބަވަނިކޮށް ނަގާފައިވާ ފޮޓޯއެކެވެ. އެ ފޮޓޯއިން ފެންނަ ގޮތުގައި އެއީ ރޭގަނޑުގެ ވަގުތެކެވެ. އަދި ތިން ބޭފުޅުން ވެސް ތިއްބެވީ ގޮނޑީގައި ހަމަޖެހިލައިގެން ފޯނާ ކުޅުއްވާށެވެ.
އިކްރާމަކީ ދައުލަތުގެ މީޑިއާ ހިންގުމުގައި އުޅުއްވާ ރައީސް ޔާމީންގެ ޕީއެސްއެމް ބޯޑަށް އައްޔަން ކުރެއްވި ބޭފުޅެކެވެ. އަދި އިކްރާމް ގެންދަވަނީ ރައީސް ޔާމީން ބައިވެރިވެވަޑައިގަންނަވާ ބައެއް ޖަލްސާތަކުގައިވެސް އިސް ސަފުގައި ހަރަކާތްތެރިވެ ވަޑައިގަންނަވަމުން ނެވެ. އަދި ރައީސް ޔާމީންއަށް ސަނާ ކިޔުއްވުމުގައި އިކްރާމަކީ ފާހަގަ ކޮށްލެވޭ ބޭފުޅެކެވެ.
މިނިވަން އިންސާފުވެރި އިންތިހާބެއް ބާއްވާނެ ކަމާމެދު އިލެކްޝަންސް ކޮމިޝަނަށް ރައްޔިތުން ޝައްކު ކުރަމުންދާ މިދަނޑިވަޅުގައި އިކްރާމާއެކު އިލެކްޝަންސް ކޮމިޝަނުގެ ރައީސް ޝަރީފާއި އެކޮމިޝަނުގެ މެމްބަރު އަކްރަމް ބައްދަލު ކުރައްވާ ފޮޓޯއެއް ސޯސަލް މީޑިއާގައި އާއްމުވެފައިވާއިރު، ރިޔާސީ އިންތިހާބު ބޭއްވުމަށް ހަމަޖެހިފައި ވަނީ އަންނަ ހަފްތާގެ އާދިއްތަ ދުވަހު އެވެ.
