އިބޫގެ ކިބައިގައި ނެތް ތަޖުރިބާއަކީ ކޮރަޕްޝަނާއި ފަސާދަ: ވަހީދު
އިބޫއާއި ޔާމީންގެ ވަރަށް ބޮޑު ތަފާތެއް އެބަހުރި
ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ވައްޑެ)
ގުޅިފައިވާ ސިޔާސީ ޕާޓީތަކުގެ ކެންޑިޑޭޓުގެ ކިބައިގައި ނެތީ ކޮރަޕްޝަނާއި ފަސާދައިގެ ތަޖުރިބާ ކަމަށާއި ގާނޫނު އަސާސީގެ ބާރު ކަނޑުވާލާކަމުގެ ތަޖުރިބާއެއް ވެސް ނެތް ކަމަށް ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ވައްޑެ) ވިދާޅުވިއެވެ.
ގުޅިފައިވާ ސިޔާސީ ޕާޓީތަކުން ޅ. ނައިފަރުގައި ބޭއްވި ޖަލްސާގައި ވާހަކަ ދައްކަވަމުން ވަހީދު ވިދާޅުވީ ގުޅިފައިވާ ސިޔާސީ ޕާޓީތަކުގެ ކެންޑިޑޭޓާއި ޕީޕީއެމްގެ ކެންޑިޑޭޓް ރައީސް އަބްދުﷲ ޔާމީންގެ ވަރަށް ބޮޑު ތަފާތު އެބަހުރި ކަމަށާއި އިބޫގެ ކިބައިގައި ވައްކަމާއި ކޮރަޕްޝަނާއި ފަސާދާއިގެ ތަޖުރިބާއެއް ނެތް ކަމަށެވެ. އަދި އަދުލް އިންސާފު ގާއިމް ނުކުރުމުގެ ތަޖުރިބާއެއް ވެސް އިބޫގެ ކިބައިގައި ނެތް ކަމަށާއި ހަމަހަމަކަން ނައްތާލުމުގެ ތަޖުރިބާއެއް ވެސް ނެތް ކަމަށް ވަހީދު ވިދާޅުވި އެވެ.
"މަޝްވަރާގެ އުސޫލު ނެތްކަމުގެ ތަޖުރިބާއެއް ވެސް ނެތް، މިހެން ގޮސް މަގާމު ނުފޫޒުގެ ބޭނުންކޮށްގެން ބާރުގެ ބޭނުން ކުރުމުގެ ތަޖުރިބާއެއް ވެސް ނެތް. މިކަހަލަ ތަޖުރިބާތަކަކީ އަޅުގަނޑުމެންގެ ކެންޑިޑޭޓްގެ ފަރާތުން ބޭނުންވާ ތަޖުރިބާއެއް ނޫން،" ވަހީދު ވިދާޅުވި އެވެ.
ވަހީދު ވިދާޅުވީ މިފަދަ ތަޖުރިބާތަކުގެ ބަދަލުގައި ގުޅިފައިވާ ސިޔާސީ ޕާޓީ ތަކުގެ ކެންޑިޑޭޓަކީ މީހުންނާ ގުޅޭ ސޯލިހު ކިޔަމަންތެރި އިންސާފުވެރި އަދި އަހްލާދު ރަނގަޅު ކެންޑިޑޭޓެއް ކަމަށެވެ. އަދި މީހުންނާ ގުޅޭ އެކުވެރި، ކަންކަން ކުރަން ދަންނަ ކެންޑިޑޭޓެއް ކަމަށެވެ. މިކަން ސާބިތުވާ އެއް ސަބަބަކީ، ކުރީގެ ރައީސް މައުމޫން އަބްދުލް ގައްޔޫމު ތާއީދު ކުރާ ކެންޑިޑޭޓަކަށް އިބޫ ވެވަޑައިގަތުން ކަމަށާއި ގުޅިފައިވާ ސިޔާސީ ޕާޓީތަކުގެ ކެންޑިޑޭޓަކީ ވެސް އިބޫ ކަމަށާއި މީގެ އިތުރުން ދިވެހި ރައްޔިތުންގެ ކެންޑިޑޭޓަކަށް ވެސް ވާނީ އިބޫ ކަމަށް ވަހީދު ވިދާޅުވި އެވެ.
"ތިމާ އަމިއްލައަށް ވެރިކަން ކުރުމަށް ގިނަ ބަޔަކު ޖަލަށް ލައިގެން ވެސް ގިނަ ހައްގުތަކުން މަހްރޫމު ކޮށްގެން ވެސް ފެނިގެން ދަނީ ވެރިންކަން ލިބޭނެ ކަމަށް ހިސާބު ޖެއްސެވި ހުރިހާ ކަމެއް ފެއިލްވެފައިވާ މަންޒަރު،" ވަހީދު ވިދާޅުވިއެވެ.
