ދިރާގުން ބާއްވާ ރާއްޖޭގެ އެންމެ ބޮޑު "ރޯޑް ރޭސް"ގައި ޖަމިއްޔާތަކުން ބައިވެރިވުމުގެ މުއްދަތު މާދަމާ ހަމަވާނެއެވެ.

ކުރިން ހަމަޖައްސާފައިވާ ގޮތުން ބުރާސްފަތި ދުވަހަކީ، ޖަމިއްޔާތަކުން ދުވުމުގައި ބައިވެރިވާން ހުށަހަޅަންޖެހޭ އެންމެ ފަހު ދުވަހެވެ. ނަމަވެސް އެ ދުވަހު ވަނީ ހޮނިހިރު ދުވަހާ ހަމައަށް މުއްދަތު އިތުރުކޮށްފަ އެވެ.

ރޯޑް ރޭހުގައި އާއްމުން ބައިވެރިވުމުގެ ފުރުސަތު ހުޅުވާލާނީ އަންނަ އާދިއްތަ ދުވަހުން ފެށިގެން އަންނަ މަހުގެ 16 ވަނަ ދުވަހާ ހަމައަށް ކަމަށް ދިރާގުން ބުނެއެވެ.

އަންނަ ނޮވެމްބަރު މަހު ދެ ވަނަ ދުވަހު ބާއްވާ ދިރާގު ރޯޑް ރޭހުގައި 4،000 މީހުންނަށް ޖާގަ ދިނުމަށް މިއަހަރު ނިންމައިފަވެއެވެ. މީގެ ކުރިން ރޯޑު ރޭހުގައި ބައިވެރި ކުރަނީ 3،000 މީހުންނެވެ.

ދިރާގުން މި ރޭހުގެ ޓީޝާޓް ވިއްކަނީ 100ރ. އަށެވެ. އެގޮތުން ޓީޝާޓް ވިއްކައިގެން ލިބޭ ފައިސާ ހަދިޔާކުރާނީ، އެ ދުވުމުގައި ބައިވެރިވާ ޖަމިއްޔާތަކަށް ކަމަށް ދިރާގުން ބުނެއެވެ. މި ރޯޑް ރޭސް ދިރާގުން ބާއްވަމުން އަންނަތާ 12 އަހަރު ވަނީ ވެފައެއެވެ.