ސުޕްރީމް ކޯޓަށް ހާޒިރުވުމަށް ޝަމީމަށް އަންގައިފި
12 ސެޕްޓެމްބަރު 2018 | ބުދަ 19:03މިހާތަނަށް ދެ ފަހަރެއްގެ މަތިން ސަސްޕެންޑް ކުރެވުނު
ގާނޫނީ ވަކީލު ހުސައިން ޝަމީމް
ސުޕްރީމް ކޯޓަށް ހާޒިރުވުމަށް، ކުރީގެ ޑެޕިއުޓީ ޕްރޮސެކިއުޓަރ ޖެނަރަލް ހުސައިން ޝަމީމަށް އެ ކޯޓުން އަންގައިފިއެވެ.
ސުޕްރީމް ކޯޓުން ބަލަމުންދާ މައްސަލައަކާ ގުޅިގެން ބުރާސްފަތި ދުވަހުގެ ހެނދުނު 11:00 އަށް އެ ކޯޓަށް ހާޒިރުވުމަށް އަމުރުކޮށް، ޝަމީމާއި ވަނީ ޗިޓު ހަވާލުކޮށްފައެވެ.
ޝަމީމަކީ މިފަހުގެ ތާރީޚެއްގައި އެންމެ ދިގު މުއްދަތަކަށް ސުޕްރީމް ކޯޓުން ސަސްޕެންޑް ކުރި ވަކީލެވެ. އެގޮތުން މިހާތަނަށް ދެ ފަހަރެއްގެ މަތިން އޭނާ ސަސްޕެންޑް ކޮށްފައިވާއިރު، އެންމެ ފުރަތަމަ ސަސްޕެންޑް ކުރީ 2015 ވަނަ އަހަރުގެ ނޮވެމްބަރުގައެވެ. އޭގެ ފަހުން ސަސްޕެންޝަން އުވާލައި ހުއްދަ ދިނީ ދެ އަހަރަށް ވުރެ ގިނަ ދުވަސް ފަހުން މިއަހަރުގެ ޖެނުއަރީގައެވެ.
އޭގެ ފަހުން މިއަހަރުގެ ފެބްރުއަރީ 22 ވަނަ ދުވަހު ވެސް އޭނާ ސަސްޕެންޑް ކުރިއިރު، އަނބުރާ ހުއްދަ ދިނީ ޖުލައި މަހުގައެވެ.
ޝަމީމް މަތީ ތައުލީމް ހާސިލް ކުރެއްވީ މިސްރުގެ އަލްއަޒްހަރު ޔުނިވަރސިޓީއިންނެވެ. މިހާރުގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީއަކީ ޝަމީމާއެކު ކިޔަވާ ވިދާޅުވާން އުޅުއްވި ބޭފުޅެކެވެ.
