މިއީ އަނިޔާވެރި ފަސް އަހަރު، އަޅުގަނޑުމެން މި ރާއްޖެ ސަލާމަތްކުރާނަން: އިބޫ
11 ސެޕްޓެމްބަރު 2018 | އަންގާރަ 12:25އިސްރާފު ހުއްޓުވައި، ރާއްޖެ ތަރައްޤީކުރާނަން
ކުޑަފަރި ރައްޔިތުންނާއި މުހާތަބުކުރައްވާ އިބޫ ވާހަކަފުޅުދައްކަވަނީ
ނިމިގެންދާ ވެރިކަމުގެ ފަސް އަހަރަކީ އަނިޔާވެރި، އަދުލު އިންސާފު ގެއްލުވާލި، ވައްކަމާއި ކޮރަޕްޝަން އިންތިހާއަށް އިތުރުވި ފަސް އަހަރުކަމަށާއި، ކުރިއަށް އޮތް ރިޔާސީ އިންތިހާބުގައި ރާއްޖެ ސަލާމަތްކުރައްވާނެކަމަށް ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ވިދާޅުވެއްޖެ އެވެ.
ނ. އަތޮޅަށް ކުރައްވާ ކެމްޕޭން ދަތުރުފުޅުގެ ތެރެއިން ނ. ކުޑަފަރިއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވާ އިބޫ ވިދާޅުވީ ކޯލިޝަނެއްގެ ގޮތުގައި މަސައްކަތްކުރަންޖެހުނީ ގިނަ ސަބަބުތަކާއި ހުރެ ކަމަށެވެ. އެގޮތުން ނިމިގެންދާ ވެރިކަމުގެ ފަސް އަހަރަކީ އެންމެ އަނިޔާވެރި އަދި އަދުލު އިންސާފު ގެއްލުވާލި ފަސް އަހަރުކަމަށާއި، ކޮރަޕްޝަނާއި ވައްކަން އެންމެ ބޮޑުވި ފަސް އަހަރުކަމަށް އިބޫ ވިދާޅުވި އެވެ. އަދި ކުރިއަށް އޮތް ރިޔާސީ އިންތިހާބުގައި އެ ހުރިހާކަމަކުން ޤައުމު ސަލާމަތްކުރައްވާނެކަމަށް އިބޫ ވިދާޅުވި އެވެ.
އިބޫ ވިދާޅުވީ 2008 ވަނަ އަހަރު އެމްޑީޕީ ވެރިކަމާއި ހަވާލުވިއިރު ދައުލަތަށް އާމްދަނީގެ ގޮތުގައި ލިބެނީ ގާތްގަޑަކަށް 8 ބިލިއަން ރުފިޔާކަމަށެވެ. ނަމަވެސް އެމްޑީޕީ ސަރުކާރުން ތައާރަފްކުރި ޓެކްސް ނިޒާމާއެކު ދައުލަތަށް މިހާރު އާމްދަނީގެ ގޮތުގައި ގާތްގަޑަކަށް 18 ބިލިއަން ލިބޭ ކަމަށާއި، އެ ހުރިހާ ފައިސާއަކުންވެސް އިތުރު ތަރައްޤީއެއް ގެނެވިފައިނުވާކަމަށެވެ. އަދި ސަބަބެއްކަމަށް އިބޫ ވިދާޅުވީ ދައުލަތަށް ބޮޑު އާމްދަނީއެއް ލިބުނު ނަމަވެސް ދައުލަތުގެ އިސްރާފު ބޮޑުވެފައިވުމާއި، ކޮރަޕްޝަންގެ ގޮތުގައި ފައިސާތައް ބޭނުންކުރުން ކަމަށެވެ.
"އެއް ނަރުދަމާ މި އަޅަނީ 3 ނަރުދަމާ އެޅޭ އަގުގައި. އަޅުގަނޑުމެންގެ ސަރުކާރުގައި މިކަން ހުއްޓާނަން"
އިބޫގެ ވާހަކަފުޅުގައި ވަނީ އެމަނިކުފާނުގެ ވައުދުތައް ތަކުރާރުކޮށް ވިދާޅުވެދެއްވާފަ އެވެ. އެގޮތުން ސިއްހީ ނިޒާމް ހަރުދަނާކުރުމުގެ މަސައްކަތްތަކުގެ ތެރެއިިން ކޮންމެ ރަށެއްގައިވެސް ރަނގަޅު ފެންވަރުގެ ލެބޯޓްރީ ހިދުމަތް ޤާއިމްކުރައްވާނެ ކަމަށް ވިދާޅުވިއެވެ.
އިބޫ ކުޑަފަރިއަށް ވަޑައިގަތުމުން އެ ރަށުންވެސް ވަނީ އެމަނިކުފާނަށް ހޫނު މަރުހަބާއެއް ދަންނަވާފަ އެވެ. އެގޮތުން ވެހެމުންދިޔަ ވާރޭގައިވެސް އިބޫއަށް މަރުހަބާ ދެންނެވުމަށް ގިނަ ބަޔަކު ނުކުމެތިބި އެވެ،
