ރިޔާސީ އިންތިޚާބުގެ ކަންކަން ހިނގަމުންދާ އިރު އެކި މީޑިއާތަކުން ގެނެސްދޭ ޚަބަރުތަކާ ގުޅިގެން ސަރުކާރުގެ ބައެއް މުއައްސަސާތަކުންނާއި އަމިއްލަ ފަރާތްތަކުން މިޑިއާ ކައުންސިލަށް ޝަކުވާ ހުށަހަޅަމުންދާތީ ގާނޫނީ އިމުގެ ތެރެއިން ތެދު ޚަބަރާއި މައުލޫމާތު ފެތުރުމަށް އެކައުންސިލުން އިލްތިމާސްކޮށްފިއެވެ.
މީޑީއާ ކައުންސިލުން ނެރުނު ބަޔާނުގައި ބުނެފައި ވަނީ އެ މީހެއްގެ ނަމާއި އަބުރު ރައްކާތެރިކުރުމުގެ ހައްގު ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 33 ވަނަ މާއްދާއިން ވަނީ ދިވެހި އެންމެހާ ރައްޔިތުންނަށް ކަށަވަރުކޮށްދީފައިވާ ކަމަށެވެ. އަދި އަބުރާ ބެހުމުގެ ބަހާއި އަމަލަކީ ކޮބައިކަން ގާނޫނު ނަންބަރު 2016/15 ގެ 10 ވަނަ މާއްދާގެ (ހ) ގެ 1 އާއި 2ގައި ބަޔާންކޮށްފައިވީ ހިނދު، އެގާނޫނުގެ 6 ވަނަ ބާބުގައި، މީޑިއާތަކުގެ ޒިންމާ އާއި ގާނޫނާއި ހިލާފުވުމުން މީޑިއާތަކުގެ އަޅާނެ ފިޔަވަޅުތައް ވެސް ބަޔާންކޮށްފައިވާ ކަމަށެވެ.
އެހެންކަމުން ރިޔާސީ އިންތިޚާބުގެ މިދުވަސްވަރަކީ އެންމެހާ މީޑިއާތައް މި ކަން ކަމަށް ޚާއްސަ ސަމާލުކަމެއް ދޭންޖެހޭ ދަނޑިވަޅެއް ކަމަށް ބަޔާނުގައި ވެއެވެ.
މި ދުވަސްވަރު މީޑިއާ ކައުންސިލުން މިކަންކަން މީޑިއާތަކުގެ ސަމާލުކަމަށް ގެންނަނީ ގާނޫނީ ހަމަތަކުން އެޅޭ ފިޔަވަޅެއްގެ ސަބަބުން އެއްވެސް މީޑިއާއަކަށް ނުވަތަ އެއްވެސް ނޫސްވެރިއަކަށް ލިބިދާނެ ގެއްލުމަކުން ސަލާމަތްކުރުމަށް ކަން ފާހަގަކޮށް ކައުންސިލުން ބުނީ ދުރާލައި މި ކަން ކަމަށް ތައްޔާރުވެ އަޅާ ފިޔަވަޅެއްގެ ގޮތުން ކަމަށެވެ. އަދި މިފަދަ ކަންކަމަށް މީޑިއާތައް ހޭލުންތެރިކުރުވުމަކީ އެކައުންސިލުގެ ޒިންމާއެއް ކަމުގައި ވާތީ ކަމަށް އެ ބަޔާނުގައި ވަނީ ބުނެފައެވެ.
އެހެންކަމުން އިންތިޚާބާ ބެހޭ ކަންކަން ހިނގަމުންދާއިރު ކަމާ ބެހޭ ގާނޫނާއި ގާވާއިދު ތަންދޭ އެންމެ ފުޅާ ދާއިރާއެއްގެ އިމުގެ ތެރޭގައި ތެދު ޚަބަރާއި މައުލޫމާތު ފެތުރުމަށް މީޑިއާ ކައުންސިލުން ވަނީ އިލްތިމާސް ކޮށްފައެވެ.
