އައްތަހިޔާތުގައި އެއް އިނގިލި ތަޅުވަނީ ޔާމީންގެ ކެންޑިޑޭޓް ނަމްބަރަށް ވެގެނެއް ނޫން، މުރުތައްދު ނުވޭ: އަލީ ޒާހިރު
7 ސެޕްޓެމްބަރު 2018 | ހުކުރު 21:38ރައީސް ޔާމީން ކިތަންމެ ވަރަކަށް ބުންޏަސް ﷲ ގެ އެއްކައުވަންތަ ކަމުގައި އެހެން ފަރާތްެއް ބައިވެރި ނުކުރާނެ
އަދާލަތު ޕާޓީގެ ނައިބު ރައީސް އަލީ ޒާހިރު
ނަމާދުގެ އައްތަހިޔާތުގައި ޝަހާދަތް އިނގިލި ތަޅުވަނީ ރިޔާސީ އިންތިޚާބުގައި ތާއީދު ކުރައްވާ ރައީސް އަބްދުﷲ ޔާމީންގެ ކެންޑިޑޭޓް ނަމްބަރަކީ އެއް ނަމްބަރަށް ވުމުން ނޫންކަމަށާއި މުރުތައްދު ނުވުމަށް އަދާލަތު ޕާޓީގެ ނައިބު ރައީސް އަލީ ޒާހިރު ގޮވާލައްވައިފިއެވެ.
"ބްރިޖު ސަޅި" ނަމުގައި ކާނިވާ ސަރަހައްދުގައި ބޭއްވި ޖަލްސާގައި ރައީސް ޔާމީން ވިދާޅުވެފައިވަނީ އެއް ނަމްބަރަކީ ކިޔަން އެންމެ ރަނގަޅު އަކުރު ކަމަށްވާނަމަ އައްތަހިޔާތުގައި أشهدُ أنْ لا إلهَ ކިޔަނީ އެއް އިނގިލި ތަޅުވަމުން ކަމަށާއި ދެ އިނގިލި ތަޅުވާނެކަމެއް ނެތްކަމަށެވެ.
"ދިވެހި ރައްޔިތުންނަށް އަޅުގަނޑު ދަންނަވާލަން ބޭނުންވޭ. ދޭއް އަންނާނީ އެކަކަށްފަހު ދެއްތޯ. އެކެއް އެއީ ކިޔަން އެންމެ ރަނގަޅު އަކުރު ކަމަށްވަންޏާ أشهدُ أنْ لا إلهَ ކިޔަނީވެސް އެއް އިނގިލި ތަޅުވަމުން އައްތަހިޔާތުގައި. ދެ އިނގިއްޔެއް ނުތަޅުވަން އަޅުގަނޑުމެންނެއް. ދެ އިނގިލިން ތަޅުވާނެކަމެއް ނެތް. ދެ ފިކުރެއް ނުގެންގުޅޭނެ އަޅުގަނޑުމެން" ރައީސް ޔާމީން ވިދާޅުވިއެވެ.
އެއަށް ރައްދު ދެއްވާ އަލީ ޒާހިރު ވިދާޅުވީ އެއްކައުވަންތަ ފަރާތަކީ ހަމައެކަނި ﷲ ކަމަށާއި ރައީސް ޔާމީން ކިތަންމެ ވަރަކަށް ވިދާޅުވިޔަސް ﷲ ގެ އެއްކައުވަންތަ ކަމުގައި އެހެން ފަރާތެއް ބައިވެރި ނުކުރާނެކަމަށެވެ. އަދި އައްތަހިޔާތުގަ އެއް އިނގިލި ތަޅުވަނީ ޔާމީންގެ ކެންޑިޑޭޓް ނަމްބަރަށް ވެގެނެއް ނޫން ކަމަށާއި މުރުތައްދު ނުވުމަށް އަލީ ޒާހިރު ވިދާޅުވިއެވެ.
