ފިޔޯރީގެ ރައްޔިތުން ރާއްޖެޓީވީގެ އަބުރުފުޅު ފަންޑަށް އެހީވެއްޖެ
7 ސެޕްޓެމްބަރު 2018 | ހުކުރު 10:58ފިޔޯރީގައި އަބުރުފުޅު ފަންޑަށް އެހީވުމަށް ހަރަކާތްތަކެއް ކުރިޔަށް ގެންގޮސްފައިވޭ
ފިޔޯރީގައި ހުޅުވި އަބުރުފުޅު ފަންޑަށް އެރަށު ރައްޔިތުން އެހީވަނީ
ބްރޯޑްކާސްޓިންގ ކޮމިޝަނުން ރާއްޖެޓީވީ 2 މިލިއަން ރުފިޔާއިން ޖޫރިމަނާކުރުމާއި ގުޅިގެން އެޖޫރިމަނާ ދެއްކުމަށް ފައިސާ ހޯދުމަށް ރާއްޖެޓީވީއިން ހުޅުވި އަބުރުފުޅު ފަންޑަށް ގދ. ފިޔޯރީގެ ރައްޔިތުން އެހީވެއްޖެއެވެ.
އަބުރުފުޅު ފަންޑަށް އެހީވުމުގެ ގޮތުން ފިޔޯރީގައި ހަރަކާތްތަކެއް ކުރިޔަށް ގެންދިޔައިރު އެރަށުން އެއްކުރި ފައިސާ ރާއްޖެޓީވީއާ ވަނީ ހަވާލުކޮށްފައެވެ. ފިޔޯރީގައި އަބުރުފުޅު ފަންޑު ފޮށިތަކެއް ހުޅުވިއިރު އެ ފޮށިތަކަށް ރާއްޖެޓީވީއަށް ހެޔޮއެދޭ ގިނަ އަދަދެއްގެ ރައްޔިތުން ވަނީ އެހީތެރިކަން ފޯރުކޮށްދީފައެވެ.
ފިޔޯރީގައި ދެ ފޮށްޓެއް ހުޅުވި
ފިޔޯރީގައި އަބުރުފުޅު ފަންޑު ފޮށި ހަރަކާތް ކުރިޔަށް ގެންދިޔަ އިސް ފަރާތަކުން ބުނެފައިވަނީ އެރަށުގެ ގިނަ ބަޔަކު ބަލަނީ ރާއްޖެ ޓީވީ ކަމަށާއި އެމީހުން ދެކޭ ގޮތުގައި ރާއްޖެ ޓީވީން ކުރަނީ ޤައުމީ މަސައްކަތެއް އަދި ޤައުމީ ޖިހާދެއް ކަމަށެވެ. އެގޮތުން ރާއްޖެ ޓީވީ ޖޫރިމާނާ ކުރުމަކީ އެރަށުގެ ރައްޔިތުންގެ ތެރެއިން ގިނަ ބަޔަކަށް ކުރި ޖެއްސުމެއް އަދި މަލާމާތެއް ކަމަށް އެމީހުން ދެކޭ ކަމަށެވެ. އަދި ޖާނާއި މާލު ދީގެން ވެސް ރާއްޖެ ޓީވީ ދެމެހެއްޓުމަށް ކުރެވެން ހުރި މަސައްކަތެއް ކުރާނެ ކަމަށް ވެސް އެމީހާ ބުންޏެވެ.
ބްރޯޑްކާސްޓިންގ ކޮމިޝަނުން ރާއްޖެޓީވީ ޖޫރިމަނާ ކުރުމާއެކު ރާއްޖޭގެ ގިނަ އަދަދެއްގެ ރަށްތަކުން އަންނަނީ ރާއްޖެޓީވީއިން ހުޅުވި އަބުރުފުޅު ފަންޑަށް އެހީތެރިކަން ފޯރުކޮށްދެމުންނެވެ.
