ފޭސް ރެކޮގްނިޝަން ޓެކްނޮލޮޖީ އެމްޑީޕީގައި އެބަހުރި: ޗެއާޕާސަން
7 ސެޕްޓެމްބަރު 2018 | ހުކުރު 08:42ބޭނުމަކީ ވަގު އައިޑީކާޑުން ވޯޓުލާ މީހުން ދެނެގަތުން
އިންސާނާގެ ސޫރަ އައިފޯނުން ދެނެގަންނަނީ
އިންސާނާގެ ސޫރައިން އޭނާގެ ވަނަވަރު ދެނެގަންނާނެ ގޮތް ނުވަތަ ފޭސް ރެކޮގްނިޝަން ޓެކްނޮލޮޖީ އެމްޑީޕީގައި އެބަ ހުރި ކަމަށް އެ ޕާޓީގެ ޗެއާޕާސަން ހަސަން ލަތީފު ވިދާޅުވެއްޖެއެވެ.
ރިޔާސީ އިންތިހާބުގައި އިތުރަށް ވޯޓުލުމަށް "ވަގު އައިޑީކާޑު" ހަދާފައިވާ ކަމަށް ތުހުމަތު ކުރައްވައި، ހއ. ދިއްދޫގައި ހުންނަވާ "ރާއްޖެޓީވީ"އަށް ދެއްވި އިންޓަވިއުއެއްގައި ހަސަން ވިދާޅުވީ ވަގު އައިޑީކާޑު ހިފައިގެން ގޮސް، އެ އައިޑީކާޑުގައިވާ މައުލޫމާތުތައް ނިސްބަތް ނުވާ މީހަކު އިންތިހާބުގައި ވޯޓުލާ ނަމަ އެކަން ދެނެގަންނާނެ ކަމަށެވެ.
"މިހާރު އެމްޑީޕީގައި އެބަހުރި ޓެކްނޮލޮޖީ އެ ވަގު އައިޑީކާޑު ހިފައިގެން ގޮސް ވޯޓުލާ މީހާގެ މޫނުން، އެ ފޮޓޯއިން، އޭނާއަކީ އެ އައިޑީކާޑުގައި ހުރި މައުލޫމާތު ހުރި މީހާ ނޫންކަން، ދެނެގަންނާނެ ޓެކްނޮލޮޖީ އެބަހުރި އެމްޑީޕީގަ. ފޭސް ރެކޮގްނިޝަން ޓެކްނޮލޮޖީ އެބަހުރި އެމްޑީޕީގަ،" ހަސަން ވިދާޅުވިއެވެ.
އޮޅުވާލައިގެން ވޯޓުލުމަށް މަސައްކަތްކުރާ މީހުންނަށް ހައްގު އަދަބު ލިބޭނެ ކަމަށް އިޝާރާތްކުރައްވައި ހަސަން ވިދާޅުވީ ވަގު އައިޑީކާޑު ހިފައިގެން ގޮސް، އިތުރަށް ވޯޓުލާން އުޅޭ މީހުން ގާނޫނީ ޒިންމާ އުފުލަން ޖެހޭނެ ކަމަށެވެ.
ފޭސް ރެކޮގްނިޝަން ޓެކްނޮލޮޖީ އެމްޑީޕީގައި ހުރި ކަމަށް އެ ޕާޓީން ބުނެފައި ވަނީ ސަރުކާރުންގެ އިދާރާއަކުން އެފަދަ ޓެކްނޮލޮޖީއެއްގެ ބޭނުން ކުރަން ފަށާފައި ނުވަނީހެވެ. އޭޝިއާ ސަރަހައްދުގައި ވެސް އެ ޓެކްނޮލޮޖީ ބޭނުން ކުރަނީ މަދު ގައުމަކުންނެވެ. މަގުތަކާއި މީހުން އެއްވެ އުޅޭ ތަންތަނުގައި ފޭސް ރެކޮގްނިޝަން ކެމެރާ ހަރުކޮށްގެން، މޮނީޓާ ކުރަމުންދާ އޭޝިއާގެ ގައުމުތަކަކީ ސިންގަޕޫރާއި މެލޭޝިއާގެ އިތުރުން ޗައިނާއެވެ.
