އެތައް އަހަރެއްވަންދެން ބަލިވެ އުޅުމަށްފަހު ހަނަގުރާމަވެރި ހައްޤާނީ ނެޓްވޯކްގެ ފައުންޑަރ މަރުވެއްޖެކަމަށް އަފްޣާނިސްތާނުގެ ތާލިބާނުން ހާމަކޮށްފިއެވެ.
ޖަލާލުއްދީން ހައްޤާނީއަކީ އަފްޣާނިސްތާނުގައި ފާހަގަކޮށްލެވޭ ހަނގުރާމަވެރިއެއްގެ އިތުރުން ތާލިބާނާއި އަލްގައިދާއާވެސް ގާތް ގުޅުމެއް އޮތް ހަނގުރާމަވެރިއެކެވެ.
ހައްގާނީ ޖަމާއަތް 2011 ވަނަ އަހަރުންފެށިގެން ކޮންޓްރޯލް ކުރަމުންދަނީ ޖަލާލުއްދީން ހައްޤާނީގެ ފިރެހެން ދަރިފުޅު ކަމަށްވަނީ ބެލެވިފައެވެ.
މި ވޭތުވެދިޔަ އަހަރުތަކުގައި އަފްޣާނިސްތާނުގައި ރޭވިގެން ދިން ގިނަ ހަމަލާތަކަކާއި ނޭޓޯގެ ފައުޖުތަކަށް ދިން ހަމަލާތަކުގެ ފަހަތުގައިވެސް އެ ޖަމާއަތްވެއެވެ.
ހައްޤާނީ މަރުވީ ކޮންއިރަކު ކޮންތާކު ކަމެއް ބަޔާނުގައި ބުނެފައެއްނުވެއެވެ.
ހައްގާނީ މަރުވެއްޖެ ކަމުގެ ދޮގު ޚަބަރުތައް މި ފަހުގެ އަހަރުތަކުގައިވަނީ ފެތުރިފައެވެ.
ޖަލާލުއްދީން ހައްޤާނީއަކީ ސޯވިއެޓް ޔޫނިއަންގެ ފައުޖުތަކުން 1980ގައި އަފްޣާނިސްނުގައި ހަނގުރާމަކުރިއިރު އެ ފައުޖުތަކާ ދެކޮޅަށް ހަނގުރާމަކުރި އަފްޣާނިސްތާނުގެ ގެރިއްލާ ހަނގުރާމަވެރިންގެ ލީޑަރެކެވެ.
އެމެރިކާގެ އޮފިޝަލުން ވިދާޅުވެފައިވާ ގޮތުގައި ހައްޤާނީއަކީ އެ މީހަކު ހޯދައިގެން ގެނެސްފި ނަމަ ސެންޓްރަލް އިންޓެލިޖެންސްއިން އިނާމު ދިނުމަށް ކަނޑައަޅާފައިވާ ފަރާތްތަކުގެ ތެރެއިން ފަރާތެކެވެ.
