މިދިޔަ އަހަރުގެ މުދަލުގެ ޒަކާތް ބަހަން ފަށައިފި
4 ސެޕްޓެމްބަރު 2018 | އަންގާރަ 07:39ބޮލަކަށް 1000 ދިވެހި ރުފިޔާގެ ރޭޓުން މުދަލު ޒަކާތް ބެހުމަށް ވަނީ ހަމަޖެހިފައި
އިސްލާމިކް މިނިސްޓްރީން ޒަކާތް ބަހަނީ -- ފޮޓޯ: ރާއްޖެ އެމްވީ
މިދިޔަ އަހަރުގެ މުދަލު ޒަކާތް އިސްލާމިކް މިނިސްޓްރީން ބަހަން ފަށައިފިއެވެ.
އިސްލާމިކް މިނިސްޓްރީން 2017 ވަނަ އަހަރުގެ މުދަލުގެ ޒަކާތް ބެހުމަށް ހަމަޖެހިފައިވަނީ އަންގާރަ ދުވަހުން ފެށިގެން މިމަހުގެ 6 ވަނަ ދުވަހުގެ ނިޔަލަށެވެ. އެއީ ކޮންމެ ދުވަހެއްގެ ހެނދުނު 09:00 އިން 15:00 އާއި ހަމައަށް ކަމަށްވެސް އެ މިނިސްޓްރީން މައުލޫމާތުދެއެވެ.
އިސްލާމިކް މިނިސްޓްރީން ބުނީ މާލެ ސިޓީގައި ޒަކާތް ބެހުމުގެ ކަންކަން ކުރިއަށް ދަނީ އިސްލާމީ މަރުކަޒު ހޯލުގައި ކަމަށެވެ.
މީގެ އިތުރަށް މިނިސްޓްރީން ބުނީ ބޮލަކަށް 1000 ދިވެހި ރުފިޔާގެ ރޭޓުން މުދަލު ޒަކާތް ބެހުމަށް ހަމަ ޖެހިފައިވާ ކަމަށާއި، އައްޑޫ، ފުވައްމުލަކު އަދި ގދ. ތިނަދޫ ފިޔަވައި އަތޮޅުތެރޭގެ ހުރިހާ ރަށަކަށް އެރަށެއްގައި ފަގީރުން އުޅޭ ނިސްބަތުން ޒަކާތުގެ ފައިސާ ފޮނުވާފައިވާ ކަމަށެވެ.
އިސްލާމިކް މިނިސްޓްރީން ބުނީ މާލެ ސިޓީގައި 3302 ފަގީރުންނަށް 2017 ވަނަ އަހަރުގެ މުދަލުގެ ޒަކާތް ބެހުމަށް ހަމަޖެހިފައިވާއިރު އައްޑޫ، ފުވައްމުލަކު އަދި ގދ.ތިނަދޫ ފިޔަވައި އަތޮޅުތެރޭގައި ޖުމްލަ 9992 ފަގީރުންނަށް މިފަހަރުގެ ޒަކާތް ބެހުމަށް ވަނީ ހަމަޖެހިފައެވެ.
