ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އަށް ހުޅުމާލެއިން ދޭން އުޅުނު ހަމަލާ އާއި ކުރީގެ ރައީސް މުހައްމަދު ނަޝީދު ރާއްޖެވަޑައިގެންފިނަމަ ކަރުބުރިކޮށްލާނެ ކަމަށް ބުނެ ދިން އިންޒާރާ ގުޅިގެން ފުލުހުން ފިނި ޖަވާބެއް ދީފިއެވެ.
ގުޅިފައިވާ ޕާޓީތަކުގެ ސަޕޯޓަރުންނާއި ޕީޕީއެމްގެ ސަޕޯޓަރުންނާ ދެމެދު ބުދަ ދުވަހުގެ ހަވީރު ހިނގި ހަމަނުޖެހުމާ ގުޅިގެން، ފުލުހުން ބޭއްވި ޕްރެސް ކޮންފަރެސްގައި ރާއްޖެއެމްވީ ކުރި ސުވާލަކަށް ޖަވާބު ދެއްވަމުން ފުލުހުންގެ ސްޕޯކްސްޕާސަން އަހުމަދު ޝިފާން ވިދާޅުވީ އިބޫއަށް ދޭން އުޅުނު ހަމަލާ އާއި ރައީސް ނަޝީދަށް އިންޒާރު ދިން މައްސަލަ ތަހުގީގު ކުރަމުންދާ ކަމަށެވެ. އަދި ވިދާޅުވީ އެއްވެސް ކަމެއް ގޯސްކޮށް ދާކަމުގައިވާނަމަ އެކަމެއް ފުލުހުން ބަލައި ތަހުގީގު ކުރާނެ ކަމަށާއި ވަކި ކެންޑިޑޭޓަކަށް ވީތީ އެއްވެސް ކަމެއް އެއްފަރާތްކޮށްފައި ނުވާނެ ކަމަށެވެ.
"އެއްވެސް ހާލަތެއްގައި ވަކި ކެންޑިޑޭޓެއް ވަކި ގޮތަކަށް މަސައްކަތް ކުރައްވާތީ، ވަކި ހާލަތެއް ދިމާވީތީ އެއްވެސް ކަމެއް އެއްފަރާތްކޮށްފައި ފުލުހުން ނުވާނެ... އެއްވެސް ކަމެއް ގޯސްކޮށް ދާނެ ކަމަށް ފުލުހުންނަށް ގަބޫލު ކުރެވޭ ކަމުގައިވާނަމަ، އެފަރާތްތަކަށް އަންގާނެ، ކަމެއް ދީވެފައިވާ ކަމުގައި ވަނީނަމަ، ފުލުހުން އެކަންކަން ބަލަމުންދާނެ. ހުސައިން ފާހަގަ ކުރި ކަންތައް [އިބޫ ދޭން އުޅުނު ހަމަލާ/ނަޝީދަށް ދިން އިންޒާރު] ފުލުހުން ބަލަމުން ގެންދާ ވާހަކަ ޔަގީންކޮށް އަރުވަން،" ސުޕްރިޓެންޑެންޓް އޮފް ޕޮލިސް ޝިފާން ވިދާޅުވިއެވެ.
މިދިޔަ ޖުލައި މަހުގެ އަށް ވަނަ ދުވަހު ހުޅުމާލެގައި ދޮރުން ދޮރަށް ހިންގަވަނިކޮށް އިބޫއަށް ދޭން އުޅުނު ހަމަލާ އާއި ރައީސް ނަޝީދަށް ދިން އިންޒާރާ ގުޅިގެން އެއްވެސް މީހަކު ހައްޔަރުކޮށް، އަދި އެކަމާ ގުޅޭ މީހަކާ ސުވާލުކޮށްފައިވޭތޯ ތަކުރާރުކޮށް ޝިފާނާ ސުވާލު ކުރުމުން ވެސް، ތަހުގީގު ކުރާ ކަމަށް ބުނުން ފިޔަވައި އިތުރު މައުލޫމާތެއް ނުދެއެވެ.
