ރިޔާސީ އިންތިހާބާ ދިމާކޮށް، 300 އެއްހާ ގައިދީން މިނިވަންކޮށްފައިވާ ކަން "ރާއްޖެއެމްވީ"އަށް އެނގިއްޖެއެވެ.

އިތުބާރު ހުރި މަސްދަރަކުން ރާއްޖެއެމްވީއަށް ކިޔައިދިން ގޮތުގައި މިއަހަރުގެ މިނިވަން ދުވަހުން ފެށިގެން މިހާތަނަށް 300 ވަރަކަށް ގައިދީން ވަނީ މިނިވަންކޮށްފައެވެ. މިނިވަން ކުރި ގައިދީންގެ ތެރޭގައި އެންމެ ގިނައިން ހިމެނެނީ މަސްތުވާތަކެތި ބޭނުންކުރުމާއި އޭގެ ވިޔަފާރިކުރި ކަމަށް ސާބިތުވެ، ހުކުމް ތަންފީޒު ކުރަމުންދިޔަ ގައިދީންނެވެ. މިނިވަންކުރި ގައިދީންގެ ތެރޭގައި 30 އަހަރު ދުވަހުގެ ޖަލު ހުކުމްތައް ތަންފީޒު ކުރަމުންދިޔަ ގައިދީން ވެސް ހިމެނެއެވެ.

ރާއްޖެޓީވީއަށް އެނގިފައިވާ ގޮތުގައި ގައިދީން މިނިވަންކޮށްފައި ވަނީ މައިގަނޑު ތިން ޝަރުތަކާ އެކުގައެވެ. އޭގެ ތެރޭގައި ހިމެނެނީ އެއް މަސް ދުވަސް ވަންދެން ގެއިން ބޭރަށް ނުނިކުތުމަށާއި ރަށުން ފުރައިގެން ނުދިއުމަށެވެ. އަދި މިނިވަންކުރި ގައިދީއަކު، ޖިނާއީ ކުށެއް ކޮށްފި ނަމަ ވަގުތުން ޖަލުހުކުމް ފުރިހަމަކުރަން ޖެހޭނެ ކަމަށް ވެސް އެ ގައިދީންނަށް އަންގާފައިވާކަން ރާއްޖެޓީވީއަށް ވަނީ އެނގިފައެވެ.

ހުކުމް ތަމްފީޒު ކުރަމުންދިޔަ 300 އެއްހާ ގައިދީން މިނިވަން ކުރީ ރައީސް އަބްދުﷲ ޔާމީންގެ އެންގެވުމަށެވެ.

އެ ގައިދީން މިނިވަން ކުރުމާ ގުޅިގެން ކަރެކްޝަނަލް ސާވިސްގެ އިންފޮމޭޝަން އޮފިސަރު އަހުމަދު ލުގުމާން ވިދާޅުވީ ގައިދީންނަށް ލުއި ދެމުންދާ ކަމަށާއި އެ ގައިދީންގެ ސީދާ އަދަދެެއް ދަންނަވަން ދަތި ކަމަށެވެ.

އަންނަ މަހު 23 ވަނަ ދުވަހު ބާއްވާ ރިޔާސީ އިންތިހާބާ ދިމާކޮށް، ގިނަ އަދަދެއްގެ ގައިދީން މިނިވަންކޮށްފައިވާއިރު، މާލެ އާއި އަތޮޅު ތެރޭގައި ވަނީ މާރާމާރީ ހިންގުން އިތުރުވެފައެވެ. އެގޮތުން މި ހަފްތާގެ ތެރޭގައި ވެސް މާލޭގައި ހިންގި ދެ މާރާމާރީއެއްގައި ހަތަރު މީހަކު ވަނީ ޒަހަމްކޮށްލާފައެވެ. އަދި އޭގެ ތެރެއިން އެކެއްގެ ސިކުނޑިއަށް ލޭ އެޅި، އައިޖީއެމްއެޗްގެ އައިސީޔޫގައި ދަނީ ފަރުވާ ދެމުންނެވެ.