ބޮލީވުޑްގެ ތަރި ސޯނަމް ކަޕޫރު އޭނާގެ ދެން އަންނަން އޮތް ފިލްމް "ދަ ޒޯޔާ ފެކްޓަރ" ގެ ޝޫޓިންތައް ފަށައިފިއެވެ.
ބުދަ ދުވަހު ސޯނަމް ވަނީ ފިލްމްގެ ޝޫޓިން ފެށިކަން އޭނާގެ އިންސްޓަގްރާމްގައި ހާމަކޮށްފައެވެ. ޝޫޓިން ކުރިއަށް ދިޔަ އިރު ސޯނަމް ވަނީ ސްނެޕް ވެސް ކޮށްފައެވެ.
އަބީޝެކް ޝަރްމާ ޑައިރެކްޓް ކުރާ މި ފިލްމްގައި ސޯނަމްގެ އިތުރުން މުހިއްމު ރޯލްތަކުން ފެނިގެންދާނީ ޒުލްގަރު ސަލްމާން އަދި ސަންޖޭ ކަޕޫރެވެ.
އަނޫޖާ ޗައުހަން ލިޔެފައިވާ ވާހަކައެއްގެ މައްޗަށް ބިނާކޮށް ތައްޔާރުކުރާ މި ފިލްމްގެ ވާހަކަ ލިޔެފައިވާ ފޮތް ހިފަހައްޓައިގެން ސޯނަމް އާއި ޒުލްގަރު ސަލްމާން ތިބި ފޮޓޯއެއް ސޯނަމް ވަނީ ކުރިން ދައްކާލާފައެވެ.
މިފިލްމްގެ އިތުރުން ސޯނަމް ދެން ފެނިގެންދާ އަނެއް ފިލްމަކީ "އެކް ލަޅްކީ ކޮ ދޭކާ ތޮ އެއިސާލަގާ" އެވެ. މި ފިލްމުގައި ސޯނަމް ފެނިގެންދާނީ ސޯނަމްގެ ބައްޕަ އަނިލް ކަޕޫރާއި، ޖޫހީ ޗާވަލް އަދި ރާޖްކުމާރު ރާއޯއާ އެކުގައެވެ.
ސޯނަމްގެ އެންމެ ފަހުން ރިލީޒްކުރި ފިލްމް "ވީރޭ ދި ވެޑިން" ވެގެން ގޮސްފައި ވަނީ ބޮޑު އާމްދަނީއެއް ލިބިގެންދިޔަ ކާމިޔާބު ފިލްމަކަށެވެ.
