ހިއްސާގެ ބާޒާރުގައި ލިސްޓްކޮށްފައިވާ މަޝްހޫރު އިލެކްޓްރިކް ކާރު ކުންފުނި، ޓެސްލާ، ހިއްސާގެ ބާޒާރުން ނަގައި، ޕްރައިވެޓް ކުންފުންޏަކަށް ހަދަން ކުރި މަސައްކަތް އެކުންފުނީގެ ބާނީ އަދި ސީއީއޯ އީލަން މަސްކް ހުއްޓާލައިފިއެވެ.
ޓެސްލާ ޕަބްލިކް ކުންފުންޏަކުން ޕްރައިވެޓް ކުންފުންޏަކަށް ބަދަލުކުރުމަށް ވިސްނާކަމަށް މަސްކް އިއުލާން ކުރީ މީގެ 2 ހަފްތާ ކުރިންނެވެ. ޓްވިޓަރ މެދުވެރިކޮށް އޭރު މަސްކް ބުނީ ޓެސްލާ ޕްރައިވެޓްކުރުމަށް 72 ބިލިއަން އެމެރިކާ ޑޮލަރު ހަމަޖެހިފައިވާކަމަށެވެ. އެހެންނަމަވެސް އޭނާގެ ވިސްނުން ބަދަލުކުރީ ބުރާސްފަތި ދުވަހު ބޭއްވި އެކުންފުނީގެ ބޯޑު ބައްދަލުވުމަކަށް ފަހުއެވެ. ކުންފުނި ހިއްސާގެ ބާޒާރުން ނަގާނެކަން މަސްކް އިއުލާންކުރުމާއިއެކު އެކުންފުނީގެ ހިއްސާގެ އަގު ވަނީ 20 އިންސައްތަ ވެއްޓިފައެވެ.
ރިޕޯޓްތައް ބުނާ ގޮތުން މަސްކް މަސައްކަތްކުރީ ސަޢޫދީ ޢަރަބިއްޔާގެ ސޮވަރިން ވެލްތު ފަންޑުން ފައިސާ ހޯދައިގެން ކުންފުނި އަލުން އަނބުރާ ގަތުމަށެވެ. އެހެންނަމަވެސް އެފައިސާ ހަމަޖެހިފައިނުވަނީސް އެކަން މަސްކް އިއުލާންކުރުމާއި ގުޅިގެން ޓެސްލާގެ ބައެއް އިންވެސްޓަރުން ތިބީ މަސްކްއާއިމެދު ހިތްހަމަނުޖެހިފައެވެ.
ޓެސްލާގެ ގާތްގަނޑަކަށް 20 އިންސައްތަ ހިއްސާއަކީ މަސްކްގެ ހިއްސާއެވެ. އޭނާ ބުނީ ކުންފުނި ހިއްސާގެ ބާޒާރުން ނެގުމާއި ބެހޭ ގޮތުން ކުންފުނީގެ ބޮޑެތި ހިއްސާދާރުންނާއި، ބައެއް ބޭންކްތަކާއި އެހެން ފަރާތްތަކާއިއެކު މަޝްވަރާކުރެވުނުކަމަށާއި، އެންމެންވެސް އެޚިޔާލާއި ދެކޮޅުކަމަށެވެ.
