ބުލީ ކުރާ ވީޑިއޯއެއް އާންމުވުމާއި ގުޅިގެން ފުލުހުން މައްސަލަ ބަލަންފަށައިފި
23 އޯގަސްޓު 2018 | ބުރާސްފަތި 17:15ވީޑިއޯގައި ފެންނަނީ ތިން އަންހެން ކުދިން ވެގެން އެއް އަންހެން ކުއްޖެއްގެ މޫނުމަތީ ޖަހައި، ކޮއްޕައި އަދި ހުތުރު ބަހުން އެއްޗެހި ކިޔާ މަންޒަރު
ބުލީކުރާ ވީޑިއޯގެ ސްކްރީންޝޮޓެއް
އަންހެން ކުއްޖެއްގެ ގައިގައި ޖަހާ ބުލީ ކުރާ ވީޑިއޯއެއް ސޯޝަލް މީޑިއާގައި އާންމުވުމާއި ގުޅިގެން އެމައްސަލަ ފުލުހުން ބަލަން ފަށައިފިއެވެ.
ސޯޝަލް މީޑިއާގައި ބުރާސްފަތި ދުވަހު އާންމުވި ވީޑިއޯގައި ފެންނަނީ ތިން އަންހެން ކުދިން ވެގެން އެއް އަންހެން ކުއްޖެއް ގޮވާގެން ވަކި ހިސާބަކަށްދާތަނެއެވެ. އެއަށްފަހު މޫނުމަތީ ޖަހައި، ކޮއްޕައި އަދި ހުތުރު ބަހުން އެއްޗެހި ކިޔާ ހަދައެވެ. ނަމަވެސް އެކުދިންގެ މެދުގައި މައްސަލަ ޖެހުނު ސަބަބު ސާފުވާ ގޮތް ވަނީ ނުވެފަ އެވެ.
ބުލީކުރާ މިވީޑިއޯ ވަރަށް ބޮޑަށް ސޯޝަލް މީޑިއާގައި އާންމުވުމާއި ގުޅިގެން ފުލުހުން ބުނީ މިހާރު މިމައްސަލަ ތަހުގީގު ކުރަމުން އަންނަ ކަމަށެވެ. އަދި މިމައްސަލަ ތަހުގީގު ކުރަމުން އަންނާތީ އިތުރު ތަފްސީލު ދެވެން ނެތް ކަމަށް ވެސް ފުލުހުން ބުންޏެވެ. ވީޑިއޯއިން ފެނިގެން ދަނީ ކުޑަކުދިންތަކެއް ކަން ނުވަތަ ނޫންކަން ވެސް ފުލުހުން ކަށަވަރުކޮށް ނުކޮށްދޭއިރު އާންމުގެ ގިނަ ބަޔަކު ދަނީ އެއީ 18 އަހަރު ނުފުރޭ ކުޑަކުދިންތަކެއް ކަމަށް ބުނަމުންނެވެ.
އެ ވީޑިއޯ އާންމުވުމާއެކު ގިނަ ބަޔަކު ދަނީ ސީރިއެސް މައްސަލައެއްގެ ތަހުގީގު ކުރުމަށް، ފުލުހުންނާއި، ޖެންޑާރ މިނިސްޓްރީއަށްށާއި، ކަމާ ބެހޭ އެހެން ފަރާތްތަކަށް ގޮވާލަމުންނެވެ.
