ސަރުކާރު ދިފާއުގައި މަސައްކަތްކުރާ އިނގިރޭސިވިލާތުގެ ޕާލިމެންޓް މެމްބަރަކު އިލެކްޝަންސް ކޮމިޝަނަށާއި އެންސީއައިޓީއަށް!

ރިޔާސީ އިންތިޚާބުގެ މިނިވަންކަމާއިމެދު ބައިނަލްއަޤްވާމީ މުޖްތަމައުން ސުވާލު އުފައްދާފައިވަނިކޮށް، ސަރުކާރު ދިފާޢުކޮށް ވާހަކަ ދެއްކުމަށް އިނގިރޭސި ޤާނޫން ހަދާ މަޖިލީހުގެ މެމްބަރަކު އިލެކްޝަންސް ކޮމިޝަނަށާއި ސަރުކާރުގެ އޮފީސްތައް ނެޓްވޯކަކުން ގުޅާލާފައިވާ ދައުލަތުގެ މައި އިދާރާ ނޭޝަނަލް ސެންޓަރ ފޯ އިންފޮމޭޝަން ޓެކްނޮލޮޖީ (އެންސީއައިޓީ)އަށް ވަޑައިގަންނަވައިފި އެވެ.

އިނގިރޭސިވިލާތުގެ އެ މެމްބަރު އިލެކްޝަންސް ކޮމިޝަނަށް ވަޑައިގެންނެވި ކަމަށްބުނާ ފޮޓޯއެއް ސޯޝަލް މީޑިއާގައި އެންމެ ހަރަކާތްތެރި އެ ފަރާތްތަކަށްވާ ތޮއްޔިބު ޝަހީމް ވަނީ ޓްވީޓް ކޮށްފަ އެވެ.

ބުރާސްފަތި ދުވަހުގެ ހެނދުނު 10:00 އަށް އެންސީއައިޓީއަށް އެ މެމްބަރު ވަޑައިގަންވާ ކަމުގެ މައުލޫމާތު ރާއްޖެޓީވީ ނޫސްވެރިންނަށް ލިބުމާއި ގުޅިގެން އެސަރަހައްދަށް ދިޔައިރު، އެންސީއައިޓީއަށް އިނގިރޭސިވިލާތުގެ ގާނޫނު ހަދާ މަޖިލީހުގެ އެ މެމްބަރު ވަދެވަޑައިގެންނެވި މަންޒަރު ވަނީ ފެނިފަ އެވެ.

އިލެކްޝަންސް ކޮމިޝަނަށާއި އެންސީއައިޓީއަށް އިނގިރޭސިވިލާތުގެ އެ މެމްބަރު ވަޑައިގެންނެވި އިރު، ރިޔާސީ އިންތިޚާބުގެ މިނިވަންކަމާއިމެދު ބައިނަލްއަޤްވާމީ މުޖްތަމައުން ސުވާލު އުފައްދާފައިވަނިކޮށް، ސަރުކާރު ދިފާޢުކޮށް ވާހަކަ ދެއްކުމަށް އިނގިރޭސި ޤާނޫން ހަދާ މަޖިލީހުގެ ބައެއް މެމްބަރުން ގެންނަން ދިވެހި ސަރުކާރުން މަސައްކަތްކުރާކަމުގެ އަޑުތަކެއް މީގެކުރިން ވަނީ ފެތުރިފަ އެވެ.

އިނގިރޭސިވިލާތުގެ ގާނޫނު ހަދާ މަޖިލީހުގެ މެމްބަރުންތަކެއް މީގެކުރިން ވެސް ސަރުކާރުން ގެނެސްފައި ވެއެވެ.

މައުލޫމާތު ލިބިފައިވާ ގޮތުގައި މިފަހަރުވެސް ސަރުކާރުން ގެނެސްފައިވަނީ 2016 ވަނަ އަހަރުގެ ކުރީކޮޅުވެސް ދިވެހި ސަރުކާރުން ބޮޑު ޚަރަދުކޮށްގެން ބިޒްނަސް ކްލާސް ޓިކެޓް ދީގެން ގެނައި އިނގިރޭސި ގާނޫނު ހަދާ މަޖިލީހުގެ މެމްބަރު ސަރ ޑޭވިޑް އޭމިސް އާއި އެހެން ބައެއް ބޭފުޅުންނެވެ.

މިއަހަރުގެ ބާއްވާ ރިޔާސީ އިންތިޚާބުގެ މިނިވަންކަން ގެއްލިފައިވާކަމަށް ބައިނަލްއަޤްވާމީ މުޖްތަމައުން ބުނަމުންދާ ދަނޑިވަޅެއްގައި އޭމިސްއާއި އޭނާގެ ޓީމް ރާއްޖެ ގެންނަން ސަރުކާރުން ނިންމިއިރު، އޭނާއަކީ ރައީސް ނަޝީދު ހައްޔަރުކުރުމާއި ގުޅިގެން ދިވެހި ސަރުކާރަށް ކުރިމަތިވި ޕްރެޝަރު ކުޑަކުރުމަށް 2016 ވަނަ އަހަރު ސަރުކާރުން ގެނައި އިނގިރޭސި ޤާނޫނު ހަދާ މަޖިލީހުގެ 3 މެމްބަރުންގެ ތެރެއިން އެއް ބޭފުޅާއެވެ. އަނެއް 2 މެމްބަރުންނަކީ އިއަން ޕެއިސްލީ އަދި މާކް މެންޒީސްއެވެ.

މީގެކުރިން އެބޭފުޅުން ރާއްޖެ ވަޑައިގަތުމަށްފަހު ރައީސް ޔާމީންގެ ސަރުކާރު ދިފާޢުކުރައްވައި ދެއްކެވި ވާހަކަފުޅާ ގުޅިގެންނާއި، ދިވެހި ސަރުކާރުގެ ޚަރަދުގައި އަގު ބޮޑު ޗުއްޓީ ދަތުރެއް ހޯއްދެވީތީ އިނގިރޭސިވިލާތުގައިވެސް ބޮޑެތި ފާޑުކިޔުންތަކެއް އަމާޒުވިއެވެ. ރާއްޖޭގެ އަގުބޮޑު ރިޒޯޓެއްގައި އެބޭފުޅުން ތިއްބެވިއިރު، މާލެ ވަޑައިގެން ތިއްބެވީ ހޮޓެލް ޖެން ގައިކަމަށް އިނގިރޭސި މީޑިއާތަކުން ރިޕޯޓްކުރިއެވެ.

ޑޭވިޑް އޭމިސްއަކީ 2008 ވަނަ އަހަރުގެ ރިޔާސީ އިންތިޚާބާއި ދިމާކޮށްވެސް އޭރު އިދިކޮޅުގައި އޮތް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ބަދުނާމުކުރުމަށް ވާހަކަ ދެއްކެވުމަށް ރާއްޖެ ވަޑައިގެންނެވި ބޭފުޅެއްކަމަށް ބުނެ އިނގިރޭސި ޤާނޫން ހަދާ މަޖިލީހުގެ މެމްބަރުންގެ ފާޑުކިޔުންތައް އަމާޒުވި ބޭފުޅެކެވެ. އަދި 2007 ވަނަ އަހަރުގެ ސެޕްޓެމްބަރު މަހާއި 2008 ވަނަ އަހަރުގެ އޮގަސްޓް މަހާއި ސެޕްޓެމްބަރު މަހު ރާއްޖެއަށް ވަޑައިގެންނެވި ދަތުރުފުޅުތަކުގެ ތަފްޞީލް އިނގިރޭސި ޤާނޫނު ހަދާ މަޖިލީހަށް އޭމިސް ހުށަހަޅުއްވާފައިނުވާ މައްސަލަވެސް 2009 ވަނަ އަހަރު ފެންމަތިވިއެވެ.

ވިލާތުގެ އިއްތިޙާދާއި، އދގެ އިތުރުން ބައިނަލްއަޤްވާމީ އެހެން ޖަމްއިއްޔާތަކުންނާއި އެކުވެރި ޤައުމުތަކުން ރާއްޖޭގެ ސިޔާސީ މަސްރަހުގައި ހިނގަމުންދާ ކަންތަކުގައި ސަރުކާރަށް ފާޑުކިޔަމުންދާއިރު، ސަރުކާރުގެ ދިފާޢުގައި ވާހަކަ ދައްކާނެ މާގިނަ ބަޔަކު ނެތެވެ. އެހެންކަމުން ސަރުކާރުން ބައިނަލްއަޤްވާމީ މުޖްތަމައުގެ ކުރިމަތީގައި ކުޅެވެން އޮތް ހަމައެކަނި ކާޑު ކުޅެން އުޅެނީކަމަށް މަސްރަހު ދިރާސާކުރާ ފަރާތްތަކުން ދެކެއެވެ.